Polelwana e rego “lentšu la Modimo,” gantši e ra gore molaetša wa Modimo goba Beibele. (Luka 11:28) Mafelong a sego kae ka Beibeleng, polelwana “Lentšu la Modimo” goba “Lentšu,” e dirišwa e le leina la motho.​—Kutollo 19:13; Johane 1:​14.

 Molaetša wa Modimo. Gantši baporofeta ba be ba bolela gore molaetša woo ba o botšago batho ke lentšu la Modimo. Ka mohlala, gantši ge Jeremia a thoma go bolela molaetša wa boporofeta, o be a re “lentšu la Jehofa la ntlela.” (Jeremia 1:​4, 11, 13; 2:1) Pele moporofeta Samuele a botša Saulo gore Modimo o mo kgethile gore e be kgoši, o itše: “Ema e le gore ke go botše lentšu la Modimo.”​—1 Samuele 9:​27.

 Leina la motho. “Lentšu” le tšwelela gape ka Beibeleng e le leina la Jesu Kriste ge e le sebopiwa sa moya legodimong le ge a be a phela mo lefaseng. Ekwa gore ke ka baka la eng re phetha ka go re’alo:

•   Lentšu o phetše pele dilo ka moka di ka ba gona. “Mathomong Lentšu o be a le gona, . . . Yena yo mathomong o be a na le Modimo.” (Johane 1:​1, 2) Jesu ke “leitšibulo la tlholo yohle . . . Ke wa pele ga dilo tše dingwe ka moka.”​—Bakolose 1:​13-​15, 17.

•   Lentšu o tlile lefaseng e le motho. “Lentšu e bile nama, a tla a dula le rena.” (Johane 1:​14) Jesu Kriste “o ile a itlhohlora a ba ka sebopego sa mohlanka, a ba motho.”​—Bafilipi 2:​5-7.

•   Lentšu ke Morwa wa Modimo. Ka morago ga gore moapostola Johane a bolele gore “lentšu e bile nama,” o ile a tšwela pele ka gore: “Ra bona letago la gagwe, letago leo e lego la morwa yo a tswetšwego a nnoši yo a tšwago go tate.” (Johane 1:​14) Johane o ile a ngwala gape gore: “Jesu Kriste ke Morwa wa Modimo.”​—1 Johane 4:​15.

•   Lentšu o na le dika tša go swana le tša Modimo. “Lentšu e be e le modimo.” (Johane 1:1) Jesu ke “ponagatšo ya letago la Modimo le seswantšho sa kgonthe sa yena ka noši.”​—Baheberu 1:​2, 3.

•   Lentšu o buša e le kgoši. Beibele e bolela gore godimo ga hlogo ya Lentšu la Modimo, e lego Jesu, go na le “mefapahlogo e mentši.” (Kutollo 19:12, 13) Lentšu gape o bitšwa “Kgoši ya dikgoši le Morena wa marena.” (Kutollo 19:16) Jesu ke “Kgoši ya bao ba bušago e le dikgoši le Morena wa bao ba bušago e le marena.”​—1 Timotheo 6:​14, 15.

•   Lentšu ke mmoleledi wa Modimo. Leina “Lentšu” le itlhalosa e le la motho yo Modimo a mo romago gore a iše melaetša le ditaelo. Jesu o ile a bolela gore: “Tate yo a nthomilego ka noši o nneile taelo mabapi le seo ge e le gabotse ke swanetšego go se bolela le go se ruta. . . . Ka gona, dilo tšeo ke di bolelago, ke di bolela go etša ge Tate a mpoditše tšona.”​—Johane 12:49, 50.