Moapostola Johane o ngwadile mabapi le ditiragalo tša bophelong bja Jesu gore: “Yo a di bonego o hlatsetše, e bile bohlatse bja gagwe ke bja therešo, gomme motho yoo o tseba gore dilo tše a di bolelago ke therešo e le gore le lena le dumele.”—Johane 19:35.

 Le lengwe la mabaka a gore re bote dipego tša Diebangedi tšeo di ngwadilwego ke Mateo, Mareka, Luka le Johane ke gore di ngwadilwe mehleng ya ge dihlatse tše dintši tšeo di bonego ka mahlo seo se diragetšego di be di sa dutše di phela. Go ya ka methopo e mengwe, Ebangedi ya Mateo e ngwadilwe ngwageng wa seswai ka morago ga lehu la Kriste, ke gore, mo e ka bago ka 41 C.E. Diithuti tše dintši di nagana gore e ngwadilwe ka morago ga moo, eupša ka kakaretšo go dumelelanwa ka gore dipuku tša Mangwalo a Bakriste a Segerika di ngwadilwe lekgolong la pele la nywaga C.E.

 Batho bao ba bonego Jesu ge a be a le mo lefaseng, bao ba mmonego ge a be a ehwa le bao ba mmonego ge a be a tsoga bahung, ba ka kgonthišetša go nepagala ga dipego tša Diebangedi tše. Le gona ba be ba ka re botša gabonolo go se nepagale le ge e le gofe ge e ba go le gona. Moprofesara F. F. Bruce o boletše gore: “E nngwe ya dintlha tše matla mokgweng wa pele wa go ruta wa baapostola ke gore ba be ba tsopola seo batheetši ba bona ba bego ba se tseba gabotse; ga se ba ka ba fo bolela gore, ‘Re dihlatse tša dilo tše,’ eupša ba boletše le gore, ‘Go etša ge le lena ka noši le tseba.’ (Ditiro 2:22).’”