Molwa le Kriste ga e fo ba motho o tee goba mokgatlo o itšego, ka ge Beibele e re go na le “balwa-le-Kriste ba bantši.” (1 Johane 2:18) Ka gona polelwana “Molwa le Kriste,” yeo e tšwago lentšung la Segerika leo le bolelago “go ba kgahlanong le Kriste” e bolela ka motho yo mongwe le yo mongwe yoo a dirago dilo tše:

•   Motho yo a sa dumelego gore Jesu ke Kriste (Mesia) goba yo a ganago gore ke Morwa wa Modimo.—1 Johane 2:22.

•   Motho yo a lwago le Kriste, Motlotšwa wa Modimo.—Psalme 2:1, 2; Luka 11:23.

•   Motho yo a itirago Kriste.—Mateo 24:24.

•   Motho yo a tlaišago balatedi ba Kriste, ka ge Jesu a lebelela se se dirwago go bona e le seo se dirwago yena.—Ditiro 9:5.

•   Motho yoo a ipitšago Mokriste mola a sa dutše a dira dilo tša go hloka molao goba bofora.—Mateo 7:22, 23; 2 Bakorinthe 11:13.

 Ntle le go bolela feela ka batho bao ba dirago dilo tše e le balwa le Kriste, Beibele e ba bitša gape e le sehlopha gore ke “molwa le Kriste.” (2 Johane 7) Molwa le Kriste o ile a tšwelela la mathomo mehleng ya baapostola go ba go fihla ga bjale. Boporofeta bja Beibele bo boletše ka go tšwelela ga molwa le Kriste.—1 Johane 4:3.

•   Ba bolela dikgopolo tša maaka ka Jesu. (Mateo 24:9, 11) Ka mohlala, bao ba rutago thuto ya Borarobotee goba bao ba rutago gore Jesu ke Modimo Ramatla ohle, ge e le gabotse ga ba dumelelane le seo Jesu a se rutilego ge a re: “Tate o mpheta ka bogolo.”—Johane 14:28.

•   Balwa le Kriste ba gana seo Jesu a se boletšego mabapi le kamoo Mmušo wa Modimo o šomago ka gona. Ka mohlala, baetapele ba bangwe ba bodumedi ba bolela gore Kriste o diriša mebušo ya batho. Lega go le bjalo, se se thulana le seo Jesu a se boletšego ge a re: “Mmušo wa ka ga se karolo ya lefase le.”—Johane 18:36

•   Ba bolela gore Jesu ke Morena wa bona, eupša ga ba latele ditaelo tša gagwe tšeo di akaretšago go bolela ditaba tše dibotse tša Mmušo.—Mateo 28:19, 20; Luka 6:46; Ditiro 10:42.