IJIMA LOKUMEMELA ABANTU ESIKHUMBUZWENI
UJesu Uzokuqeda Izipi
Nakasephasini, uJesu bekabathanda khulu abantu begodu wanikela ngokuphila kwakhe ngebanga labo. (Matewu 20:28; Jwanisi 15:13) Msinyana, uzokutjengisa godu indlela abathanda ngayo abantu, ngokusebenzisa amandlakhe wokuba yiKosi yomBuso kaZimu bona ‘aqede izipi ephasini loke.’—IRhubo 46:9.
Tjheja bona iBhayibheli likuhlathulula njani okuzokwenziwa nguJesu:
“Uzokuhlangula abatlhagako abalilela isizo, kunye nabangasililitho nananyana ngubani onganamsizi. Uzokurhawukela abangasililitho nabatlhagako, uzokusindisa ukuphila kwabatlhagako. Uzobahlangula ekugandelelweni nenturhwini.”—IRhubo 72:12-14.
Singatjengisa njani bona siyamthokoza uJesu ngalokho asenzele khona nasazosenzela khona? KuLukasi 22:19, uJesu watjela abalandeli bakhe ukuthi bakhumbule ukufa kwakhe. Kungebangelo aboFakazi bakaJehova bahlangana qobe mnyaka, ngelanga uJesu ahlongakala ngalo. Siyakumema bona uzokuhlanganyela nathi ekukhumbuleni ukufa kwakaJesu ngoSondo, Matjhi 24, 2024.