Dikereke tše dingwe di re Mikaele ke “Mokgethwa Mikaele,” e lego leina leo go bonagalago Jesu a ilego a le newa pele le ka morago ga ge a ka tla mo lefaseng. a Mikaele o ile a lwa le Sathane ba baka setopo sa Moshe. E bile o ile a roma morongwa yo mongwe gore a iše molaetša wa Modimo go moporofeta Daniele. (Daniele 10:13, 21; Juda 9) Mikaele o phela ka go dumelelana le seo se bolelwago ke leina la gagwe leo le bolelago gore “Ke Mang yo a Swanago le Modimo?” ka go lwela bogoši bja Modimo le go lwa le manaba a Modimo.​—Daniele 12:1; Kutollo 12:7.

 Ekwa gore ke ka baka la eng e le mo go kwagalago go phetha ka gore Jesu ke yena Mikaele morongwa yo mogolo.

•   Mikaele ke “morongwa yo mogolo.” (Juda 9) Leina “morongwa yo mogolo,” leo le bolelago gore “Moetapele wa barongwa,” le tšwelela gabedi feela ka Beibeleng. Mafelong ao le tšwelelago go ona, le šupa go morongwa o tee feela. E nngwe ya ditemana tšeo e bontšha gore Morena Jesu yoo a tsošitšwego bahung “o tla theoga legodimong ka mokgoši wa taelo, ka lentšu la morongwa yo mogolo.” (1 Bathesalonika 4:16) Jesu o na le “lentšu la morongwa yo mogolo” ka gobane ke yena Mikaele morongwa yo mogolo.

•   Mikaele o eteletše madira a barongwa pele. Beibele e re “Mikaele le barongwa ba gagwe ba lwa le drakone,” e lego Sathane. (Kutollo 12:7) Mikaele o na le matla a magolo a go laola dibopiwa ka moka tšeo di lego legodimong, ke ka baka leo a bitšwago “yo mongwe wa dikgoši tše dikgolo” le “kgoši e kgolo.” (Daniele 10:13, 21; 12:1) Seithuti sa Beibele ya Testamente e Mpsha e lego David E. Aune o re maina a a hlalosa Mikaele e le “moetapele yo mogolo wa madira a barongwa.”

   Beibele e bolela leina la motho yo mongwe gape yoo a nago le matla a go laola madira a barongwa. E utolla gore ‘Morena Jesu o tla tšwa legodimong a na le barongwa ba gagwe ba matla, a le mollong o laumago, nakong ya ge a tlo lefetša.’ (2 Bathesalonika 1:7,8; Mateo 16:27) Jesu o ile ‘a ya legodimong gomme barongwa le balaodi ba ile ba dirwa gore ba ikokobeletše yena, le mebušo le yona ya dirwa gore e ikokobeletše yena.’ (1 Petro 3:21, 22) E ka se be mo go kwagalago gore Modimo a laele gore Mikaele le Jesu ba phenkgišane ka go etelela pele barongwa ba bakgethwa. Eupša ke mo go kwagalago go phetha ka gore maina a ka bobedi e lego, Jesu le Mikaele, a šupa go motho o tee.

•   Mikaele “o tla ema” nakong ya ge batho ba tla be ba ‘tlaletšwe kudu.’ (Daniele 12:1) Ka pukung ya Daniele, lentšu “ema” gantši le šupa go kgoši yeo e emago gore e dire selo se itšego. (Daniele 11:2-4, 21) Jesu Kriste o hlaloswa e le “Lentšu la Modimo,” le “Kgoši ya dikgoši” yeo e tlago go dira selo se itšego gore a fediše manaba a Modimo ka moka le go šireletša batho ba Modimo. (Kutollo 19:11-16) O tla dira seo nakong ya “masetlapelo a magolo a sa kago a ba gona ga e sa le go tloga mathomong a lefase.”​—Mateo 24:21, 42.