Beibele ga e bolele ka Halloween. Lega go le bjalo, moo menyanya ya bogologolo ya Halloween e thomilego gona le meetlo ya lehono di bontšha gore Halloween ke moletlo wo o theilwego ditumelong tša maaka tša gore bahu ke meoya e sa bonagalego, goba batemona.—Bona “Histori le meetlo ya Halloween.”

 Beibele e lemoša ka gore: “Go wena go se ke gwa hwetšwa motho yo a ... dirišanago le meoya e mebe goba sedupe goba motho le ge e le ofe yo a botšišago dilo bahung.” (Doiteronomio 18:10-12) Gaešita le ge ba bangwe ba lebelela Halloween e le go fo ithabiša, Beibele e bontšha gore dilo tšeo di dirwago ge e ketekwa ga se tša go ithabiša. Go 1 Bakorinthe 10:20, 21, Beibele e re: “Ga ke nyake gore le dirišane le batemona. Le ka se nwe senwelong sa Morena le senwelong sa batemona.”—New International Version.

Histori le meetlo ya Halloween

1.   Monyanya wa Samhain: The World Book Encyclopedia e re moo Halloween e thomilego gona go ka bonwa “moletlong wa bogologolo wo o bego o ketekwa ke ma-Celt nywaga e fetago e 2 000 e fetilego. Ma-Celt a be a dumela gore ka nako ye, bahu ba be ba ka kgona go sepela gare ga bao ba phelago. Nakong ya monyanya wa Samhain, bahu ba be ba etela bao ba phelago.” Lega go le bjalo, Beibele e ruta ka mo go kwagalago gore bahu “ga ba tsebe selo le gatee.” (Mmoledi 9:5) Ka gona, ba ka se ikgokaganye le bao ba phelago.

2.   Diaparo, malekere le dipapadi tša Halloween: Go ya ka puku ya Halloween—An American Holiday, An American History, ba bangwe ba ma-Celt ba be ba apara diaparo tšeo e kego ke dipoko e le gore meoya yeo e sepelasepelago e ka nagana gore ke ba bangwe ba yona gomme e ba tlogele. Ba bangwe ba be ba nea meoya yeo malekere gore ba e kgahle. Mehleng ya magareng kua Yuropa, baruti ba Makatholika ba ile ba thoma go diriša mekgwa ya tikologong yeo ya boheitene ke moka ba thoma go ya ka ntlo le ntlo ba apere diaparo tše itšego ba kgopela dimpho tše dinyenyane. Ka lehlakoreng le lengwe, Beibele ga e kgothaletše go tswalanya metlwae ya borapedi bja maaka le borapedi bja Modimo.—2 Bakorinthe 6:17.

3.   Dipoko, batho ba go nwa batho madi, batho bao ba iphetošago diphiri, baloi le ditlotlwane: Ke kgale dilo tše di sepedišana le meoya e mebe. (Halloween Trivia) Beibele e bolela ka mo go kwagalago gore re swanetše go ganetša meoya e mebe, re se ke ra keteka le yona.—Baefeso 6:12.

4.   Mafodi a Halloween: Nywageng ya magareng kua Brithania, “batho bao ba bego ba rapela Modimo ba be ba tsena ka ntlo le ntlo ba kgopela dijo, ge o ba fa ba be ba go rapelela go bahu,” ke moka ba tla ba swere “mabone ao a beilwego ka gare ga digwere tšeo di phutšwego, ao seetša sa ona se bego se emela moya o mongwe wo o kgakgetšwego pakatoring.” (Halloween​—From Pagan Ritual to Party Night) Ba bangwe ba be ba re mabone ao a be a dirišetšwa go raka meoya e mebe. Nywageng ya bo-1800 kua Amerika Leboa, mafodi a ile a tšea legato la digwere ka gobane e be e le mantši e bile go le bonolo go phulwa le go ntšhwa tša ka gare. Ditumelo tšeo di sepedišanago le moetlo wo—gore moya ga o hwe, thuto ya pakatori le go rapelela batho go bahu—ga se tša thewa Beibeleng.—Hesekiele 18:4.