Ne fanau mo e moui hake au he tau maaga tua ha Roma, he matakavi ne nonofo ai e tau tagata nakai monuina. Ne uka lahi e moui. Nakai iloa e au e matua fifine fanau haaku, ti nakai fakafetui mitaki au mo e matua taane haaku. Ne moui hake au he matakavi ne uka lahi e tau tuaga.

He hogofulu e tau moui haaku, kua fitā au he kamata ke kaihā. He 12 e tau, ne hola au he kaina, ko e mogo fakamua anei. Ne lagaloga e hau e matua taane haaku ke uta au ki kaina mai he fale leoleo. Ne taufetoko tumau au mo e tau tagata​—vale lahi mo e ita au ke he lalolagi katoa. He 14 e tau moui haaku, ne toka e au e kaina. Ne kamata au ke fakaaoga e tau tulaki mo e nofo he puhalatū. Ha kua nakai fai mena ke mohe ai, ne moumou e au taha motokā ti nofo i loto ato teitei aho. Ti kumi mogoia e au e vai ne tafe ke holoholo ai.

Ne iloilo lahi au he kaihā​—he hamuti he tau kato ke hoko ke he kaihā he tau kaina mo e falu fale ka pō. Kamata au ke talahaua kelea ti nakai leva ne uiina ke hū he kege ne mua e kelea, ti moua e au e “magaaho” ke holo hake ke kaihā e tau pege. Ha ko e aga vale haaku, ne nakai leva ti fakalilifu he tau tagata he kege au. Uta tumau e fana haaku ka fano; ti mohe foki mo e fana he lalo uluga haaku. Ne eke e favale, tau tulaki, kaihā, vagahau kelea, mo e mahani feuaki mo puhala moui haaku. Kumi tumau he tau leoleo au. Ne lagaloga e tapaki au, ti loga e tau ne tuku mo e fakatoka mai au he fale puipui.

He taha mogo ne fakatoka mai au he fale puipui, ne fifili au ke fano ke ahiahi e taha he tau anitī haaku. Nakai iloa e au, ko e anitī mo e tokoua e kasini haaku kua eke tuai mo Tau Fakamoli a Iehova. Ne uiina e lautolu au ke fina atu he feleveiaaga he Tau Fakamoli. He fia iloa, ne fifili au ke fano mo lautolu. He hohoko a mautolu ke he Fale he Kautu, ne fakamakamaka au ke nofo  he tapa gutuhala ke matakite au ke he tau tagata ne o atu mo e o mai. Ka ko e mena mooli, ne taha e fana haaku.

Ne hiki he feleveiaaga ia e moui haaku. Manamanatu au he mogoia kua liga ha ha au he palaneta kehe. Ne fakafeleveia mai e tau tagata ki a au mo e mafanatia mo e mamali fiafia. Manatu agaia e au e totonu mo e moolioli he tau fofoga he Tau Fakamoli. Kua mamao ligo mooli e mena nei ke he lalolagi ne fa mahani au ki ai!

Ne kamata au ke fakaako e Tohi Tapu mo e Tau Fakamoli. He lahi e mena haaku ne iloa, ne maama fakahaga e au kua lata au ke hiki katoatoa e puhala moui haaku. Ne muitua au ke he tau kupu ne fakamau he Tau Fakatai 13:20: “Ko ia kua feoaki mo e tau tagata iloilo, kua iloilo ni a ia; ka ko ia kua kapitiga mo e tau tagata goagoa, to matematekelea ai a ia.” Ne mailoga e au kua lata au ke fakamamao mai he kege. Nakai mukamuka ke taute e mena ia, ka kua lagomatai e Iehova ti kautū au.

Ne fakameā foki e au e tino haaku. He lali fakamalolō, ne oti e ula tapaka haaku mo e fakaaoga he tau tulaki. Ne hifi e au e ulu loloa haaku, tiaki e tau tifa haaku, mo e oti e vagahau kelea. Ko e magaaho fakamua laia he moui haaku, ne kamata au ke fakatotoka e tau gahua haaku.

Ko e mena nakai fiafia au ke totou mo e fakaako, ti uka lahi au ke manamanatu mo e hagaaki ke fakaako e Tohi Tapu. Ka e he eketaha au, ne hokotia au ke fakaalofa ki a Iehova, ti fai mena i loto haaku ne kamata ke hiki​—ne kamata e loto manamanatu haaku ke fakaleua au. Ne fa kelea e tau logonaaga haaku, he tuahā na maeke nakai a Iehova ke fakamagalo au ma e tau mena kelea oti haaku ne taute. He tau magaaho pihia ne mafanatia lahi au he totou hagaao ki a Iehova ne fakamagalo e Patuiki ko Tavita he taute e tau agahala kelea lahi.​—2 Samuela 11:1–12:13.

Taha paleko foki ko e fakailoa ke he falu e tua haaku he taute e fekafekauaga he taha fale ke he taha fale. (Mataio 28:19, 20) Ne matakutaku lahi au neke feleveia mo e taha tagata ne fakamamahi po ke fakalekua e au he vahā kua mole! Ka e fano fakahaga ti maeke au ke kautū ke he matakutaku haaku. Kamata au ke moua e fiafia mooli he lagomatai e falu ke fakaako hagaao ke he ha tautolu a Matua he lagi, ne fakamagalo fakalahi mai.

Ko e fakaako hagaao ki a Iehova ne fakahao e moui haaku! Laulahi he tau tagata ne lafi au ki ai fakamua kua mamate po ke haia he fale puipui, ka kua fiafia mooli e moui haaku mo e fai amaamanakiaga ma e anoiha. Ne fakaako au ke mahani molū mo e omaoma mo e ke tautaofi e aga vale haaku. Ko e fua, kua mitaki e tau fakafetuiaga haaku mo e tau tagata ne fakalataha mo au. Kua fiafia au he mau mo e hoana fulufuluola haaku ko Carmen. Kua fiafia tokoua a maua he lagomatai e falu ke fakaako hagaao ke he Tohi Tapu.

Ti kua taute au mogonei he gahua fakamooli​—falu magaaho kua putoia agaia e tau pege, ka e ke nakai kaihā, ka e fakameā e au!