Nakai totoko e Tau Fakamoli a Iehova ke huki fakagata. Ko e huki nei ko e fifiliaga fakatagata ke taute he tau Kerisiano takitaha. Tokologa e Fakamoli a Iehova ne fifili ke huki.

 Kumi e mautolu e levekiaga fakaekekafo mitaki mo e loto fakaaue ke he loga e tau kumikumiaga fakasaiene fakaekekafo ke fakatote hifo e tau gagao hagahaga kelea. Fakaaue a mautolu ke he gahua lahi he tau pulotu ekekafo, mua atu ke he tau magaaho matematekelea.

 Kaufakalataha e Tau Fakamoli a Iehova mo e tau tagata gahua he faahi ekekafo. Ma e fakatai, tali mai he tupu e gagao COVID-19 kua matutaki e Tau Fakamoli ke tuku hake e tau fakamanatuaga he kupega hila ke he tau vagahau kehekehe he tomatoma ke he tau tagata ke omaoma ke he tau takitakiaga puipui malolō tino he motu. Putoia e aoga lahi he fakavehā mo e muitua ke he tau fakatonuaga he tau toloaga, nonofo kehe mai he tau tagata, holoholo e tau lima, mo e tui e mask ti pihia mo e falu puipuiaga foki kua latatonu po ke fakatoka mai he tau tui ne mua.​—Roma 13:1, 2.

 Totou tau tuai he fakamaama he tau tohi he Tau Fakamoli a Iehova e tau matapatu fakaakoaga nei:

•   Ko e tau fifiliaga ke he levekiaga he malolō tino ko e mena taute ni he tagata.​—Kalatia 6:5.

   “[Ko e mekasini nei] kua nakai nava ke he taha vai ekekafo po ke tuluiaga ka e fakaheu e falu mo e kua nakai foaki ai e fakatonuaga fakaekekafo. Ko e foliaga ke fakakite e tau valatala kua mooli ti toka ni ke he tagata totou ke taute e tau fifiliaga.”​—Awake!, Fepuari 8, 1987.

   “Ko e manatu kua lata a koe mo e fanau haau ke huki fakagata ko e fifiliaga ni haau.”​—Awake!, Aokuso 22, 1965.

•   Kumi e mautolu e tuluiaga fakaekekafo ha kua uho lahi e moui ki a mautolu.​—Gahua 17:28.

   “Moua mai he Tau Fakamoli e lagomataiaga he tau ekekafo ke lata mo e tau lekua malolō tino ha lautolu. Manako a lautolu ke momoui ti loto a lautolu ke taute e tau mena kua lata mo e mai he Tohi Tapu ke maeke ke leva e moui.”​—The Watchtower, Iulai 1, 1975.

   “Talia fiafia he Tau Fakamoli a Iehova e tau vai mo e tau tuluiaga fakaekekafo. Manako a lautolu ke fakatumau e tino malolō mo e leva e moui. Tuga ni e Kerisiano ko Luka he senetenari fakamua, ko e falu he Tau Fakamoli a Iehova ko e tau ekekafo. . . . Loto fakaaue mooli e Tau Fakamoli a Iehova ke he gahua lahi mahaki ha lautolu ne foaki e tau levekiaga fakaekekafo. Loto fakaaue foki ha ko e lahi e lagomatai ne foaki e lautolu ia ke totoka mai he gagao.​—The Watchtower, Fepuari 1, 2011.