Sifunda NgoZimu Ebaphorofidini Bakhe
Esikhathini esidlulileko, uZimu wanikela abaphorofidi bakhe imilayezo eqakathekileko eya ebantwini. Imilayezo le ingasitjengisa na ukuthi singasifumana njani isibusiso esivela kuZimu? Iye. Akhesibone ukuthi singafundani ebaphorofidini abathathu abathembekileko.
U-ABRAHAMA
UZimu akakhethi begodu ufuna ukubusisa woke umuntu.
UZimu wathembisa umphorofidi u-Abrahama ukuthi ‘zoke iinkoro zephasi zizokubusiswa ngaye.’—Genesisi 12:3.
Sifundani? UZimu usithanda khulu begodu ufuna ukubusisa zoke iinkoro amadoda, abafazi nabantwana abamlalelako.
UMOSI
UZimu unesirhawu begodu ubusisa labo abalwela ukumazi.
UMninimandla woke wanikela umphorofidi uMosi amandla wokwenza iimangaliso ezikulu. Nje-ke uMosi wathandaza wathi: “USomnini akangikhombise iindlela zakhe, ngalokho ngizamazi bengiqiniseke bonyana uSomnini unami.” (Eksodusi 33:13) UZimu wasithanda isibawo sakaMosi begodu wambusisa ngelwazi elingeziweko nokuzwisisa iindlela zakhe nobuntu bakhe. Ngokwesibonelo, uMosi wafunda ukuthi uMdalethu “unguZimu onomusa nesirhawu.”—Eksodusi 34:6, 7.
Sifundani? UZimu ufuna ukusibusisa soke amadoda, abafazi nabantwana nasilwela ukumazi kuhle. EmiTlolweni eCwengileko usitjengisa indlela yokumlotjha nokuthi uzimisele ukusinikela umusakhe nokusibusisa.
UJESU
UJesu ngokuba nesirhawu walapha yoke imihlobo yokugula
Singathabela iimbusiso zakaZimu ezingapheliko nasifunda ngoJesu nangalokho akufundisako nakwenzako.
IliZwi lakaZimu linemininingwana eminengi malungana nokuphila kwakhe neemfundiso zakhe. UZimu wanikela uJesu amandla wokwenza iimangaliso ezinengi, njengokulapha abangaboniko, abangezwako nabaziinrhole. Wavusa ngitjho nabahlongakeleko. UJesu watjengisa iimbusiso uZimu azozilethela abantu esikhathini esizako. Wahlathulula indlela umuntu ngamunye angathabela ngayo iimbusiswezo: “Lokhu kutjho ukuphila okungapheliko, bona bakwazi wena, okunguwe wedwa uZimu weqiniso naloyo omthumileko, uJesu Krestu.”—Jwanisi 17:3.
UJesu bekanesirhawu, isineke nomusa. Amadoda nabafazi, abadala nabancani bamlandela nabezwa isimemo sakhe esithi: “Nifunde kimi, ngombana nginommoya ophasi nehliziyo ethobekileko, nizozifumanela ukuphumula.” (Matewu 11:29) UJesu bekangafani nabanye bangesikhathi sakhe ebebaphatha kumbi abafazi, yena bekabaphatha ngomusa, ngesithunzi nangehlonipho.
Sifundani? UJesu watjengisa ukuthi ubathanda khulu abantu, wasibekela nesibonelo sokuthi kufuze siphathane njani.
UJESU AKASINGUZIMU
ImiTlolo eCwengileko ifundisa ukuthi “kithi kunoZimu munye” nokuthi uJesu Krestu bekasithunywa sakaZimu esithobekileko. (1 Korinte 8:6) UJesu ukubeke emtarini ukuthi uZimu mkhulu kunaye nokuthi uZimu nguye owamthumela ephasini.—Jwanisi 11:41, 42; 14:28. *
^ isig. 17 Bona ufunde okungeziweko ngoJesu Krestu, qala ingcenye 8 no-9 yencwajana ethi Real Faith—Your Key to a Happy Life efumaneka ku-www.pr418.com.
