Ge e ba o le yo mongwe wa Dihlatse tša Jehofa, nagana gore go bjang go felegetšwa ke maphodisa ge o eya go ruta batho Beibele ka ntlo le ntlo! Seo se ile sa diragalela Joseph wa kua Micronesia ka 2017. Yena le Dihlatse tša Jehofa tše dingwe tše tharo ba be ba le lesolong le le kgethegilego la go ruta batho Beibele dihlakahlakeng tša kgole le metse e mengwe ya moo Micronesia.

 Mo e ka bago gare ga mosegare, Dihlatse tša Jehofa tšeo tše nne di ile tša fihla sehlakahlakeng se senyenyane seo se nago le badudi ba e ka bago ba 600. Di ile tša dumedišwa ke mmeyara wa sehlakahlakeng seo di le lefelong la kgauswi le lewatle. Joseph o re hlalosetša seo se ilego sa direga ka morago ga moo. O re: “Mmeyara yoo o ile a re koloi ya maphodisa e ka re iša dintlong ka moka tšeo re nyakago go ya go tšona. Seo se be se re makaditše kudu, eupša re ile ra no gana ka tlhompho. Re be re nyaka go etela batho ba moo ka tsela ye re tlwaetšego go dira ka yona ge re eya ka ntlo le ntlo.”

 Dihlatse tša Jehofa tšeo tše nne di ile tša thoma go sepela ka maoto, di ikemišeditše go bolela le batho ba bantši kamoo di ka kgonago. Di ile tša re: “Batho ba moo ba be ba re amogela gabotse e bile ba rata go kwa molaetša wa rena. Ka baka leo re ile ra fetša nako e ntši ka ntlong e nngwe le e nngwe go feta kamoo re bego re letetše ka gona.”

 Ka moragonyana lona letšatšing leo, koloi ya maphodisa e ile ya feta Joseph gabedi mo tseleng ke moka ka lekga la boraro ya ema. Maphodisa ao a ile a botšiša Joseph gore ga a nyake ba mo iša dintlong tšeo a sego a tšwa a eya go tšona. Joseph o re: “Ke ile ka gana, eupša lekgeng le ba ile ba gapeletša ba re, ‘go šetše nako e nyenyane pele o tloga mo sehlakahlakeng, re tla go iša dintlong ka moka tšeo di šetšego.’ Ke ile ka se kgone go gana ka gobane ke be ke sa šaletšwe ke dintlo tše dintšinyana. Re be re re ge re batamela ntlo yeo ke yago go yona, maphodisa ao a mpotša gore ke ka ga mang ka moo le gore ge nkare ke kokota ba se ke ba bula, bona ba tla letša pele ya koloi.

 “Ka baka la ge maphodisa ao a ile a re thuša, re ile ra kgona go etela dintlo ka moka tša sehlakahlakeng seo letšatšing leo. Re ile ra nea batho ba moo dikgatišo tše dintši e bile ra dira le dipolane tša go tlo boa re etela bao ba nyakago go ithuta ka mo go oketšegilego.”

 Maphodisa ao a ile a botša Joseph gore “a tloga a thabetše go bolela ditaba tše dibotse.” Ge letšatši le sobetše gomme Dihlatse tša Jehofa di boela gae, maphodisa a ile a ba laela a semaela e bile a swere dikgatišo tša go ithuta Beibele.