Mokgatlo wa mehleng yeno wa Dihlatse tša Jehofa o thomile mafelelong a lekgolo la bo-19 la nywaga. Ka nako yeo, sehlopha se senyenyane sa barutwana ba Beibele bao ba bego ba dula kgauswi le Pittsburgh, Pennsylvania, United States, ba ile ba thoma go hlahloba Beibele ka tsela e rulagantšwego. Ba ile ba bapetša dithuto tšeo di bego di rutwa ke dikereke le seo ge e le gabotse Beibele e se rutago. Ba ile ba thoma go gatiša seo ba bego ba ithuta sona ka dipukung, dikuranteng le ka makasineng woo gona bjale o bitšwago Morokami—O Tsebatša Mmušo wa Jehofa.

Gare ga sehlopha seo sa barutwana ba botegago ba Beibele go be go na le monna yo a bitšwago Charles Taze Russell. Le ge ka nako yeo Russell a be a etelela pele modiro wa go ruta ka Beibele e bile e be e le mogatiši wa mathomo wa Morokami, e be e se mothomi wa bodumedi bjo bofsa. Pakane ya Russell le Barutwana ba bangwe ba Beibele, ka ge sehlopha seo se be se tsebja bjalo ka nako yeo, e be e le go godiša dithuto tša Jesu Kriste le go latela mekgwa ya phuthego ya Bokriste ya lekgolong la pele la nywaga. Ka ge Jesu e le Mothomi wa Bokriste, re mo tšea e le mothomi wa mokgatlo wa rena.—Bakolose 1:18-20.