Go tla ga Kriste go Bolela Eng?
Seo Beibele e se bolelago
Mangwalo a bolela gantši ka nako e tlago ya ge Kriste a tlo ahlola batho mo lefaseng. a Ka mohlala, Mateo 25:31-33 e re:
“Ge Morwa wa motho [Jesu Kriste] a fihla ka letago la gagwe a na le barongwa ka moka, o tla dula sedulong sa gagwe sa bogoši sa letago. Ditšhaba ka moka di tla kgobokanywa pele ga gagwe gomme o tla kgethologanya batho go etša ge modiši a kgethologanya dinku go dipudi. Dinku o tla di bea ka letsogong la gagwe la le letona, eupša dipudi ka go la le letshadi.”
Nako ye ya kahlolo e tla ba karolo ya “masetlapelo a magolo” ao a sa kago a ba gona historing ya batho. Masetlapelo ao a tla tsoša ntwa ya Haramagedone. (Mateo 24:21; Kutollo 16:16) Seswantšhong sa Jesu, manaba a Kriste a hlaloswa e le dipudi gomme a “tla welwa ke kotlo ya kahlolo ya tshenyego ya ka mo go sa felego.” (2 Bathesalonika 1:9; Kutollo 19:11, 15) Go fapana le seo, bahlanka ba gagwe bao ba botegago ba tla thabela ‘bophelo bjo bo sa felego.’—Mateo 25:46.
Kriste o tlo tla neng?
Jesu o itše: “Ge e le mabapi le letšatši leo le iri, ga go na yo a tsebago.” (Mateo 24:36, 42; 25:13) Lega go le bjalo, o ile a hlalosa “pontšho” yeo re tlogo bona ka yona gore o kgauswi le go tla.—Mateo 24:3, 7-14; Luka 21:10, 11.
Na Kriste o tla tla ka mmele wa moya goba wa nama?
Jesu o ile a tsošwa ka mmele wa moya, ka gona o tla tla e le sebopiwa sa moya, e sego sa nama. (1 Bakorinthe 15:45; 1 Petro 3:18) Ka lebaka leo, letšatši pele ga lehu la gagwe, Jesu o ile a botša baapostola ba gagwe gore: “Go šetše lebakanyana feela gomme lefase le ka se hlwe le mpona.”—Johane 14:19.
Dithuto tše di tlwaelegilego tšeo di fošagetšego mabapi le go tla ga Kriste
Pono e Fošagetšego: Ge Beibele e re batho ba tla bona ge Jesu “a etla ka maru,” se se ra gore Jesu o tla bonwa ka mahlo ge a etla.—Mateo 24:30.
Therešo: Gantši Beibele e tswalanya maru le selo seo se utegilego. (Lefitiko 16:2; Numeri 11:25; Doiteronomio 33:26) Ka mohlala, Modimo o boditše Moshe gore: “Ke tla go wena ke le lerung le leso.” (Ekisodo 19:9) Moshe ga se a bona Modimo ka mahlo. Ka mo go swanago, ge Kriste “a etla ka maru,” batho ba tla lemoga gore o fihlile gaešita le ge ba ka se kgone go mmona ka mahlo.
Pono e fošagetšego: Polelwana e rego “mahlo ka moka a tla mmona,” yeo e dirišitšwego go Kutollo 1:7 ge e bolela ka go tla ga Kriste, e swanetše go kwešišwa e le bjalo.
Therešo: Mantšu a Segerika ka Beibeleng ao a šupago “leihlo” le go “bona” gantši a dirišwa ka kgopolo ya go lemoga go e na le go bona ka kgonthe. b (Mateo 13:15; Luka 19:42; Baroma 15:21; Baefeso 1:18) Beibele e re Jesu yo a tsošitšwego ke “yena ... yo a dulago seetšeng se se sa batamelegego, yo go se nago motho ... yo a ka mmonago.” (1 Timotheo 6:16) Ka rea’lo, “mahlo ka moka a tla mmona” ka kgopolo ya gore batho ba tla lemoga gore Jesu ke yena a tlišago kahlolo ya Modimo.—Mateo 24:30.
Pono e fošagetšego: Mantšu a lego go 2 Johane 7 a bontšha gore Jesu o tla tla ka mmele wa nama.
Therešo: Temana yeo ya Beibele e re: “Gobane bafori ba bantši ba tšwetše lefaseng, e lego batho bao ba sa bolelego gore ba dumela go Jesu Kriste e le yo a tlilego a le nameng.”
Nakong ya moapostola Johane, ba bangwe ba be ba sa dumele gore Jesu o tlile lefaseng ka mmele wa nama. Ba be ba bitšwa Magnostic. Johane wa Bobedi temana 7 e ngwaletšwe go ganetša kgopolo ya bona e fošagetšego.
You May Also Like
MOROKAMI
Morero wa go Boa ga Kriste ke Ofe?
Morero wa go boa ga Kriste ke ofe? O tla boa ka tsela efe, gomme o tla dira’ng?
DIPOTŠIŠO TŠA BEIBELE DI A ARABJA
Ntwa ya Haramagedone ke Eng?
Lentšu Haramagedone le tšwelela gatee feela ka Beibeleng, eupša ntwa ye go bolelwa ka yona Mangwalong ka moka.
DIPOTŠIŠO TŠA BEIBELE DI A ARABJA
Masetlapelo a Magolo ke Eng?
Boporofeta bjo go thwego ke bja ‘mehla ya bofelo,’ bo re botša ka nako yeo batho ba tlago go welwa ke mathata ao a sa kago a ba gona. Re ka letela go bona dilo dife di direga?
MOROKAMI
Jesu Kriste ke Mang?
Ke ka baka la’ng Jesu a ile a hwa? Ke’ng seo Jesu a se dirago gona bjale? Bala dikarabo tša dipotšišo tše gotee le tša tše dingwe ka Beibeleng.
DITHUTO TŠA BEIBELE
Leka Thuto ya Rena ya Beibele
Ithute Beibele mahala o thušwa ke motho yo mongwe.