Molao wo o rego “leihlo ka leihlo” e be e le o mongwe wa melao yeo Modimo a e filego Baisiraele ba bogologolo a diriša Moshe. Le gona, Jesu o ile a bolela ka ona ge a be a ruta Thutong ya gagwe ya Thabeng. (Mateo 5:38, Ekisodo 21:24, 25; Doiteronomio 19:21) Molao woo o be o bolela gore ge badirabobe ba fiwa kotlo, kotlo yeo e be e swanetše go lekana le molato woo ba o dirilego. a

 Molao wo o be o lebišitšwe go motho yo a bego a gobaditše motho yo mongwe ka boomo. Ge e ba motho a gobatša yo mongwe ka boomo, molao wa Moshe o be o re: “Go roba go lefše ka go robja, leihlo ka leihlo, leino ka leino; bogole le ge e le bofe bjoo a ka bo bakelago motho le yena a bo bakelwe.”​—Lefitiko 24:20.

•  Morero wa molao wa “leihlo ka leihlo” e be e le ofe?

•  Na Bakriste ba swanetše go diriša molao wa “leihlo ka leihlo”

•  Maaka ao a bolelwago ka molao wa “leihlo ka leihlo”

•  Jesu o phošolla kgopolo e fošagetšego

 Molao wa “Leihlo ka Leihlo” o be o sa fe motho tokelo ya go itefeletša. Eupša, o be o thuša baahlodi bao ba kgethilwego go nea dikotlo tše di swanetšego, tšeo di sego boima kudu goba boleta kudu.

 Molao wo gape o be o dirišwa go thibela motho le ge e le ofe yoo a bego a ka gobatša yo mongwe ka boomo goba a loga maano a go mo gobatša. Molao woo o be o re: “Bao ba šetšego [ke gore, bao ba bonego ge Modimo a phetha toka] ba tla di kwa gomme ba tšhoga, le gona ba ka se tsoge ba dirile selo se sebe go etša se mo go wena.”​—Doiteronomio 19:20.

 Aowa, Bakriste ga ba gapeletšege go o diriša. Molao wo e be e le o mongwe wa Melao ya Moshe yeo Jesu a e fedišitšego ka sehlabelo sa lehu la gagwe.​—Baroma 10:4.

 Lega go le bjalo, molao wo o bontšha tsela yeo Modimo a naganago ka yona. Ka mohlala, o bontšha gore Modimo o tšeela toka godimo. (Psalme 89:14) E bile o bontšha gore melao ya Modimo e na le toka. Ka mohlala, Modimo o laetše gore badirabobe ba swanetše go otlwa “go fihla tekanyong e swanetšego.”​—Jeremia 30:11.

 Maaka: Molao wa “leihlo ka leihlo” o be o dumelela motho gore a itefeletše.

 Therešo: Molao wa Moshe ka bowona o be o re: “O se ke wa itefeletša goba wa ba le sekgopi le bana ba setšhaba sa geno.” (Lefitiko 19:18) Go e na le gore moalo wo o kgothaletše batho gore ba itefeletše, o be o ba kgothaletša gore ba bote Modimo le melao ya gagwe yeo a e beilego go rarolla melato yeo e dirilwego.​—Doiteronomio 32:35.