Ke belegetšwe Uganda lefelong leo le bitšwago Gomba. Batho ba bantši ba moo ba be ba diila. Motse wa rena o be o se na mohlagase, ka gona bošego re be re diriša mabone ao a šomago ka makhura.

 Batswadi ba ka e be e le balemi, le gona ba be ba hudugile Rwanda ba ya go dula Uganda. Ba be ba bjala kofi le di banana, ke moka ba tšea di banana tšeo ba dira bjala bjo bo tumilego kudu bjo bo bitšwago waragi. Batswadi ba ka ba be ba ruile dikgogo, dipudi, dikolobe, le dikgomo. Tsela yeo ke godišitšwego ka yona le setšo sa ka, di ile tša dira gore ke tshepe gore mosadi o swanetše go theetša monna wa gagwe ka dinako ka moka e bile a se ke a bolela ka tsela yeo a ikwago ka yona.

 Ge ke be ke na le mengwaga e 23 ke ile ka hudugela Rwanda, moo nna le bagwera ba ka re bego re etela di-club. Ke be ke eya moo gantši mo e lego gore mong wa club o ile a mpha karata ya go tsena mahala. Ke be ke rata go bogela dimubi tša dintwa le bošoro. Dilo tšeo ka moka di dirile gore ke thome go rata bošoro le botagwa.

 Ka 2000 ke ile ka thoma go dula le kgarebe yeo e bitšwago Skolastique Kabagwira, gomme ka morago ra ba le bana ba bararo. Ka ge ke ithutile ge ke be ke sa le yo monyenyane, ke be ke letetše gore a khuname pele ga ka ge a ntumediša goba ge a nyaka go kgopela se sengwe. Dilo tšeo re bego re na le tšona ke be ke di lebelela e le tša ka feela e bile nka di diriša ka tsela e nngwe le e nngwe yeo ke bego ke nyaka ka yona. Gantši ke be ke etšwa bošego gomme ka boa ka 3 ya masa ke tagilwe. Ke be ke kokota mo lebating, gomme ge Skolastique a tšea nako gore a mpulele ke be ke mmetha.

 Ka nako yeo ke be ke le mookamedi wa khamphani ya sekhurithi, e bile ke gola gabotse. Ge ke le gae, Skolastique o be nyaka gore ke ye le yena kerekeng ya Pentecostal church, a nagana gore e tlo fetoša bophelo bja ka. Eupša ke be ke sa nyake go ya. Go e na le moo, ke ile ka thoma go ratana le mosadi yo mongwe. Ka baka la dilo tše mpe tšeo ke bego ke di dira, Skolastique o ile a tšea bana ba rena ba bararo gomme a ya le bona gagabo.

 Mogwera wa rena o mongwe yo a godilego o ile a boledišana le nna ka tsela yeo ke phelago ka yona. O ile a nkgothaletša gore ke boelane le Skolastique. O ile a mpotša gore bana ba ka ba be ba sa swanela gore ba dule ntle le tatago bona. Ka 2005 ke ile ka tlogela go nwa, ka tlogela mosadi yoo ke bego ke ratana le yena, gomme ka boela go Skolastique. Re ile ra nyalana ka 2006. Eupša ke be ke sa rata bošoro e bile ke tlaiša mosadi wa ka.

 Ka 2008, Joël e lego yo mongwe wa Dihlatse tša Jehofa o ile a re etela ka lapeng la rena ke moka ka theetša seo a bego a se bolela. O ile a re etela ka dikgwedi tše sego kae a na le Bonaventure e lego yo mongwe wa Dihlatse tša Jehofa ke moka ra thoma go boledišana ka Beibele. Ke be ke botšiša dipotšišo tše dintši kudukudu ka puku ya Kutollo. Ge e le gabotse ke be ke nyaka go ba bontšha gore ga ba bolele nnete. Ka mohlala ke ile ka ba botšiša gore ke ka baka la’ng ba re “lešaba le legolo” leo go bolelwago ka lona go Kutollo 7:9 le tlo phela mo lefaseng, mola temana ye e re “le eme pele ga sedulo sa bogoši le pele ga Kwana,” e lego Jesu Kriste. Joël o ile a araba dipotšišo tša ka a sa fele pelo. Ka mohlala o ile a mpontšha lengwalo la Jesaya 66:1 moo Modimo a bitšago lefase gore ke “bogato bja dinao” tša gagwe. Ka gona lešaba le legolo le eme mo lefaseng pele ga sedulo sa Modimo sa bogoši. Le gona ke ile ka bala Dipsalme 37:29, yeo e rego baloki ba tla dula mo lefaseng ka mo go sa felego.

 Mafelelong ke ile ka dumela go ithuta Beibele. Bonaventure o ile a ithuta le nna le Skolastique. Ge re dutše re ithuta ke ile ka thoma go dira diphetogo bophelong bja ka. Ke ile ka thoma go hlompha mosadi wa ka. Ke be ke se sa nyaka gore mosadi wa ka a khuname pele ga ka ge a nyaka go ntumediša goba ge a nyaka go kgopela selo se itšego, ka tlogela le go lebelela dilo tšeo re bego re na le tšona e le tša ka ke nnoši. Ke ile ka tlogela le go bogela dimubi tša dintwa le bošoro. Go be go le thata go tlogela dilo tše, ka gobane ke be ke swanetše go fetoša tsela yeo ke naganago ka yona e bile ke ithute go ba le boikokobetšo.

 Mengwaga e sego kae pejana, re be re išitše ngwana wa rena yo mogolo Christian kua Uganda, gore a ye a dule le ba leloko. Ka morago ga gore ke bale Doiteronomio 6:4-7, ke ile ka lemoga gore Modimo o re nna le mosadi wa ka ke rena re swanetšego go hlokomela bana ba rena le go ba ruta ka melao ya gagwe. Rena gotee le morwa wa rena re be re thabile ge a be a boa ka gae!

 Ke ithutile gore Jehofa ke Modimo yo a gaugelago e bile ke a tshepa gore o ntebaletše dilo tšeo ke bego ke di dira peleng. Ke thabela gore mosadi wa ka o ile a ba le nna ge re be re ithuta Beibele. Re ile ra ineela go Jehofa ke moka ra kolobetšwa re le gotee ka di 4 tša December 2010. Gona bjale re a tshepana e bile re thabela go diriša melao ya Beibele re le lapa. Mosadi wa ka o thaba kudu ka gobane ge ke tloga mošomong ke tla gae. Le gona o thabela le gore ke mo swara ka botho le ka tlhompho, ke tlogetše bjala e bile ga ke sa le monna yo mobe. Ka 2015, ke ile ka kgethwa gore ke be mogolo ka phuthegong. Re na le bana ba bahlano gomme ba bararo ba bona ba kolobeditšwe.

 Ge ke be ke ithuta Beibele le Dihlatse tša Jehofa, ga se ka no dumela seo ba nthutago sona ke se ka dira nyakišišo. Eupša ke be ke kgahlwa ke gore ba be ba diriša Beibele ge ba araba dipotšišo tša ka. Nna le Skolastique re ile ra bona gore motho yo a rego o hlankela Modimo wa therešo, o swanetše go diriša seo a ithutago sona. Ke leboga kudu gore Jehofa o ile a ntumelela gore ke be karolo ya lapa la gagwe. Ge ke nagana ka bophelo bja ka, ke a kgodišega gore Modimo a ka thuša motho yo mongwe le yo mongwe gore a dire diphetogo bophelong bja gagwe e bile a mo kgahliše.