Diabolo le batemona ba tutuetša batho kudu moo Beibele e bolelago gore: “Yo Mobe o laola lefase ka moka.” (1 Johane 5:19, New Century Version) Beibele e re botša ditsela tšeo Diabolo a tutuetšago batho ka tšona.

•   Bofora. Beibele e kgothaletša Bakriste go “lwantšha ditiro tša bohwirihwiri tša Diabolo.” (Baefeso 6:11) Le lengwe la maano a gagwe ke go fora batho gore ba dumele gore batho bao a ba dirišago ge e le gabotse ke bahlanka ba Modimo.—2 Bakorinthe 11:13-15.

•   Go dirišana le meoya e mebe. Diabolo o aroša batho ka go dirišana le meoya e mebe, didupe le dinoge goba ka batho bao ba dumelago gore dinaledi di kgoma maphelo a bona. (Doiteronomio 18:10-12) Go diriša dihlaretagi, go fefeanya le mekgwa ya go naganišiša yeo e dirago gore motho a se sa gopola selo le yona e dira gore motho a laolwe ke batemona.—Luka 11:24-26.

•   Bodumedi bja maaka. Madumedi ao a rutago dithuto tša maaka a aroša batho gore ba se kwe Modimo. (1 Bakorinthe 10:20) Beibele e bitša ditumelo tše bjalo tša maaka gore ke “dithuto tša batemona.”—1 Timotheo 4:1.

•   Go swarwa ke batemona. Beibele e re botša ka batho bao ba ilego ba laolwa ke meoya e mebe. Batho bao ba swerwego ke batemona ka dinako tše dingwe ba be ba foufala, ba sa kgone go bolela goba gaešita le go ikgobatša.—Mateo 12:22; Mareka 5:2-5.

Kamoo o ka phemago tutuetšo ya Diabolo

 Ga se wa swanela go dula o boifa go laolwa ke batemona, ka gobane Beibele e bontšha kamoo o ka ganetšago Diabolo.

•   Ithute go lemoga ditsela tša Diabolo e le gore o kgone go “tseba maano a gagwe.”—2 Bakorinthe 2:11.

•   Ithute tsebo yeo e lego ka Beibeleng ke moka o diriše seo o ithutago sona. Go diriša melao ya motheo ya Beibele go tla go šireletša tutuetšong ya Diabolo.—Baefeso 6:11-18.

•   Lahla selo le ge e le sefe seo se tswalanago le mediro ya batemona. (Ditiro 19:19) Seo se akaretša mmino, dipuku, dimakasine, dipampiri tša go bapatša le dibidio tšeo di kgothaletšago go dirišana le meoya e mebe.