“Dinotlelo tša Mmušo,” tšeo ka dinako tše dingwe di bitšwago “dinotlelo tša go tsena mmušong,” di emela matla a go kgona go bulela batho ba bangwe tsela ya go “tsena Mmušong wa Modimo.” (Mateo 16:19; The New American Bible; Ditiro 14:22) a Jesu o ile a nea Petro “dinotlelo tša Mmušo wa magodimo.” Seo se bolela gore Petro o be a neilwe matla a go botša batho bao ba botegago seo ba ka se dirago gore ba kgone go tsena Mmušong wa magodimo, ka gore ba amogele moya o mokgethwa.

Dinotlelo tšeo di ile tša dirišwa go bomang?

 Petro o ile a diriša matla a tšwago go Modimo go bulela dihlopha tše tharo tsela ya go tsena Mmušong:

1.   Bajuda le bao ba sokologetšego bodumeding bja Sejuda. Ka moragonyana ga lehu la Jesu, Petro o ile a kgothatša lešaba la badumedi ba Bajuda go dumela gore Jesu o kgethilwe ke Modimo go ba kgoši ya Mmušo wa gagwe. Petro o ile a ba botša seo ba swanetšego go se dira gore ba tle ba phološwe. Ka go dira bjalo, o ile a ba bulela tsela ya gore ba kgone go tsena Mmušong gomme ba dikete ba ile ba ‘amogela lentšu la gagwe.’—Ditiro 2:38-41.

2.   Basamaria. Ka morago, Petro o ile a laelwa gore a ye go Basamaria. b O ile a diriša senotlelo sa Mmušo gape ge yena le moapostola Johane ba be ba “rapelela [Basamaria] gore ba hwetše moya o mokgethwa.” (Ditiro 8:14-17) Se se ile sa bulela Basamaria tsela ya gore ba tsene Mmušong.

3.   Baditšhaba. Ka morago ga mengwaga e meraro le seripa Jesu a hwile, Modimo o ile a utollela Petro gore Baditšhaba (e lego batho bao e sego Bajuda) le bona ba be ba tla hwetša sebaka sa go tsena Mmušong. Petro o ile a diriša se sengwe sa dinotlelo tšeo a bego a di neilwe go ruta Baditšhaba ka Modimo gomme seo sa ba nea sebaka sa go hwetša moya o mokgethwa, ba fetoge Bakriste e bile ba be le kholofelo ya go tlo ba ditho tša Mmušo.—Ditiro 10:30-35, 44, 45.

Go “tsena Mmušong” go bolela’ng?

 Bao ba “tsenago Mmušong” ba tla buša gotee le Jesu legodimong. Beibele e boletše e sa le pele gore ba tla ‘dula didulong tša bogoši’ le gore ba tla “buša e le dikgoši godimo ga lefase.”—Luka 22:29, 30; Kutollo 5:9, 10.

Maaka mabapi le dinotlelo tša Mmušo

 Maaka: Legodimo le emetše go kwa gore Petro o re dinotlelo tša Mmušo di tlo šoma neng.

 Therešo: Ge Jesu a be a bolela ka dinotlelo tša Mmušo, o ile a botša Petro gore: “Selo le ge e le sefe se o ka se tlemago mo lefaseng se tla ba se šetše se tlemilwe magodimong, le gona selo le ge e le sefe se o ka se tlemollago mo lefaseng se tla ba se šetše se tlemolotšwe magodimong.” (Mateo 16:19) Le ge ba bangwe ba bona eka taba ye e bolela gore Petro o dira diphetho tša seo se swanetšego go direga magodimong, madiri ao a dirišitšwego mo a Segerika sa mathomong a bontšha gore diphetho tše Petro a bego a tlo di dira di be di tla latela tšeo di šetšego di dirilwe magodimong go e na le go di eta pele. c

 Ditemana tše dingwe ka Beibeleng di bontšha gore Petro o be a latela ditaelo tšeo di tšwago legodimong ge a be a diriša dinotlelo tša Mmušo wa Magodimo. Ka mohlala, o ile a latela ditaelo tše di tšwago go Modimo ge a be a diriša dinotlelo tše tharo.—Ditiro 10:19, 20.