Kua fifili he Atua e falu Kerisiano fakamooli, ka mamate a lautolu to liliu tu mai ke moui he lagi. (1 Peteru 1:3, 4) He mole e fifili, lata a lautolu ia ke fakatumau e tua mo e tau mahani Kerisiano ke moua e palepale ha lautolu he lagi.​—Efeso 5:5; Filipi 3:12-14.

Ko e heigoa e gahua ha lautolu ia ka ō ke he lagi?

 To fekafekau a lautolu fakalataha mo Iesu ko e tau patuiki mo e tau ekepoa ke 1,000 tau. (Fakakiteaga 5:9, 10; 20:6) To eke a lautolu mo “lagi fou,” po ke fakatufono i luga he lagi, ka pule ke he “lalolagi fou,” po ke tau tagata he lalolagi. Ko lautolu ia ka pule he lagi ka lagomatai ke liuaki e tau tagata he lalolagi ke he tau tuaga tututonu ne finagalo e Atua he kamataaga.​—Isaia 65:17; 2 Peteru 3:13.

Tokofiha ka fakaliu tu mai ke he lagi?

 Fakakite mai he Tohi Tapu ko e toko 144,000 ka fakaliu tu mai ke moui he lagi. (Fakakiteaga 7:4) He fakakiteaga ne fakamau he tohi Fakakiteaga 14:1-3, ne kitia he aposetolo ko Ioane “kua tu mai e Punua mamoe ke he mouga ko Siona, kua fakalataha foki mo ia e tau tagata ne teau e afe ti fagofulu ma fa e afe.” He fakakiteaga nei, ko e “Punua mamoe” kua hukui a Iesu ne fakaliu tu mai. (Ioane 1:29; 1 Peteru 1:19) Ko e “mouga ko Siona,” ne hukui e tuaga tokoluga ha Iesu mo e 144,000 ka pule fakalataha mo ia he lagi.​—Salamo 2:6; Heperu 12:22.

 Ko lautolu “kua uiina, mo e fifili” ke pule mo e Keriso he Kautu kua fakahigoa ko e “fuifui mamoe gahoa.” (Fakakiteaga 17:14; Luka 12:32) Fakakite he mena nei to gahoa a lautolu ia ka fakatatai ke he numera katoa he tau mamoe ha Iesu.​—Ioane 10:16.

Tau tala nakai mooli ki a lautolu ka ō ke he lagi

 Tala nakai mooli: Ko e numera 144,000 ne totoku he Fakakiteaga ko e numera fakatai, nakai ko e numera mooli.

 Tala mooli: Pete kua ha ha e tau numera fakatai he Fakakiteaga, ko e falu numera ne fakaaoga ko e tau numera mooli. Ma e fakatai, ne tutala ke he “tau higoa he tau aposetolo tokohogofulu ma ua he Punua mamoe.” (Fakakiteaga 21:14) Manamanatu ke he fakamooliaga ko e numera 144,000 ko e numera mooli.

 Fakamau he Fakakiteaga 7:4 ko e “totouaga ha lautolu ne fakamau fakamailoga [po ke mavehe ke momoui he lagi]; ko e taha teau e afe, ti fagofulu ma fa e afe.” Ko e kakano he kupu nei, kua fai veveheaga ke uaaki: “ko e moto tagata tokologa, kua nakai maeke ia taha ke totou.” Ko lautolu he “moto tagata tokologa” kua moua foki e fakamouiaga mai he Atua. (Fakakiteaga 7:9, 10) Kaeke ko e numera fakatai e 144,000, ti fakahigoa ai ko e matakau tokologa, to nakai kitia e kehekehe he tau matakau ua nei. a

 Lafi ki ai, kua fakamaama ko e 144,000 “ne fakafua mai he tau tagata, ko e tau fua uluaki.” (Fakakiteaga 14:4) Ko e talahauaga “tau fua uluaki” ne hagaao ke he gahoa ne fifili. Kua felauaki e fakamaamaaga mo lautolu ka pule mai he lagi mo e Keriso ke he tau tagata ne nakai maeke ke totou he lalolagi.​—Fakakiteaga 5:10.