Ngabelethwa bengakhuliselwa edorobheni leRome, endaweni enabantu abadobha phasi ngobunengi. Bengidosa emhlweni. Bengingalazi nebizo lakamma, begodu benginganatjhebiswano ehle nobaba. Ngafunda ukuziphilisa estradeni.

Ngathi nangineminyaka elitjhumi, besele ngithomile ukweba. Kwathi nangineminyaka eli-12, ngabaleka ekhaya kokuthoma. Bekuthi ezehlakalweni ezinengi, ubaba azongithatha eendaweni zamapholisa bese siya ekhaya. Benginghwaranghwarana nabantu khulu—nginenturhu bengikwatele nephasi loke. Kwathi nasele ngineminyaka eli-14, ngakhamba umtjhawutjhile ekhaya. Ngathoma ukudla iindakamizwa ngilala eentradeni. Njengombana benginganandawo yokulala, bengivele ngiphule ikoloyi ngilale kiyo ngivuke ngesamarimarima ngidle phasi. Nasele ngivukile bengifuna indawo enamanzi ngihlambe umzimbami.

Ngathuthuka khulu nakuziwa ekwebeni—bengikhona ukweba iinkhwama, ngingenela izindlu neendawo zamahotela ebusuku. Ngazakhela ibizo elimbi bekwathi esinye seenqhema zeengebengu esiyingozi khulu sangibawa bona ngisebenzisane naso, lokho kwanginikela “ithuba” lokuthuthukisa ubulelesi bami besele ngingena nemabhanga. Ngebanga lebizelo lami elimbelo, amalunga wesiqhema seengebengu athoma ukungihlonipha khulu. Koke la bengikhona bengiphatha isigidi sami; eqinisweni, bengisifaka ngaphasi komsamelwami. Ukuba nenturhu, ukudla iindakamizwa, ukweba, ukusebenzisa ilimi elimbi, nokuziphatha kumbi besele kuyindlelami yokuphila. Besele ngiphila njengomqasa ngebanga lokufunwa mapholisa. Ngavalelwa iinkhathi ezinengi khulu, begodu iminyaka eminengi bengingena ngiphuma ejele.

Kwathi kwesinye isehlakalo nangiphuma ejele, ngaqunta ukuyokuvakatjhela umani. Ngingazi bona umani nabomzala bami ababili besele baboFakazi bakaJehova. Bangibawa bona ngibaphekelele emhlanganweni waboFakazi. Ngaqunta ukukhamba nabo ngombana nami bengifuna ukwazi bona kunjani  esondweni labo. Kwathi nasifika eWolweni lomBuso, ngabawa ukuhlala eduze komnyango ukwenzela bona ngiqalisise bonyana bobani abenza ungena phuma la. Bengiphethe nesigidi sami.

Umhlangano loyo watjhentjha ukuphila kwami. Ngazibona ngasuthi ngikwenye iplanethi! Abantu bebangilotjhisa kamnandi, ngobuso obunobungani, nobuso obumomothekako. Ngisawukhumbula kuhle umusa, ukuthembeka engakubona kiboFakazi. Bengithoma ukubona ukumomotheka okufana nalokhu solo kwaba ngimi!

Ngathoma ukufunda iBhayibheli naboFakazi. Kwathi nangiragela phambili nokufunda, ngizwisisa nezinto egade bangifundisa zona, kulapho-ke ngabona khona bona kufuze ngitjhentjhe ukuphila kwami ngokupheleleko. Ngazindla ngamezwi atlolwe emtlolweni wezAga 13:20: “Okhambisana nabahlakaniphileko naye uyahlakanipha, kodwana odlhemadlhema neendlhadlha uyahlupheka.” Ngabona lapho-ke ukuthi kufuze ngithome ukudlalela kude neenqhema zeengebengu. Kodwana ukwenza lokho bekungasilula, okuhle kukuthi uJehova waba lisizo khulu kimi, ngaphumelela.

Ngahlwengisa nendlela egade ngiqaleka ngayo. Ngalisa ukubhema igwayi neendakamizwa, kodwana ukwenza lokho bekutlhoga umzamo omkhulu. Ngakera iinhluthu zami, ngalahla amacici, begodu ngalisa nokusebenzisa ilimi elimbi. Kukokuthoma ekuphileni kwami ngikhona ukulawula indlela engenza ngayo izinto.

Nakuyincwadi yona beyingasimnganami, ngalokho bekuba sitjhijilo khulu ukulungiselela isifundo seBhayibheli. Namtjhana kunjalo, bengenza umzamo, ngathoma ukuthanda uJehova, ngazizwa ngitjhentjha ngokusuka ehliziyweni—isazela sami sathoma ukuthinteka khulu. Kanengi bengiba namazizo amambi, ngizaza bona uJehova angangilibalela kizo zoke izinto ezimbi engizenzileko. Bekuthi nakufika amazizo anjalo ngifumane ukutjhiriyeka nangifunda ngoJehova nakalibalela iKosi uDavida ngemva kobana yenze isono esimbi khulu.—2 Samyela 11:1–12:13.

Esinye isitjhijilo bekukuhlanganyela ikholo lami nabanye emsebenzini wokutjhumayela umuzi nomuzi. (Matewu 28:19, 20) Benginevalo lokobana ngizokuhlangana nomuntu okungenzeka ngamlimaza namkha ngamphatha kumbi ngenye indlela! Kodwana kancani kancani ivalwelo laphela. Ngathoma ukuthabela ukwaneliseka ekusizeni abanye bafunde ngoBaba wezulwini owenza imisebenzi emihle khulu, olibalela kwamambala.

Ukufunda ngoJehova kwasindisa ukuphila kwami! Inengi labantu egade ngitjhomene nabo bahlongakele namkha basemajele, kodwana mina nginepilo eyanelisa kwamambala nengomuso engiqale phambili kilo. Ngifunde ukuthobeka nokulalela nokulawula amazizwami wokuba nenturhu. Umphumela engiwuthabelako nje, kukuba nobungani obuhle nabantu engikunye nabo. Ngitjhade nomkami omuhle, uCarmen. Sobabili sithabela ukufumana ithabo elikhulu lokusiza abanye bafunde iBhayibheli.

Nje, sengithabela ukwenza umsebenzi wokuthembeka—ngezinye iinkhathi nawo usabandakanya ukuvakatjhela amabhanga, kodwana angisangeni ngokweba, ngingena ngokuwahlwengisa.