Fanau au i La Ceiba, Honduras, ko e tama fakamui he fanau tokolima, mo e ko au ni e tama taane. Ko au foki ni ne teliga tuli he magafaoa. Nofo au mo e magafaoa he matakavi ne lahi e mahani kelea mo e mativa foki a mautolu. Mogo ne fa e tau haaku, ne mua atu e kelea e tuaga ha mautolu he magaaho ne mate e matua taane he pakia he gahuaaga.

Lali fakalahi e matua fifine haaku ke leveki a mautolu, ka e lavea ke fai tupe mo fakatau e tau mena tui. Makalili au ka to e uha he nakai fai mena tui mafana.

He tupu hake au, ne fakaako au ke fakaaoga e Honduras Sign Language (LESHO), ke maeke ia au ke matutaki mo e falu ne teliga tuli. Ka e nakai iloa e matua fifine mo e tau mahakitaga haaku ke fakaaoga e LESHO, ti fiha ni e tau fakaaoga he tau matalima ha lautolu ke matutaki mo au. Pete ia, fakaalofa lahi e matua fifine haaku ki a au mo e puipui foki e ia au he tau mena kelea. Tote e iloaaga haana ke vagahau matalima, ka e hataki e ia au ke kalo kehe mo e tau aga kelea tuga e ula tapaka mo e fakaaoga hēhē e kava. Ko e fua ne moua kua fakaaue au he nakai fakaaoga e tau mena kona nei.

Magaaho ne tote au, uta he matua fifine au ke he Lotu Katolika, ka e nakai maama e au ha mena ha ko e nakai fai tagata ke fakaliliu ke he vagahau matalima. Logona e au e ahumate ti oti e fano tapu haaku he hogofulu e tau. Pete ia, ka e manako agaia au ke iloa e Atua.

He tau 1999, he 23 e tau haaku, feleveia au mo e tagata fifine ne hau i Amerika ne fano a ia he tapu evagelia. Ne fakaako e ia au ke he Tohi Tapu mo e American Sign Language (ASL). Fiafia lahi au ke he tau mena ne fakaako mai he Tohi Tapu, ti manako au ke eke mo akoako. Mole atu, ne hiki au ki Puerto Rico ke fano he aoga Kerisiano ne lata mo lautolu kua teliga tuli. He liu au ki La Ceiba he tau 2002, ne lagomatai he tau kapitiga haaku au ke fakatū e tapu ma lautolu ne teliga tuli. Taha he tau kapitiga nei, ko Patricia, ne mau e au.

Ko au e akoako he tapu ha mautolu, ne fakaaoga e au e LESHO ke lauga, fakakite e tau fakatino ke he tau tala Tohi Tapu, fakatātā e tau tala ke maama e lautolu ne teliga tuli. Fano foki au feleveia mo lautolu ne teliga tuli he tau taone ne tata mai ke fakamafana mo e lagomatai e tau lekua ha lautolu. Gahua misionare au ki Amerika mo Zambia. Ko e tala mooli, nakai iloa lahi e au e Tohi Tapu. Talaage e au kia lautolu e tau mena kua talamai ki a au, mo e haaku maamaaga he onoono ke he tau fakatino. Ka e loga atu e tau hūhū haaku ke he tau tali.

He taha aho, ko e falu he tapu haaku ne taute e tau tala pikopiko hagaao ki a au. Pehē a lautolu ko e tagata konahia a au mo e mahani faivao. Kua nakai fiafia mo e ita a au. Nakai leva ti toka e Patricia mo au e tapu.

Ahiahi mai e Tau Fakamoli a Iehova ki a Patricia mo au, ka e nakai talia e maua a lautolu. He toka e maua e tapu, ne talia e Patricia ke fakaako Tohi Tapu, mo e hoa mau ko e Tau Fakamoli ko Thomas mo Liccy. Nava au he iloa e laua ke vagahau matalima ka e nakai teliga tuli a laua. Nakai leva ti fakalataha au mo Patricia ke fakaako.

Ne fai mahina he fakaaoga e mautolu e tau vitiō ASL ke he fakaakoaga. Ka e tukupau he falu kapitiga ha maua na mumuitua e Tau Fakamoli a Iehova ke he tau tagata, ti fakaoti e fakaako Tohi Tapu ha maua. Pete ni he fakakite mai e Thomas ko e Tau Fakamoli a Iehova ne nakai mumuitua ke he tau takitakiaga he tagata, ka e nakai talitonu e au e tala haana.

He fai mahina ne mole, kua lauia a Patricia he gagao fakaatukehe lahi, ti liogi a ia ke he Atua ke liliu mai e Tau Fakamoli a Iehova ki a ia. Nakai leva, ko e taha katofia haana ko e Tau Fakamoli a Iehova, ne feleveia atu ki a Patricia mo e pehē to talaage e ia ki a Liccy ke hau ke aahi a ia. Ko e kapitiga mooli a Liccy. Fano a ia ki a Patricia he tau faahi tapu oti ke fakamafana mo e fakaako Tohi Tapu mo ia. Ka e fakauaua agaia au ke he Tau Fakamoli.

He tau 2012, ne fai fakaholoaga pauaki e Tau Fakamoli a Iehova ke foaki e vitiō LESHO Would You Like to Know the Truth? Tamai e Liccy e taha vitiō pihia ki a maua. He magaaho ne kitekite e au, ne ofo lahi au ke iloa ko e tau taofiaga ne fa fakaako e au tuga e afi tote mo e kua fai vala e tagata ne moui ka mole e mate, kua nakai fakaako mai he Tohi Tapu.

He tapu hake, ne fano au ke he Fale he Kautu he Tau Fakamoli a Iehova ke tutala ki a Thomas. Talaage e au ki a ia manako au ke fakaako e tala mooli mai he Tohi Tapu ke he tau tagata teliga tuli, ka e nakai eke au ko e taha he Tau Fakamoli a Iehova. Ko e manatu haaku ke fakatū e lotu foou ke lata mo e tau tagata teliga tuli ni. Nava mai a Thomas ke he manatu haaku ka e fakakite mai foki e ia a Efeso 4:5, kua lata ke kau fakalataha e fakapotopotoaga Kerisiano mooli.

Kua mai foki e Thomas e vitiō ASL Jehovah’s Witnesses​—Faith in Action, Part 1: Out of Darkness. Fakakite he vitiō nei e matakau he tau tagata taane ne kumikumi fakamitaki e Tohi Tapu ke maama e kupu mooli mo e tau fakaakoaga. He kitekite e au e vitiō, ne maama e au e tau logonaaga he tau tagata taane ia. Tuga a lautolu, ko e kumi au he kupu mooli. Ko e vitiō ia ne talitonu au kua fakaako he Tau Fakamoli e kupu mooli, he fakave e tau taofiaga ha lautolu ke he Tohi Tapu. Ti liu au fakaako Tohi Tapu, he tau 2014, mo e papatiso a maua ko e Tau Fakamoli a Iehova.

Fia loto au ke he fakapotopotoaga he Tau Fakamoli a Iehova he mahani meā, tuga e Atua ne meā. Ko lautolu ne tapuaki i ai ne meā e tau vagahau mo e tau gahua ma e falu. Ko e tau tagata mafola mo e featihake a lautolu. Kau fakalataha e tau Fakamoli mo e tatai oti e tau fakaakoaga ke he kupu mooli he Tohi Tapu, pete kua kehekehe e tau motu po ke tau vagahau ha lautolu.

Kua fiafia au ke he tau fakaakoaga mooli mai he Tohi Tapu. Ma e fakatai, ne fakaako e au ko Iehova ko e Atua Malolō Ue Atu mo e Pule Katoatoa he lalolagi. Fakaalofa a ia ki a lautolu ne teliga tuli mo lautolu ne logona. Tokiofa e au e fakaalofa he Atua ki a au. Fakaako foki au ko e lalolagi to eke mo parataiso fulufuluola, mo e amaamanakiaga fiafia ke moui tukulagi mo e malolō katoatoa. Amanaki lahi au ke hoko mai e aho ia!

Fiafia lahi au mo Patricia ke tutala ki a lautolu ne teliga tuli foki hagaao ke he Tohi Tapu. Fakaako Tohi Tapu a maua mogonei mo e falu he lotu tuai ha maua. Ka e nakai fai hūhū au mogonei ke he tau mena ne fakaako e au, nakai tuga he magaaho ne akoako au. Mogonei, kua moua e au e tau tali ke he tau hūhū haaku he fakaako Tohi Tapu mo e Tau Fakamoli a Iehova.