VALA 8
Ka Tupu Fakaofo e Tau Matematekelea
“Kua fiafia ai a mutolu, pete ni he fakatutuku a mutolu ke he na aho nai, (kaeke kua lata ai,) ke he tau mena kamatamata kehekehe.”—1 Peteru 1:6
Pete kua eketaha a mua ke fakatumau e fiafia he fakamauaga mo e magafaoa ha mua, ko e tau mena tutupu fakaofo kua uka ma mua ke fakatumau e fiafia ha mua. (Fakamatalaaga 9:11) Kua foaki fakaalofa he Atua e lagomataiaga ka fehagai a tautolu mo e tau mena uka. Ka fakagahua e mua e tau matapatu fakaakoaga he Tohi Tapu, to maeke a mua mo e magafaoa ha mua ke fahia, ti pihia foki he tau tutuaga uka lahi mahaki.
1 FALANAKI KI A IEHOVA
PEHĒ E TOHI TAPU: “Kia tuku atu kia ia e tau mena oti kua fakaatukehe ai a mutolu, ha ko e mena kua manatu e ia a mutolu.” (1 Peteru 5:7) Manatu tumau ne nakai fakatupu he Atua e tau kamatamata ha mua. (Iakopo 1:13) He fakatata a mua ki a ia, to lagomatai e ia a mua ke he puhala kua mua e mitaki. (Isaia 41:10) “Kia fakatokanoa [liligi atu] e mutolu ha mutolu a tau loto ki mua hana.”—Salamo 62:8.
To moua foki e mua e mafanatia ka totou mo e kumikumi ke he Tohi Tapu he tau aho takitaha. Ko e fua, to iloa e mua e puhala ha Iehova ‘kua fakamafana mai a tautolu ke he ha tautolu a tau matematekelea oti.’ (2 Korinito 1:3, 4; Roma 15:4) Kua mavehe a ia ke foaki ki a mua “e monuina foki mai he Atua kua mua ue atu ke he tau mena oti kua manamanatu ki ai.”—Filipi 4:6, 7, 13.
KO E MENA HA MUA KA TAUTE:
-
Liogi ki a Iehova ma e lagomatai ke fakatotoka tumau e loto ha mua mo e manamanatu fakamitaki
-
Fakatutala ke he tau fifiliaga kua ha hā ia mua ti fifili e mena kua hagahaga mitaki ma mua
2 KIA LEVEKI A KOE MO E MAGAFAOA HAAU
PEHĒ E TOHI TAPU: “Ko e loto he tagata pulotu kua moua e ia e iloilo; ko e tau teliga foki he tagata iloilo kua kumi ia ke he iloilo.” (Tau Fakatai 18:15) Kia iloa e tau tutuaga katoa. Kumikumi ke iloa e tau manako he tau tagata oti he magafaoa. Tutala mo lautolu. Fanogonogo ki a lautolu.—Tau Fakatai 20:5.
Ka e kua ka mate e taha fakahele? Ua fuafuakelea ke fakakite e tau logonaaga haau. Manatu, ne “tagi” foki a Iesu. (Ioane 11:35; Fakamatalaaga 3:4) Kua aoga foki ke fai magaaho ke okioki mo e mohe. (Fakamatalaaga 4:6) To fakamukamuka ai ke fahia mo e tuaga fakaatukehe ia.
KO E MENA HA MUA KA TAUTE:
-
Ato fai mena tupu fakaofo, kia fakamahani ke matutaki mo e magafaoa haau. Ka tupu e tau lekua, to mauokafua a lautolu ke tutala mo koe
-
Tutala mo e falu ne liga kua feleveia mo e tuaga pihia
3 MOUA E LAGOMATAIAGA KUA LATA MO KOE
PEHĒ E TOHI TAPU: “Kua fakaalofa e kapitiga ke he tau aho oti kana; kua fanau foki e matakainaga ke lata ai mo e aho matematekelea.” (Tau Fakatai 17:17) Kua manako e tau kapitiga haau ke lagomatai a koe, ka e liga nakai iloa e lautolu e mena ke taute. Kia tala age ki a lautolu e mena kua manako mooli a koe ki ai. (Tau Fakatai 12:25) Pihia foki, kumi e lagomatai fakaagaaga mai ia lautolu kua maama e Tohi Tapu. Ko e fakatonuaga ka foaki e lautolu ki a koe mai he Tohi Tapu to lagomatai a koe.—Iakopo 5:14.
To moua e koe e lagomataiaga kua lata mo koe ka lafi tumau mo e tau tagata kua tua mooli ke he Atua mo e falanaki ke he tau maveheaga haana. To moua foki e koe e mafanatia lahi ka lagomatai e koe falu kua manako ma e fakamafanaaga. Fakamaama ki a lautolu e tua haau ki a Iehova mo e tau maveheaga haana. Kia gahua tumau he lagomatai e tau tagata kua matematekelea, mo e ua vevehe kehe e koe a koe mai ia lautolu kua fakaalofa mo e manamanatu ki a koe.—Tau Fakatai 18:1; 1 Korinito 15:58.
KO E MENA HA MUA KA TAUTE:
-
Tutala ke he kapitiga uho mo e fakaatā a ia ke lagomatai a koe
-
Tutala fakamooli ke he tau mena kua manako a koe ki ai