Biebele ga e re botše gore Modimo o thomile neng go bopa legodimo le lefase e bile ga e re botše gore o le bopile nako e kaaka’ng. E bolela feela gore: “Mathomong Modimo o hlodile magodimo le lefase.” (Genesi 1:1) Beibele ga e re botše gore ge e re “mathomong” e ra neng. Lega go le bjalo, Lengwalo la Genesi le re botša ka seo se ilego sa direga pele Modimo a ka bopa lefase ka “matšatši” a tshela.

•  Na matšatši a tshela ao Modimo a bopilego dilo ka ona e be e le matšatši a diiri tše 24 ao a tlwaelegilego?

•  Go diregile eng ka matšatši a tshela ao Modimo a bopilego dilo ka ona?

•  Na pego ya Genesi ya mabapi le tlholo e dumelelana le saense?

•  Letšatši, ngwedi le dinaledi di dirilwe neng?

•  Go ya ka Beibele, lefase le na le mengwaga e mekae le le gona?

 Aowa. Ka Beibeleng, lentšu “letšatši” le ka hlalosa dinako tša go fapafapana, eupša go ithekgile ka gore go bolelwa ka eng. Ka mohlala, karolo e nngwe ya Beibele e hlalosa gore Modimo o bopile dilo ka moka ka letšatši le letee.—Genesi 2:4.

 Modimo o ile a fetoša lefase leo ‘le bego le se na sebopego e bile le se na selo’ gore le dulwe ke dilo tšeo di phelago. (Genesi 1:2) Ke moka a dira gore lefaseng go be le bophelo. Beibele e re botša ka dilo tše tshelelago tšeo di ilego tša direga nakong ya ge Modimo a be a bopa dilo tšeo di lego mo lefaseng:

•  Letšatši la pele: Modimo o ile a dira gore go be le seetša lefaseng, ke moka a dira gore go be le bošego le mosegare.—Genesi 1:3-5.

•  Letšatši la bobedi: Modimo o ile a dira gore go be le sebakabaka, goba a dira gore meetse ao a lego lefaseng le meetse ao a lego sebakabakeng a arogane.—Genesi 1:6-8.

•  Letšatši la boraro: Modimo o ile a dira gore naga e ome gomme a dira gore go be le dimela go yona.—Genesi 1:9-13.

•  Letšatši la bone: Modimo o ile a dira gore letšatši, ngwedi, le dinaledi di bonege lefase di le sebakabakeng.—Genesi 1:14-19.

•  Letšatši la bohlano: Modimo o ile a dira gore go be le diphedi tša ka meetseng le diphedi tšeo di fofago lefaufaung.—Genesi 1:20-23.

•  Letšatši la botshelela: Modimo o ile a bopa diphoofolo le batho.—Genesi 1:24-31.

 Ka morago ga letšatši la botshelela, Modimo o ile a khutša goba a tlogela go bopa dilo.—Genesi 2:1, 2.

 Dilo tšeo di ngwadilwego ka Beibeleng tša mabapi le tlholo ga di tšwe go borasaense. Go e na le moo, tsela yeo Beibele e hlalosago dilo tšeo Modimo a di bopilego ka yona, e thuša gore babadi ba Beibele le babadi ba mehleng ya ge Beibele e be e ngwalwa, ba kwešiše gabonolo. Pego ya Genesi ya mabapi le tlholo ga e ganetšane le seo borasaense ba se bolelago. Robert Jastrow yoo e lego setsebi sa dinaledi o ngwadile gore: “Dilo ka moka tšeo di bolelwago ka Beibeleng le tšeo di bolelwago ke borasaense di a fapana, eupša tsela yeo dinaledi di lego ka yona le seo Beibele e se bolelago ka gore bophelo bo thomile bjang, di a swana. Le gona tatelano ya ditiragalo tšeo di bilego gona pele motho a ka bopša, di diregile ka lebelo e bile di diregile ka nako e tee.”

 Pele Modimo a bopa lefase, o thomile ka go dira letšatši, ngwedi le dinaledi tšeo di lego ‘magodimong.’ (Genesi 1:1) Lega go le bjalo, seetša se be se sa kgone go fihla lefaseng ka gobane sebakabakeng go be go na le leswiswi le legolo. (Genesi 1:2) Ka letšatši la mathomo, go be go sešo gwa bonagala gore seetša se be se e tšwa se le kae. Ka letšatši la bone seetša se ile sa bonagala gore se be se etšwa se le sebakabakeng. Beibele e re letšatši, ngwedi le dinaledi di ile tša thoma go ‘bonega lefaseng.’ Tsela yeo di bego di bonagala ka yona, le motho yo a bego a le mo lefaseng o be a ka kgona go di bona gabotse—Genesi 1:17.

 Beibele ga e re botše gore lefase le na le mengwaga e mekae le le gona. Genesi 1:1 e no re botša feela gore legodimo le lefase di na le mathomo. Taba ye e ganetšana le seo borasaense ba se naganago mabapi le gore lefase le na le nako e kaaka’ng le le gona.