Ka ge Dihlatse tša Jehofa di rata Modimo le baagišani ba tšona, di tutueletšega go bolela ka molaetša wa Beibele le batho bohle, go akaretša le bao ba kilego ba araba ka gore ga ba nyake go kwa molaetša wa rena. (Mateo 22:37-39) Go rata Modimo go re tutueletša gore re latele taelo yeo Morwa wa Modimo a re neilego yona ya gore re “[nee] bohlatse bjo bo feletšego.” (Ditiro 10:42; 1 Johane 5:3) Gore re dire se, re ekiša baporofeta ba Modimo ba bogologolo ka go bolela molaetša wa Modimo ka go se kgaotše. (Jeremia 25:4) Ka ge re rata baagišani ba rena, re leka go ba botša “ditaba tše dibotse tša Mmušo” tšeo di tlago go ba phološa. Re di botša le bao ba bego ba sa nyake go di kwa mathomong.​—Mateo 24:14.

Gantši re hwetša batho ba ba nyakago go kwa molaetša wa rena magaeng ao re kilego ra hwetša batho bao ba bego ba sa nyake go re theetša. Ela hloko mabaka a a mararo:

• Batho ba a thotha.

• Re ka hwetša motho yo mongwe yo a ka ratago go kwa molaetša wa rena.

• Batho ba a fetoga. Dilo tšeo di diregago mo lefaseng goba mathata a motho a ka dira gore ba bangwe ba ‘lemoge gore ba nyaka dilo tša moya’ goba gore ba swanetše go ba le tswalano le Modimo gomme seo sa dira gore ba nyake go kwa molaetša wa Beibele. (Mateo 5:3) Le bao ba ganetšago ba ka fetoša dipelo tša bona go swana le moapostola Paulo.​—1 Timotheo 1:13.

Lega go le bjalo, ga re gapeletše motho go theetša molaetša wa rena. (1 Petro 3:15) Re dumela gore motho yo mongwe le yo mongwe o swanetše go itirela phetho ge go tliwa ditabeng tša bodumedi.​—Doiteronomio 30:19, 20.