“Ka bona legodimo le lefsa le lefase le lefsa; gobane legodimo la pele le lefase la pele di be di fetile, le lewatle ga le sa le gona.”—Kutollo 21:1, Phetolelo ya Lefase le Lefsa.

 “Ka bona legodimo le lefsa, le lefase le lefsa. Gobane legodimo la pele le be le tlogile, le lona lefase la pele. Le lewatle ga le sa le gona.”—Kutollo 21:1, Beibele ya Sepedi.

 Temana ye e bolela ka tsela ya seswantšhetšo gore Mmušo wa Modimo wa legodimong o tla tšeela mebušo ya batho legato. Mmušo wa Modimo o tlo fediša batho ba babe gomme wa buša setšhaba se sefsa sa batho bao ba latelago melao ya wona.

 Puku ya Kutollo e bolela ka tsela ya “dipontšho,” goba diswantšho. (Kutollo 1:1) Ka gona go a kwagala go dumela gore legodimo le lefase tšeo go bolelwago ka tšona temaneng ye ga se tša kgonthe eupša ke tša seswantšhetšo. Ditemana tše dingwe tša Beibele le tšona di bolela ka “magodimo a mafsa” le “lefase le lefsa” tša seswantšhetšo. (Jesaya 65:17; 66:22; 2 Petro 3:13) Go di hlahloba le dipego tše dingwe tša Beibele go ka re thuša go kwešiša seo di se bolelago.

 “Legodimo le lefsa.” Ka dinako tše dingwe Beibele e diriša lentšu, “legodimo” ge e bolela ka pušo goba mebušo. (Jesaya 14:12-14; Daniele 4:25, 26) Ka gona puku ye nngwe ya ditšhupetšo e bolela gore “legodimo le swantšhetša pušo goba mmušo.” a Go molaleng gore go Kutollo 21:1 “legodimo le lefsa” le šupa go Mmušo wa Modimo. Mmušo wo wa legodimong ka dinako tše dingwe o bitšwa “Mmušo wa magodimo,” o bolelwa gantši lengwalong la Kutollo le dipukung tše dingwe tša Beibele. (Mateo 4:17; Ditiro 19:8; 2 Timotheo 4:18; Kutollo 1:9; 5:10; 11:15; 12:10) Mmušo wa Modimo, wo Kgoši ya wona e lego Jesu mafelelong o tlo tšeela sebaka “legodimo la pele,” e lego mebušo e sa phethagalago ka moka ya batho.—Daniele 2:44; Luka 1:31-33; Kutollo 19:11-18.

 “Lefase le lefsa.” Beibele e bolela gore lefase le ka mohla le ka se senywe goba la tšeelwa legato. (Psalme 104:5; Mmoledi 1:4) Ka gona lefase la seswantšhetšo ke eng? Beibele gantši e diriša lentšu “lefase” ge e bolela ka batho. (Genesi 11:1; 1 Dikoronika 16:31; Psalme 66:4; 96:1) Ka gona “lefase le lefsa,” le bolela setšhaba se sefsa sa batho bao ba ikemišeditšego go latela melao ya mmušo wa Modimo wa legodimong. “Lefase la pele,” goba batho bao ba sa thekgego Mmušo wa Modimo ba tla fedišwa.

 “Lewatle ga le sa le gona.” Ka go dumelelana le Kutollo 21:1 ka moka ga yona, “lewatle” le lona ke la seswantšhetšo. Lewatle, ka go hloka khutšo ga lona le go ferekana gabonolo le swana le batho ba kgopo bao ba lego kgole le Modimo bao ba tletšego ka dintwa. (Jesaya 17:12, 13; 57:20; Kutollo 17:1, 15) Le bona ba tla fedišwa. Psalme 37:10 e re: “Go se gokae yo kgopo o tla be a se sa le gona; wena o tla lebelela lefelo la gagwe, gomme yena o tla be a se gona.”

 Puku ya Kutollo e bolela e sa le pele ditiragalo tša “letšatšing la Morena.” (Kutollo 1:10) Go ya ka boporofeta bja Beibele, letšatši leo le thomile ka 1914 ge Jesu a thoma go buša e le Kgoši ya Mmušo wa Modimo. b Eupša o be a sa tlo thoma go laola le semeetseng. Ge e le gabotse, boporofeta bjo bongwe bo bolela gore maemo a lefase a be a tla mpefala nakong ya karolo ya pele ya ‘letšatši la Morena.’ Karolo yeo ya pele e bitšwa ‘mehla ya bofelo.’ (2 Timotheo 3:1-5, 13; Mateo 24:3, 7; Kutollo 6:1-8; 12:12) Ge dinako tšeo tše di hlobaetšago le tše di tletšego ka mathata di fela, Mmušo wa Modimo o tla tloša legodimo le lefase tša seswantšhetšo gomme wa tliša mehla e mefsa ya khutšo le kwano. Ke moka, balatedi ba Mmušo wa Modimo, ke gore “lefase le lefsa,” ba tla phela bophelo bjo bo lapološago gape ba phetše gabotse mmeleng.—Kutollo 21:3, 4.

 Bogela bidio ye e kopana go bona kakaretšo ya puku ya Kutollo.