Beibele e Re’ng ka go Ikona Dijo?
Karabo ya Beibele
Mehleng ya ge Beibele e be e ngwalwa, Modimo o be a dumelela batho gore ba ikone dijo ge feela ba dira seo ka mabaka a kwagalago. Eupša ge ba be ba ka ikona dijo ka mabaka a go se kwagale, Modimo o be a sa amogele seo. Lehono, ga go na mo Beibele e bontšhago gore batho ba ikone dijo goba ba se ikone dijo.
Batho bao go bolelwago ka bona ka Beibeleng, bao ba bego ba ikona dijo, ba be ba dira seo ka mabaka afe?
Ge ba be ba kgopela Modimo gore a ba thuše le go ba hlahla. Ge batho ba be ba eya Jerusalema, ba be ba ikona dijo e le go bontšha gore ba tloga ba nyaka gore Modimo a ba thuše. (Esera 8:21-23) Ka dinako tše dingwe ge Paulo le Baranaba ba be ba tlo kgetha bagolo ba phuthego, ba be ba ikona dijo.—Ditiro 14:23.
Ge ba be ba dira dilo tša Modimo. Ka morago ga gore Jesu a kolobetšwe, o ile a fetša matšatši a 40 a ikona dijo, e le gore a itokišeletše go tlo dira thato ya Modimo ge a be a tlo ruta batho ka Mmušo wa Modimo.—Luka 4:1, 2.
Ge ba be ba itsholela dibe tšeo ba di dirilego. Modimo o ile a diriša moporofeta Joele go botša Baisiraele bao ba sa botegego gore: “Boelang go nna ka dipelo tša lena ka moka, ka go ikona dijo, ka go lla le ka go golola.”—Joele 2:12-15.
Ka letšatši la poelano. O mongwe wa Melao yeo Modimo a bego a e neile setšhaba sa Isiraele o be o akaretša taelo ya gore ngwaga le ngwaga ba ikone dijo ka letšatši la poelano. a (Lefitiko 16:29-31) Letšatši leo le be le ba gopotša gore ga se ba phethagala le gore ba swanetše go kgopela Modimo gore a ba lebalele.
Mabaka a mangwe a go se kwagale a go ikona dijo ke afe?
Go kgahla batho. Jesu o rutile gore, taba ya go ikona dijo e swanetše go tsebja ke motho yoo le Modimo feela.—Mateo 6:16-18.
Ge motho a itira eka o lokile. Go ikona dijo ga go dire gore Modimo a go tšee o le bohlokwa go feta batho ba bangwe.—Luka 18:9-14.
Ge motho a leka go phumola sebe seo a se dirilego ka boomo. (Jesaya 58:3, 4) Modimo o be a amogela go ikona dijo ga batho bao ba bego ba mo kwa le bao ba bego ba tloga ba itsholela dibe tša bona.
Go phetha ditirelo tša bodumedi. (Jesaya 58:5-7) Modimo o swana le motswadi yoo a nyamišwago ke go bona bana ba gagwe ba mo rata feela ka gobane ba gapeletšega e sego ka pelo ka moka.
Na Bakriste ba swanetše go ikona dijo?
Aowa. Modimo o ile a laela Baisiraele gore ba ikone dijo ka letšatši la poelano, eupša o ile a phumola taelo yeo ka morago ga gore Jesu a hwele batho ka moka bao ba bego ba itshola. (Baheberu 9:24-26; 1 Petro 3:18) Bakriste ga ba ka tlase ga Molao wo Modimo a bego a o file Baisiraele a diriša Moshe woo o bego o akaretša go gopola letšatši la poelano. (Baroma 10:4; Bakolose 2:13, 14) Mokriste yo mongwe le yo mongwe a ka itirela phetho ya gore o nyaka go ikona dijo goba go se bjalo.—Baroma 14:1-4.
Bakriste ba therešo ba a tseba gore go ikona dijo ga se karolo ya borapedi bja bona. Beibele ga e tswalanye go ikona dijo le lethabo. Go e na le moo, ka ge Jehofa e le “Modimo yo a thabilego,” Bakriste ba therešo le bona ba tsebja ka go ba le lethabo.—1 Timotheo 1:11; Mmoledi 3:12, 13; Bagalatia 5:22.
Dikgopolo tše di fošagetšego mabapi le seo Beibele e se bolelago ka go ikona dijo
Maaka: Bakriste ba swanetše go ikona dijo e le go gopola matšatši a 40 ao Jesu a a feditšego a le lešokeng a ikona dijo ka morago ga gore a kolobetšwe.
Therešo: Jesu ga se a ka a bolela gore batho ba ikone dijo e le go gopola matšatši a 40 ao a a feditšego a le lešokeng, e bile ga go na mo Beibele e bontšhago gore Bakriste ba lekgolong la pele la mengwaga ba be ba ikona dijo e le go gopola matšatši ao a 40. b
Maaka: Bakriste ba swanetše go ikona dijo ge ba gopola lehu la Jesu.
Therešo: Jesu ga se a laela barutiwa ba gagwe gore ba ikone dijo ge ba gopola lehu la gagwe. (Luka 22:14-18) Ge Jesu a be a re barutiwa ba gagwe ba tla ikona dijo ge a hwile, o be a sa ba laele gore ba ikone dijo, eupša o be a no bolela seo se tlago go direga ka morago ga ge a hwile. (Mateo 9:15) Beibele e laetše Bakriste gore ge e ba ba swerwe ke tlala, ba tloge ba jele pele ba etla Segopotšong sa lehu la Jesu.—1 Bakorinthe 11:33, 34.
a Modimo o ile a botša Baisiraele gore ka letšatši la poelano ‘ba itaye.’ (Lefitiko 16:29, 31) Temana ye e kwagala e šupa go go ikona dijo. (Jesaya 58:3) Ka gona, Beibele ya Contemporary English e fetoletše temana ye ka go re: “Go bontšha gore o a itshola dibeng tša gago, o swanetše go ikona dijo.”
b Ge New Catholic Encyclopedia e bolela ka Lent goba matšatši a 40 a go ikona dijo, e re: “Mengwagakgolong e meraro ya mathomo, nako ya go ikona dijo bakeng sa go itokišeletša monyanya wa paseka e be e sa fete matšatši a šupago. Gantši e be e tšea letšatši letee goba a mabedi. . . . Lekga la pele moo go bolelwago ka matšatši a 40 a go ikona dijo le tšwelela ka molaong wa bohlano wa seboka sa Baruti ba Roma (Council of Nicaea [325]). Lega go le bjalo, banyakišiši ba bangwe ga ba dumelelane ka taba ya ge e ba molao woo o be o bolela ka Lent.”—Second Edition, Bolumo 8, letlakala 468.
You May Also Like
JESU—TSELA, THEREŠO LE BOPHELO
Ke ka Baka La’ng Barutiwa ba Jesu ba sa Ikone Dijo
Jesu o diriša seswantšho sa mabapi le makuka a beine go ba nea karabo.
DIPOTŠIŠO TŠA BEIBELE DI A ARABJA
Na Modimo o tla Ntshwarela?
Ela hloko seo Beibele e se bolelago mabapi le kamoo o ka swarelwago ke Modimo.
MABAPI LE RENA
Kgopela Thuto ya Mahala ya Beibele
Ithute Beibele, goba o ithute ka mo go oketšegilego ka Dihlatse tša Jehofa.