Ka di-7 December 2022, ofisi ya bofetoledi ya se-Venda e ile ya thoma go šoma Mmasepaleng wa Makhado, Afrika Borwa. Sehlopha sa moo sa bafetoledi se dirwa ke bafetoledi ba ka mehla ba lesome le bafetoledi ba sa šomego ka mehla ba seswai.

Go na le batho ba ka bago ba 1 200 000 bao ba bolelago se-Venda Afrika Borwa, mola ba bangwe ba 100 000 ba le Zimbabwe. Gabjale go na le diphuthego tše 28 tša se-Venda dinageng tše tše pedi, gomme di na le bagoeledi ba e ka bago ba 800.

Go mpshafaditšwe ntlo yeo e bego e le gona ya dirwa mafelo a mane a bodulo. Go agilwe moago o moswa wo o nago le diofisi tša bafetoledi. Mafelo a mangwe a mararo a bodulo a rekilwe lefelong la kgauswi.

Ofisi ye e agilwe go dumelelana le maemo a leratadima a lefelong leo. Ka mohlala, Ngwanabo rena Jody Palvie wa Lefapha la Bohlami le la Mediro ya go Aga, yo a bego a okametše mošomo, o re: “Ga se ra tloša mehlare e metelele ya meriti yeo e bego e šetše e le gona ka ge lefelo le le fiša tšhiritšhiri, e bile re šomišitše kudu dithaele le samente moagong wo.”

Lefelo le le leswa le thuša bafetoledi gore ba kopane gantši le batho ba go bolela se-Venda. Mofetoledi yo mongwe o re: “Gabjale re tswakatswakana le batho ba go bolela se-Venda letšatši le letšatši. Se se loutša bokgoni bja rena bja go fetolela, e bile se re thuša gore re diriše polelo yeo batho ba e bolelago letšatšing le lengwe le le lengwe.” Mofetoledi yo mongwe yena o re: “Bjale re kgauswi kudu le bana babo rena le dikgaetšedi ba go bolela se-Venda bao ba re thušago go rekhota dibidio le dikgatišo.” Re a tseba gore Jehofa o tlo tšwela pele a šegofatša bana babo rena ba le dikgaetšedi bao ba lekago ka matla go “[mo] tumiša” gare ga batho bao ba bolelago se-Venda.—Psalme 145:21.