Ko e Ha ne Liogi Puhala he Higoa a Iesu?
Ko e tali he Tohi Tapu
Lata a tautolu ke liogi ke he Atua he higoa a Iesu ha ko e puhala hokoia anei ne talia he Atua ma tautolu ke liogi ki a Ia. Pehē a Iesu: “Ko au nai ko e puhala, mo e kupu moli, mo e moui; nakai hau taha ke he Matua, ka noa mo au.” (Ioane 14:6) Tala age foki a Iesu ke he tau aposetolo fakamooli haana: “Ko e moli, ko e moli, ke tala atu e au kia mutolu, ko e tau mena oti ke ole atu ai a mutolu ke he Matua ha ko e haku a higoa, to foaki mai e ia kia mutolu.”—Ioane 16:23.
Tau kakano foki ke liogi puhala he higoa a Iesu
Fakaheke e tautolu a Iesu mo e haana Matua ko Iehova, ko e Atua.—Filipi 2:9-11.
Fakakite e tautolu e loto fakaaue ke he mate ha Iesu ko e foakiaga he Atua ma e fakamouiaga ha tautolu.—Mataio 20:28; Gahua 4:12.
Mailoga e tautolu e matagahua mua ue atu ha Iesu ko e Hulalo ma e Atua mo e tau tagata.—Heperu 7:25.
Fakalilifu e tautolu e matagahua ha Iesu ko e Ekepoa ne Mua ka lagomatai a tautolu ke moua e tuaga mitaki mo e Atua.—Heperu 4:14-16.