TAU VALA TALA I MUA | MAEKE A KOE KE MAAMA E TOHI TAPU
Ko e Ha kua Lata ke Maama e Tohi Tapu?
“Ko e Tohi Tapu ko e tohi mahuiga lahi he tau lotu. Ka ko e tohi motu kehe ti nakai lata ma e tau tagata Saina.”—LIN, SAINA.
“Nakai maama e au e tau tohi tapu he lotu Hinitu haaku. Ti maeke fēfē au ke maama e Tohi Tapu?”—AMIT, INITIA.
“Fakalilifu e au e Tohi Tapu ha ko e tohi tuai mo e logona e au ko e tohi mahuiga. Ka e nakai la kitia au he tohi ia.”—YUMIKO, SAPANI.
Tokologa e tagata he lalolagi katoa ne tokiofa e Tohi Tapu. Ka e liga iloa tote e lautolu hagaao ke he tau mena i loto he Tohi Tapu. Pihia e mena ne tupu ke he tau tagata tokologa ne nonofo i Asia, ka e pihia foki he loga e tau motu ne ha ha e Tohi Tapu.
Ka e liga hūhū a koe, ‘Ko e ha kua lata ia au ke manako ke maama e Tohi Tapu?’ Ke iloa e kakano he tohi fakatapu nei to lagomatai a koe ke taute e tau mena nei:
-
Moua e haohao mitaki mo e fiafia
-
Fehagai fakamitaki ke he tau lekua he magafaoa
-
Fahia ke he tau fakaatukehe
-
Atihake fakamitaki e tau fakafetuiaga kapitiga
-
Fakaaoga iloilo e tupe
Mailoga e tuaga ha Yoshiko i Sapani. Ne manamanatu a ia ko e heigoa i loto he Tohi Tapu ti fifili ke totou ai. Ko e heigoa e fua? “Lagomatai he Tohi Tapu au ke moua e kakano he moui mo e amaamanaki ma e anoiha,” he talahau e ia, ti lafi: “Nakai logona hifo e au e moui gatigati mogonei.” Ko Amit ne totoku he kamataaga, ne fifili a ia ke kumikumi ki loto he Tohi Tapu. “Ne ofo lahi au,” he ui e ia. “Haia he Tohi Tapu e tau vala tala aoga ma e tau tagata oti.”
Kua lauia lahi e tau momoui he tau miliona tagata ha ko e Tohi Tapu. Fēfē ke kumikumi ni e koe ki ai mo e kitia e aoga ma haau?
