Karolo ya Boraro ya Dinepe tša Brithania (Go Tloga ka September 2016 go Fihla ka February 2017)
Bona kamoo mošomo wa go aga ofisi e mpsha ya lekala ya Dihlatse tša Jehofa kua Brithania, o ilego wa tšwela pele ka gona magareng ga September 2016 le February 2017.
Ka di-13 tša September 2016—Ka jarateng ya ofisi ya lekala
Motšhene wa go epa o tšhela mobu ka gare ga lori. Pele mošomo wa go aga o ka thongwa, go ile gwa epša mobu gomme wa išwa lefelong le lengwe.
Ka di-15 tša September 2016—Moago wo o tlago go dirišwa ka nakwana
Batho ba go šoma Lefapheng la Mohlagase ba beakanya dithapo tša mohlagase gabotse e le gore di se bake kotsi. Moago wo o tlo dirišwa e le ofisi ya nakwana le lefelo la go jela nakong ya ge go agwa meago e mefsa ya ofisi ya lekala.
Ka di-19 tša September 2016—Ka jarateng ya ofisi ya lekala
Go dirwa tsela e mpsha yeo e yago meagong ya ofising ya lekala. Ka go le letshadi la tsela, go lokišwa serapana le letangwana e bile go dirwa le lefelo leo batho ba ka emago go lona ge ba bogetše serapana seo.
Ka di-3 tša November 2016—Ka jarateng ya ofisi ya lekala
Go thubja maswikana ao a hweditšwego ka jarateng ya ofisi ya lekala gomme maswikana ao a tlo dirišwa go aga ditsela tša ka jarateng.
Ka di-4 tša November 2016—Ka jarateng ya ofisi ya lekala
Bašomi ba dira ditsela tša nakwana le tša sa ruri. Ba ala selo seo se swanago le khaphethe (white geotextile membrane) seo se thušago gore mobu o se gogolege. Ka go le letona, motšhene o lokiša tsela pele ga ge go ka alwa selo seo se swanago le khaphethe.
Ka di-5 tša November 2016—Seboka seo se rulagantšwego ke Komiti ya Modiro wa go Aga
Baithaopi ba newa tsebišo e oketšegilego go se sengwe sa diboka tše 18 tšeo di bego di swaretšwe Brithania le Ireland, tšeo di bego di rulagantšwe ke Komiti ya Modiro wa go Aga. Dihlatse tša Jehofa tše di fetago 15 000 di bile gona dibokeng tše, gomme tše dintši tša tšona di ile tša ithaopela go tšea karolo modirong wa go aga.
Ka di-28 tša November 2016—Ka jarateng ya ofisi ya lekala
Bašomi ba tšhela manyora mohlareng wo o sa tšwago go bjalwa woo o bitšwago Salix alba. Wo ke o mongwe wa mehlare e fetago e 700 yeo e bjetšwego lefelong le. Letangwana le le dirilwe ka tsela ya gore nakong ya ge go ena dipula tša mafula meetse a elelele ka gare ga lona. Letangwana le le tlo boloka meetse a pula le go a ntšha ganyenyane-ganyenyane.
Ka di-5 tša December 2016—Ka jarateng ya ofisi ya lekala
Le ge go na le kgodi, mošomo wa go lokiša lefelo leo go tlago go agwa go lona o tšwela pele. Ka kakaretšo, bašomi ba epolotše le go rwala mekgobo ya mobu yeo e ka tlatšago dilori tše di fetago tše 10 000!
Ka di-6 tša December 2016—Ka jarateng ya ofisi ya lekala
Sehlopha sa go šoma serapaneng se lokiša mmu gore go tle go bjalwe matšoba a mantši serapaneng seo. Go bjetšwe mehuta e 11 ya mehlare le mehuta e 16 ya matšoba serapaneng se le dikarolong tše dingwe tša lefelo le. Mehuta ye ka moka ke ya gona moo Brithania.
Ka di-19 tša December 2016—Mafelo a bodulo
Ka go le letshadi, motšhene wa go bora, o bora molete wa fantišene gomme gwa tšhelwa khonkhoriti. Ge go tšhetšwe khonkhoriti moleteng woo, bašomi ba tsenya ditšhipi. Go tsentšwe ditšhipi tše di fetago 360 fantišeneng ya meago ya bodulo.
Ka di-29 tša December 2016—Ka jarateng ya ofisi ya lekala
Mesong yeo go tonyago, mošomi yo o kgomaganya phaephe ya meetse yeo e tlago go iša meetse diofising tša nakwana.
Ka di-16 tša January 2017—Ka jarateng ya ofisi ya lekala
Motšhene wa go šoma ka ntle le ka gare ga meetse o ntšha ditšhila tšeo di lego ka letangwaneng. Matangwana a mmalwa a go swana le le, a be a senyegile gomme a nyaka go lokišwa. Leboto leo le dikologilego letangwana le a lokišwa gore mobu o se gogolege ge dipula di ena. Dihlapi tše di fetago tše 2 500 di ile tša ntšhwa ka letangwaneng le gomme tša išwa matangwaneng a mangwe pele ga ge letangwana le le ka thoma go lokišwa.
Ka di-17 tša January 2017—Mafelo a bodulo
Go dirwa fantišeni ya meago e mebedi ya bodulo. Ka go le letona go hlomilwe diphoulo tša fantišeni. Ka go le letshadi, go tšhetšwe khonkhoriti. Mo gare ke motšhene wa go bora, o bora mo go tlago go tsenywa ditšhipi tša fantišeni.
Ka di-23 tša January 2017—Lefelo leo le šomago e le ofisi ya nakwana
Mošomi o tšhela sehlare sa go tswalela menga pele ga ge a ka penta foreimi ya lebati la lefelong leo baeng ba bogelago meago ba eme go lona. Lefelong le, baeng ba tlo kgona go bona kamoo mošomo o tšwelago pele ka gona.
Ka di-14 tša February 2017—Mafelo a bodulo
Go kopanywa motšhene wo o thušago go rwala dilo tše boima. Motšhene wo wa botelele bja dimithara tše e ka bago tše 40, o ka rwala dilo tša go imela dikhilograma tše 16 000.
Ka di-15 tša February 2017—Mafelo a bodulo
Mošomi o fokotša diphoulo tša khonkhoriti gore di be boemong bjo bo nyakegago. Bašomi ba tlo tlema ditšhipi tše di tšweletšego khonkhoriting ge ba tlo thoma go aga.
Ka di-17 tša February 2017—Ka jarateng ya ofisi ya lekala
Batho ba go šoma ka mohlagase ba tsenya le lengwe la maswao a mabedi a JW.ORG lebotong la kgauswi le keiti ya go tsena ka ofising ya lekala.
Ka di-17 tša February 2017—Ka jarateng ya ofisi ya lekala
Tsela ya go tsena ofising ya lekala e feditšwe. Ka go le letshadi go na le maswao a mabedi ao a sa tšwago go tsenywa a JW.ORG. Ge bašomi ba feditše go aga letangwana le go bjala matšoba ka serapaneng, tsela ya go tsena ka ofising ya lekala e tlo ba e botse kudu.
Ka di-24 tša February 2017—Mafelo a bodulo
Motšhene wa go rwala dilo tše boima o kgona go rwala dilo tše di lego bokgole bja dimithara tše 65. Go tloga mo o lego gona o kgona go fihla meagong e mene ya bodulo. Bašomi ba tšhela khonkhoriti lebatong la ka fase, moo go tlago go phaka dikoloi. Ditšhipi tša go tiiša moago di tsentšwe, ga bjale go šetše gore go agwe maboto.