Aowa, Beibele ga e rute thuto ya gore motho a ka phološwa gatee ya ba moka. Motho yo a nago le kholofelo ya go tlo phološwa ka baka la tumelo yeo a nago le yona go Jesu Kriste, go ka direga gore a se phološwe ka ge a se sa na tumelo. Beibele e re gore motho a be le tumelo go nyakega maiteko a magolo, e lego go ‘lwa ka matla.’ (Juda 3, 5) Bakriste ba lekgolong la pele la nywaga, bao ba bego ba dumela go Kriste ba ile ba botšwa gore: “Dulang le šomela phološo ya lena ka go boifa le go thothomela.”​—Bafilipi 2:​12.

Ditemana tša Beibele tšeo di ganetšanago le thuto ya gore motho a ka phološwa gatee ya ba moka

•   Beibele e lemoša ka dibe tše dikgolo tšeo di ka thibelago motho gore a se tsene Mmušong wa Modimo. (1 Bakorinthe 6:​9-​11; Bagalatia 5:​19-​21) Ge e ba motho a be a phološwa gatee ya ba moka, ditemošo tšeo di be di ka se be le mohola. Beibele e bontšha gore go ka direga gore motho yo a phološitšwego a se sa phološwa ka ge a boetše a dira sebe se segolo. Ka mohlala, Baheberu 10:26 e re: “Gobane ge re tlwaela go dira sebe ka boomo ka morago ga ge re hweditše tsebo e nepagetšego ya therešo, gona ga go sa na sehlabelo se sengwe bakeng sa dibe.”​—Baheberu 6:​4-6; 2 Petro 2:​20-​22.

•   Jesu o ile a gatelela bohlokwa bja go dula re e na le tumelo ka go dira papišo. O ile a itshwantšha le mohlare wa morara goba moterebe woo makala a wona a swantšhwago le balatedi ba gagwe. Ba bangwe ba bona ba be ba tla bontšha gore ba na le tumelo go yena ka dienywa, goba ka ditiro, eupša ka morago ga nako ba se sa dira bjalo gomme ba “lahlelwa ka ntle bjalo ka lekala [le le se nago dienywa],” ba se phologe. (Johane 15:​1-6) Moapostola Paulo o ile a diriša papišo e swanago ge a be a bolela gore Bakriste bao ba sa dulego ba na le tumelo ba tla “ripša.”​—Baroma 11:17-​22.

•   Bakriste ba botšwa gore ba swanetše go ‘dula ba phakgame.’ (Mateo 24:42; 25:13) Bao ba robalago moyeng ka go dira “mediro ya leswiswi” goba ka go se dire seo Jesu a laetšego gore se dirwe, ba ka se phološwe.​—Baroma 13:11-​13; Kutollo 3:​1-3.

•   Mangwalo a mantši a Beibele a bontšha gore bao ba phološitšwego ba swanetše go kgotlelela ka potego go fihla bofelong. (Mateo 24:13; Baheberu 10:36; 12:​2, 3; Kutollo 2:​10) Bakriste ba lekgolong la pele la nywaga ba ile ba thaba kudu ge ba be ba ekwa gore Bakristegotee le bona ba kgotleletše tumelong. (1 Bathesalonika 1:2, 3; 3 Johane 3, 4) Na go tla be go kwagala gore Beibele e gatelele taba ya go kgotlelela ka potego ge e ba bao ba sego ba kgotlelela le bona ba be ba tla phološwa?

•   Moapostola Paulo o ile a kgodišega gore o phološitšwe ge a be a le kgauswi le go hwa. (2 Timotheo 4:​6-8) Pele go fihla nako yeo, o be a tseba gore go be go ka kgonega gore a se phološwe ge a be a ka ineela dikganyogong tša nama. O ngwadile gore: “Ke tula mmele wa ka gomme ka o laola bjalo ka lekgoba, gore e se re ka morago ga ge ke rutile ba bangwe, nna ka tla ka se amogelege go Modimo ka tsela e itšego.”​—1 Bakorinthe 9:​27; Bafilipi 3:​12-​14.