OKUBUZWA BABANTU ABATJHA
Ngingakubalekela Njani Ukucabanga Ngezinto Ezidanisako?
Uziqala njani?
Ukuba nethemba
“Ngilinga ngazo zoke iindlela bona ngihlale ngithabile ngingakwati. Kubayini ngingalingi ukuthaba nokumomotheka qobe langa?”—U-Valerie.
Ukuzaza
“Qobe nakwenzeka okuthileko okuhle, msinyana ingqondwami ingitjela ukuthi akusiliqiniso.”—U-Rebecca.
Ukukholelwa kokungikho
“Nangimumuntu ohlala anethemba ngizokuzwa ubuhlungu lokha izinto zingakhambi kuhle begodu nangimumuntu ohlala azaza ngizokuhlala ngingakathabi. Ukukholelwa kokungikho kungisiza ngikghone ukubona izinto ngendlela ezingayo.”—U-Anna.
Kubayini kuqakathekile lokho?
IBhayibheli lithi “onehliziyo ethabileko uhlala anomnyanya.” (IzAga 15:15) Kwamambala, abantu ababalekela ukucabanga izinto ezidanisako ngaso soke isikhathi, balinge ukubona izinto ezihle ekuphileni nakwabanye abantu, bayathaba. Kanengi bayakghona ukwenza abangani abanengi. Umuntu nakahlala adanile bambalwa abantu abazokufuna ukuba naye.
Ngitjho nanyana umumuntu ohlala anethemba, kusesenezinto ezibuhlungu ekuphileni ezenzekako okusafuze uqalane nazo. Ngokwesibonelo:
Eendabeni uhlala uzwa ngemibiko yezipi, ubuphekula nobulelesi.
Kungenzeka kufuze uqalane nemiraro yemndenini.
Kungenzeka nawe kusafuze ulwisane nokuba nesono kwakho.
Kungenzeka umnganakho ukuzwise ubuhlungu.
Kunokobana ungayinaki imiraro le namkha utshwenyeke khulu ngayo, linga ukuyiqala ngendlela engayo. Ukuqala imiraro le ngendlela engayo kuzokusiza ubalekele ukucabanga izinto ezidanisako wamukele ukuphila njengombana kunjalo ngaphandle kokugandelelwa ngiyo.
Ungaqalana nobudisi bokuphila, uqiniseke ukuthi koke kuzokudlula ngokukhamba kwesikhathi
Ongakwenza
Qala imitjhaphwakho ngendlela engayo.
IBhayibheli lithi: “Akekho umuntu olungileko ephasini ohlala enza okuhle begodu angoni.” (UMtjhumayeli 7:20) Ngebanga lokuthi unemitjhapho, lokho kutjengisa ukuthi umumuntu kodwana ingasi umuntu obhalelwako.
Ungakghona njani ukubona izinto ngendlela ezingayo: Linga ukuthuthukisa kodwana khumbula ukuthi umumuntu onesono. Isokana okuthiwa ngu-Caleb lithi: “Ngilwisana nokungadzimeleli khulu emitjhaphwenami. Kunalokho ngilinga ukufunda kiyo, ngibone iindlela engingathuthukisa ngazo.”
Balekela ukuzimadanisa.
IBhayibheli lithi: “Asingaziphakamisi, sivuse ukuphalisana, simonakalelane.” (Galatiya 5:26) Ukuqala iinthombe ezifakwe kwezokuthintana zeminyanya ongakhenge umenywe kiyo, kungakwenza uzwe ubuhlungu. Kungenza abangani bakho abakhulu babonakale bamanabakho.
Ungakghona njani ukubona izinto ngendlela ezingayo: Yamukela ukuthi angekhe umenywe kiyo yoke iminyanya. Iinthombe ozibona kwezokuthintana azitjengisi woke amaqiniso. Umuntu omutjha okuthiwa ngu-Alexis uthi, “Kanengi kwezokuthintana abantu batjengisa kwaphela iinkhathi ezimnandi ezenzeka ekuphileni kwabo. Abazivezi ezingathabisiko.”
Yiba mumenzi wokuthula emndeninakho.
IBhayibheli lithi: “Nakukghonekako, ngokusemandlenenu, yibani nokuthula nabantu boke.” (Roma 12:18) Angekhe wakghona ukulawula izenzo zabanye kodwana ungakghona ukulawula indlela osabela ngayo. Ungakhetha ukuba nokuthula.
Ungakghona njani ukubona izinto ngendlela ezingayo: Zimisele ukungenzi imiraro esemndenini wekhenu ibe mikhulu kodwana yiba nokuthula njengombana kufuze kube njalo nawunabangani bakho. UMelinda uthi, “Akunamuntu onganamtjhapho, soke sizokugadangana ngezinye iinkhathi. Kufuze siqunte ukuthi sizokuba nokuthula namkha awa.”
Funda ukuthokoza.
IBhayibheli lithi: “Hlalani nithokoza.” (Kolose 3:15) Ukuba mumuntu othokozako kuzokusiza udzimelele ezintweni ezikhamba kuhle ekuphileni kwakho kunezingakhambi kuhle.
Ungakghona njani ukubona izinto ngendlela ezingayo: Vuma ukuthi unemiraro kodwana ungazeqiseli amehlo izinto ezihle ezenzekako ekuphileni kwakho. U-Rebecca uthi, “Qobe langa ngitlola into yinye ehle encwadinami. Ngifuna ukuzikhumbuza ukuthi nginezinto ezinengi ezihle engingacabanga ngazo.”
Cabanga ngabangani onabo.
IBhayibheli lithi: “Ukuzihlanganisa nabantu abambi konakalisa ukuziphatha okuhle.” (1 Korinte 15:33) Nangabe abantu ozihlanganisa nabo bathanda ukunyefula, ukutshimana namkha bayanghonghoyila, imikghwabo emimbi le ingakuthelela.
Ungakghona njani ukubona izinto ngendlela ezingayo: Abangani bakho nabaqalene nemiraro ebudisi bangaphatheka kabuhlungu bebagandeleleke kwesikhatjhana. Basize kodwana ungavumeli imirarwabo ikuthinte khulu. U-Michelle uthi, “Akukafuzi sihlale kwaphela nabantu abaqala izinto ngendlela embi.”
Funda okungeziweko ngayo
IBhayibheli lithi siphila ‘eenkhathini ezibudisi okubudisi ukuqalana nazo.’ (2 Thimothi 3:1) Kghani ukufumana kubudisi ukuba nombono omuhle ephasini elizele imiraro? Funda isihloko esithi, “Kubayini Kwenzeka Izinto Ezibuhlungu Kangaka Ephasini?”
