Motho yoo ke bego ke bapala le yena karati o ile a gobala kudu go feta ka moo ke bego ke nagana ka gona. Ke ile ka mo raga mo nkong ka phošo. Ke ile ka thoma go ikwa ke le molato gomme ka ipotšiša ge e ba ke swanetše go tšwela pele ke bapala karati yeo ke feditšego mengwaga e mentši ke e bapala. E re ke thomeng pele ke le botše gore go tlile bjang gore ke feleletše ke bapala karati.

 Ke goletše U.S.A. kgauswi le lefelo leo le bitšwago Buffalo, kua New York. Ka gešo re be re rata khutšo e bile re tsena kereke ya Khatolika. Ke be ke tsena dikolo tšeo di bego di tsenwa ke Makhatolika e bile ke šoma lefelong le lekgethwa kerekeng. Batswadi ba ka ba be ba nyaka gore nna le sesi re atlege bophelong. Ka gona ge sekolo se etšwa ba be ba ntumelela gore ke ye ke bapale goba ke ye ke šome ka gobane ke be ke phasa gabotse sekolong. Seo se ile sa dira gore ke be le mekgwa e mebotse go tloga ke sa le yo monyenyane.

 Ge ke be ke na le mengwaga e 17 ke ile ka thoma go ithutela karati. Ke be ke itlwaetša go bapala karati ka di iri tše tharo ka letšatši ga tshela mo bekeng, ka mengwaga e mentši. Beke e nngwe le e nngwe ke be ke fetša diiri tše dintši ke ithuta mekgwa e mengwe ya go bapala karati le go bogela dibidio tšeo di bego di tlo nthuša go kaonefatša tsela yeo ke bego ke bapala karati ka yona. Ke be ke kgahlwa ke ge ke bapala karati ke thibile mahlo ka lešela le ge ke be ke bapala ka disabola. Ke be ke kgona go pšatla mapolanka goba ditena ka letsogo le tee feela. Ke ile ka ba ka wina le dikhapo ge re le diphadišanong. Ke ile ka thoma go rata karati kudu go feta dilo ka moka.

 Ke be ke nagana gore ke atlegile bophelong. Ke ile ka phasa yunibesithi ka dimaraka tša godimo kudu. Ke ile ka šoma khamphaning e kgolo kudu ke le moentšineara wa dikhomphutha. Ke be ke ipshina ka tšhelete yeo ke bego ke e hwetša moo, ke na le ntlo e bile ke na le lekgarebe. Ke be ke bonagala e ka ke thabile, eupša ke be ke na le dipotšišo tše dintši bophelong.

 Gore ke hwetše dikarabo tša dipotšišo tšeo ke bego ke na le tšona, ke ile ka thoma go ya kerekeng gabedi ka beke gomme ka rapela Modimo gore a nthuše. Ka letšatši le lengwe ge ke be ke boledišana le mogwera wa ka, ke ile ka mmotšiša gore: “Na o kile wa ipotšiša gore ke ka baka la’ng re phela?” Karabo yeo ke ilego ka e hwetša e ile ya fetoša bophelo bjaka. “Go na le mathata a mantši e bile batho ba bantši ga se ba loka!” O ile a mpotša gore ka ge a be a ipotšiša dipotšišo tša go swana le tša ka, o hweditše dikarabo tša dipotšišo tše di kgotsofatšago ka Beibeleng. O ile a mpha puku yeo e rego O ka Phela ka mo go sa Felego Paradeiseng mo Lefaseng. a O ile a mpotša le gore o be a ithuta Beibele le Dihlatse tša Jehofa. Mathomong ke be ke dikadika go e bala ka gobane ke be ke nagana gore ke swanetše go bala dipuku tšeo di tšwago kerekeng ya rena feela. Eupša ka ge ke be ke nyaka go hwetša dikarabo tša dipotšišo tšeo ke bego ke na le tšona, ke ile ka e bala ka ge ke be ke nyaka go bona ge e ba Dihlatse tša Jehofa di ruta nnete.

 Ke ile ka makatšwa ke dilo tšeo ke bego ke ithuta tšona ka Beibeleng. Ke ithutile gore Modimo o bopile batho gore ba phele lefaseng la paradeise go ya go ile le gore o sa nyaka gore seo se direge. (Genesi 1:28) Le gona ke ile ka Makala gore ka Beibeleng ya King James go na le leina la Modimo e lego Jehofa leo ke bego ke dutše ke rapela ka lona thapelong ya Morena. (Psalme 83:18; Mateo 6:9) Mafelelong ke ile ka kwešiša gore ke ka baka la eng Modimo a dumelela batho gore ba tlaišege ka nakwana. Dilo ka moka tšeo ke bego ke ithuta tšona, di be di kwagala le gona ke ile ka Makala kudu.

 Nka se tsoge ke lebetše letšatši la mathomo ge ke thoma go ya dibokeng tša Dihlatse tša Jehofa. Batho ka moka ba be ba nthabetše e bile ba nyaka go tseba gore ke nna mang. Ka letšatši la ka la mathomo go be go newa polelo yeo e bolelago ka gore Modimo o kwa dithapelo tša mohuta mang. Polelo yeo e ile ya nkgahla ka gobane ke be ke dula ke rapela gore Modimo a nthuše. Ka morago ke ile ka ya segopotšong sa lehu la Jesu. Ke ile ka makala ge ke bona bana le bona ba bala Beibele. Ka nako yeo ke be ke sa tsebe gore mangwalo a kae ka Beibeleng, eupša Dihlatse tša Jehofa di ile tša nthuša gore ke kgone go a hwetša.

 Ge ke dutše ke eya dibokeng ke ile ka lemoga gore Dihlatse tša Jehofa di ruta nnete. Dibokeng tše dingwe le tše dingwe ke be ke ithuta dilo tše dintši, ke be ke ikwa ke kgothatšegile e bile ke lapologile. Ka morago hlatse ye nngwe e ile ya kgopela go ithuta Beibele le nna.

 Seo ke se bonego go Dihlatse tša Jehofa se be se fapana le seo ke se bonego se direga kerekeng yeo ke bego ke e tsena. Ke ile ka bona gore Dihlatse tša Jehofa di na le botee e bile di dira sohle seo di ka se kgonago gore di thabiše Modimo. Ke ile ka kgodišega gore ke Bakriste ba nnete ka gobane ba be ba ratana.—Johane 13:35.

 Nako le nako ge ke be ke ithuta Beibele ke be ke dira diphetogo ka gobane ke be ke nyaka go phela ka melao ya Modimo. Eupša ke be ke ipotša gore nka se tlogele karati. Ke be ke rata go itlwaetša le go tsenela diphadišano. Ge ke be ke botša Hlatse yeo e bego e nthuta Beibele ka taba ye, e ile ya nkgothatša ka gore: “Wena tšwela pele o ithuta Beibele e bile ke a tseba gore o tlo dira phetho e botse.” Ke be ke tloga ke nyaka go kwa mantšu a go swana le a. Ka mehla ge ke be ke ithuta, ke be ke leka ka thata gore ke thabiše Jehofa Modimo.

 Seo se ilego sa fetoša bophelo bja ka ke seo ke boletšego ka sona mathomong, ge ke be ke raga motho yo ke bego ke bapala le yena mo nkong ka phošo. Se se ile sa dira gore ke ipotšiše ge e ba nka kgona go ba molatedi wa Jesu Kriste ge e ba ke sa tšwela pele ke bapala karati. Ke ile ka ithuta go Jesaya 2:3, 4 gore bao ba nyakago go latela Jehofa ‘ba ka se sa hlwa ba ithuta ntwa.’ Le gona Jesu o ile a ruta ba bangwe gore ba se ke ba itefeletša ge ba sa swarwe gabotse. (Mateo 26:52) Ka gona ke ile ka tlogela papadi yeo ke bego ke e rata kudu.

Ka morago ga moo ke ile ka latela keletšo ya Beibele yeo e rego:  “O itlwaetše gomme pakane ya gago e be go bontšha boineelo go Modimo.” (1 Timotheo 4:7) Nako ka moka yeo ke bego ke e fetša ke bapala karati, gona bjale ke e fetša ke dira dilo tšeo di tlago go dira gore ke be le segwera se sebotse le Modimo. Ngwanenyana yoo ke bego ke dula le yena o be a sa dumelelane le seo ke bego ke ithuta sona ka Beibeleng ke moka ra napa ra kgaogana. Ke ile ka kolobetšwa gore ke be yo mongwe wa Dihlatse tša Jehofa ka di 24 tša January 1987. Ka moragonyana ga moo ke ile ka fetša nako ya ka e ntši ke ruta batho Beibele. Ke ile ka tšwela pele ke ruta batho Beibele go fihlela ke e ya go šoma ntlongkgolo ya Dihlatse tša Jehofa kua New York, U.S.A.

 Ka ge gona bjale ke tseba therešo ka Modimo, ke hweditše dikarabo tša dipotšišo tšeo ke bego ke ipotšiša tšona. Ga ke sa ikwa ke sena mohola. Go e na le moo ke a tseba gore Modimo o tlo re direla dilo tše dibotse nakong e tlago le gona ke thabile kudu. Ke sa itšhidulla ka mehla, eupša seo ga se tle pele bophelong bja ka. Selo sa bohlokwa kudu bophelong bja ka ke go hlankela Jehofa Modimo.

 Ge ke be ke sa bapala karati, ke be ke dula ke nagana gore ge motho a ka tla a nhlasela ke be ke tlo lwa le yena bjang. Le lehono ke dula ke le šedi gore ke bone gore nka thuša batho bjang. Beibele e nthušitše gore ke be monna yo mokaone le gore ke kgone go hlokomela mosadi wa ka Brenda

 Ke be ke rata go bapala karati. Eupša ke ile ka e tlogela ka ge ke be ke hweditše selo se bohlokwa go e feta. Beibele e hlalosa taba ye gabotse ge e re: “Gobane go tlwaetša mmele go hola ganyenyane; eupša boineelo go Modimo bo hola dilong tšohle, ka ge bo na le kholofetšo ya bophelo bja gona bjale le bja nakong e tlago.”—1 Timotheo 4:8.