He falu magaaho, to fehagai e fanau haau mo e kaumahala po ke tupetupe. Lagomatai fēfē e koe a lautolu ke kautū?

•  Ko e heigoa ne kua lata ke iloa e koe

•  Ko e heigoa haau ka taute

Ko e kaumahala ko e vala he moui. Talahau he Tohi Tapu “kua hehe ai a tautolu oti.” (Iakopo 3:2) Hehē foki e fanau. Pete ia, ko e mena mitaki ke tupetupe​—ha kua lagomatai e fanau ke kautū ka fehagai mo e tau mena uka. Nakai fanau e tau tama mo e aga nei, ka e fakaako a lautolu ki ai. “Ko e taane haaku mo au ne kitia kua mitaki ke fakaako e fanau ka kaumahala ka e nakai fakatupua ko e nakai fai mena ne tupu,” he talahau he matua fifine ko Laura. “Maeke a lautolu ke fakauka ka nakai moua e mena ne amanaki ki ai.”

Tokologa e fanau ne nakai fiafia ka kaumahala. Ko e falu fanau kua nakai fakaako ke fehagai mo e kaumahala, ha kua talaage he tau mamatua ki a lautolu kua nakai fai mena hepe ne taute e lautolu. Ma e fakatai, ka nakai mitaki e tau gahua aoga he tama, ko e falu matua ne mafiti ke tukupau e faiaoga. Ka taufetoko e tama mo e kapitiga haana, kua tukupau he tau matua haana e kapitiga.

Ka pihia, to maeke fēfē he fanau ke fakaako mo e mailoga ko ia ne hepe, ti kua lata ke taute e mafola ka puipui tumau he tau matua e tau lekua oti ha lautolu?

• Fakaako e fanau haau to fai fua ma e tau gahua ne taute e lautolu.

  Talahau he Tohi Tapu: “Ko e mena kua gana he tagata, ko e mena ia ni ke helehele mai ai e ia.”​—Kalatia 6:7.

  Ko e tau mena oti ne taute e tautolu to fai fua. Fai totogi ka fakamalona e taha mena. Ka taute e tau mena hepe to moua e tau fua kelea. Kua lata e fanau ke iloa e matapatu fakaakoaga ko e tau mena oti ne taute e tautolu to fai mena ka tupu, ti putoia foki a lautolu. He pihia, kalo mai he tukupau e falu ke he tau mena hepe ne taute he fanau haau. Ka e lata ke fakamaama ki a lautolu e fakahala ne kua latatonu mo lautolu takitokotaha. Ti kua lata foki he tama ke iloa maali ko e tau gahua hepe haana ne taute ati fakahala ai.

• Lagomatai e fanau haau ke kumi e tau tali.

  Matapatu fakaakoaga he Tohi Tapu: “Ha ko e lagafitu he veli e tagata tututonu, ka e liu tu a ia.”​—Tau Fakatai 24:16.

  Fakaatukehe ka nakai kautū, ka e nakai ko e mena kelea lahi a ia kua tupu. Lagomatai e fanau ke manamanatu ke he puhala ke kautū he magaaho i mua, ka e nakai fakaatukehe ha ko e mena ne tupu he mogonei. Ma e fakatai, ka nakai kautū e tama taane haau he kamatamata he aoga, lagomatai a ia ke fakaholo ki mua e fakaakoaga ke lata mo e magaaho i mua. (Tau Fakatai 20:4) Ka taufetoko e tama fifine haau mo e kapitiga, lagomatai a ia ke fakamolemole ke he mena ne tupu pete ni nakai ko ia ne hepe.​—Roma 12:18; 2 Timoteo 2:24.

• Fakaako e fanau haau ke mahani fakatokolalo.

  Matapatu fakaakoaga he Tohi Tapu: “Ha ko e mena tala atu e au kia mutolu oti . . . aua neke homo e manatu he taha ke he mena kua lata ke manatu ai.”​—Roma 12:3.

  Ka talaage e koe ke he tama taane po ke tama fifine haau kua “mahomo atu” a ia ke he falu, nakai ko e mena mooli po ke lagomatai ki a ia ka pihia. Pete ni ko e falu fanau ne pulotu he aoga, ka e nakai mua tumau he tau kamatamata. Mo e fanau ne makaukau he pelē sipote ne nakai mua tumau a lautolu. Ko e fanau ne mahani fakatokolalo kua iloilo ke fahia ke he tau kaumahala po ke tau tupetupe.

  Talahau mai he Tohi Tapu ko e kamatamata ka fakamalolō mo e lagomatai a tautolu ke fakauka. (Iakopo 1:2-4) Pete ko e tau kaumahala mo e tau tupetupe ka fakalolelole, maeke a koe ke lagomatai e fanau ke ua fakalolelole ha ko e tau mena nei.

  Ko e fakaakoaga ma e fanau ke fakauka​—tuga e fakaako he puhala foou​—to fai magaaho mo e gahua. Ka e fai fua mitaki ka moua he fakaako a lautolu he magaaho ne ikiiki ti hoko ke he vahā fuata ha lautolu. “Ko e tau fuata mui ne fakaako ke fahia ke he tau mena tutupu, to nakai fakalolelole a lautolu,” talahau he tohi Letting Go With Love and Confidence. “To kautū a lautolu ke he tau tutūaga foou mo e nakai fa mahani ki ai.” Mooli ai, ko e aoga he fakauka to lagomatai a lautolu ka motua.

Manatu Aoga: Fakatoka e fakataiaga. Manatu e puhala ne fahia a koe he magaaho ne lolelole e moui ka lagomatai e fanau haau ke fahia mo e tau lolelole ha lautolu.