KUA teitei kavi ke he lima e tau kua mole, ko Choong Keon mo Julie, ko e hoa mau ne 30 tumā e tau tau he moui ha laua mogonei ne fekafekau ko e tau paionia tumau i Sydney i Ausetalia. “Ne gahua vala magaaho a maua mo e momoui hagahaga mitaki,” he ui e Choong Keon. “He mena ne nonofo ai a maua, ne mitaki e matagi mo e mukamuka e puhala moui. Fiafia a maua he tata ke he magafaoa mo e tau kapitiga ha maua.” Ka e fakatauhele agaia e tau logonaaga ha Choong Keon mo Julie. Ko e ha? Iloa e laua kua maeke he tuaga ha laua ke lahi atu e mena ke taute he fekafekauaga ha Iehova, ka e fakauaua a laua ke taute e tau hikiaga kua lata.

Ka e he fonoaga he 2009, ne logona e laua e lauga ne aamotia ki a laua. Ne hagaao e tagata lauga ki a lautolu kua maeke ke fakalaulahi e fekafekauaga ha lautolu. Ui a ia: “Manamanatu ke he mena nei: Maeke he tagata fakaholo ke vivilo e motokā haana ke he faahi hema po ke faahi matau kaeke kua holo e motokā. Pihia foki, liga takitaki e Iesu a tautolu ke fakalaulahi e fekafekauaga ha tautolu kaeke ke gahua a tautolu​—he eketaha fakamalolō ke hokotia ke he foliaga ha tautolu.” a Logona hifo he hoa na tuga kua tutala fakahako e tagata lauga ki a laua. He fonoaga ia, ne hūhū tala ke he hoa misionare ne fekafekau i Taiwan. Tutala a laua ke he olioli he fekafekauaga ha laua ti peehi e lahi agaia he manako ke lagomatai. Liu foki a Choong Keon mo Julie logona hifo kua tuga na hagaao e tau kupu nei ki a laua ni.

“He mole e fonoaga ia,” he ui e Julie, “liogi a maua ki a Iehova ke foaki ki a maua e loto malolō ke taute e lakaaga ke hiki ki Taiwan.” Lafi e ia: “Ka e matakutaku a maua. Tuga kua logona hifo e maua ko e mogo fakamua laia ka hohopo a maua ke he faahi hokulo he loloto.” Ko e kupu tohi ne lagomatai a laua ke “hohopo” ko e Fakamatalaaga 11:4, ne pehē: “Ko ia kua manamanatu ke he matagi nakai gana saito e ia; ko ia foki kua kitekite ke he tau aolagi nakai ni helehele saito e ia.” Pehē a Choong Keon: “Ne fifili a maua ke nakai ‘manamanatu mo e kitekite’ ka e kamata ke ‘gana mo e helehele.’” Liogi a laua​—ti liogi foki​—totou e tau tala he tau misionare, ti feutaaki loga e tau meli hila mo lautolu ne fitā e hiki ki Taiwan, sela e tau motokā mo e tau koloa ha laua, ti o atu ki Taiwan tolu e mahina he mole.

Molea 100 e matakainaga mai he tau motu kehe hane fekafekau mogonei i Taiwan he tau matakavi ne manako lahi ke he tau tagata fakailoa he Kautu. Ne o mai a lautolu i Ausetalia, Peritania, Kanatā, Falani, Sapanī, Korea, Sepania, mo Amerika, ti ko e tau tau momoui mai he 21 ke he 73. Ia lautolu nā ne molea 50 e matakainaga fifine nonofo takitokotaha. Ko e heigoa kua lagomatai e tau matakainaga fakamakutu nei ke taute e fekafekauaga ha lautolu he motu kehe? O mai la ke kumikumi.

Ko Laura, ko e matakainaga fifine nofo tokotaha mai Kanatā, ne fekafekau ko e paionia he faahi lalo i Taiwan. Ka e kavi ke hogofulu e tau kua mole, nakai loto a ia ke he gahua fakamatala. Fakamaama e Laura, “Fano au he gahua he fonua ka e nakai loto lahi ki ai.” Ti ole mogoia e tau kapitiga haana i Kanatā ke ō mo lautolu ki Mesikō ke gahua fakamatala ke taha e mahina. “Mogo fakamua laia ne lahi e magaaho ne fakaaoga e au he gahua he fonua, ti ofo au ko e homo ha ia!”

Ko e mena tupu fiafia ia ne fakalagalaga a Laura ke manamanatu ke hiki ke he fakapotopotoaga vagahau kehe i Kanatā. Ne hū a ia he vahega vagahau Saina, fekafekau mo e matakau Saina, ti fakatoka e foliaga ke hiki ki Taiwan, ati fakahoko e foliaga haana ia Sepetema 2008. “Teitei taha e tau ato logona e au e haohao mitaki ke he matakavi foou haaku,” he ui e Laura, “ka ko e mogonei ai manamanatu au ke liu ki Kanatā.” Fēfē e logonaaga haana ke he gahua fakamatala? “Olioli ha ia,” he ui e ia. “Nakai fai mena ke fakatatai e fiafia he kitia e tau tagata fakaako Tohi Tapu ne hiki e tau momoui ha lautolu he iloa e lautolu a Iehova. Ko e fekafekau i Taiwan kua lagaloga e foaki ki a au e magaaho ke kamata e olioli hokulo ia.”

Ko Brian mo Michelle, ko e hoa ne 30 tumā e tau tau he moui, kavi ke valu e tau kua mole ne hiki mai i Amerika ki Taiwan. Mogo fakamua ne logona e laua kua nakai aoga lahi e gahua ha laua ke he fonua. Ka e tala age e misionare lotomatala ki a laua: “Pete  ka age e koe e tuleke ke he taha tagata, lata a koe ke manatu ko e magaaho fakamua laia kua moua e ia e fekau hagaao ki a Iehova. Ti kua fai vala aoga tuai a koe ke he gahua he fonua!” Ko e talahauaga atihake ia ne lagomatai lahi a Brian mo Michelle ke nakai fakalolelole. Tala age he taha matakainaga taane foki ki a laua: “Ke kalo mai he loto lolelole, fuafua e holo ki mua ha mua he fakaako e vagahau Saina, nakai he taha aho ke he taha aho, ka e mai he taha toloaga ke he taha toloaga.” Ti mooli, holo ki mua a laua ti kua eke mo tau paionia lauia mitaki mogonei.

Ko e heigoa ka liga fakalagalaga a koe ke fakaako e vagahau kehe? Lali ke ahiahi e motu ne manako a koe ke fekafekau i ai. Fano ke he tau feleveiaaga, feoaki mo e tau matakainaga he matakavi, mo e ō mo lautolu he gahua fakamatala. Pehē a Brian: “He mailoga e koe e tokologa ne talia fiafia e fekau he Kautu mo e logona e koe e fakaalofa mafanatia he tau matakainaga, to omoomoi a koe ke fehagai mo e tau paleko he fekafekau he motu kehe.”

Tokologa ne “manako ke foaki lagomatai” i Taiwan kua maeke ke lalago ne lautolu a lautolu ko e tau paionia he fakaako e falu ke vagahau Peritania. Ko Kristin mo Michelle ne sela mena kai tahi. Fakamaama e Kristin, “Nakaila taute au he mena ia fakamua, ka ko e puhala gahua nei kua lagomatai au ke maeke ke nofo he motu.” Fai magaaho, kua moua e Kristin e falu tagata ne o mai tumau ke fakatau. Lagomatai he gahua vala magaaho nei a ia ke lalago fakatupe a ia mo e hoana haana, ti fakaatā a laua ke lahi e magaaho ke fakaaoga he matagahua pauaki ha laua​—ko e gahua paionia, he takafaga ke he tau tagata.

Ko William mo Jennifer, ko e hoa mai i Amerika ne o mai ki Taiwan kavi ke he fitu e tau kua mole. “Ko e fakaako e vagahau, fekafekau ko e tau paionia, leveki he fakapotopotoaga, mo e leveki he falu matagahua fakatupe, kua mategūgū he falu mogo,” he ui e William. Ko e heigoa kua lagomatai a laua ke kautū mo e fiafia tumau? Lali a laua ke fakatoka e tau foliaga lagotatai. Tuga anei, he nakai fakatoka e tau foliaga lalahi he fakaako Saina, ne nakai molea e loto lolelole ha laua he mogo ne eto e holo ki mua.

Manatu e William ne tala age he leveki faifano ki a ia, “Mafola e fenoga, ti pihia mo e matakavi.” Taha puhala foki, he mole e fakatoka e foliaga fakaagaaga, lata ia tautolu ke olioli e tau lakaaga kua taute e tautolu ne takitaki ke fakamooli e foliaga. He fakagahua e fakatonuaga ia, ui e William, ne lagomatai a ia mo e hoana haana ke hikihiki, fanogonogo ke he tomatomaaga he tau matakainaga taane iloilo he fakapotopotoaga, mo e hiki e puhala taute mena ha laua ke kautū e fekafekauaga ha laua he motu foou. Lafi e ia, “Lagomatai foki a maua ke manatu ke fai magaaho ke olioli e tufugatia fulufuluola he aelani he kotofaaga ha maua.”

Tuga a William mo Jennifer, ko Megan, ko e matakainaga fifine paionia nofo tokotaha mai i Amerika, kua olioli e fekafekauaga haana he lali ke hokotia ke he foliaga haana ke iloilo lahi he vagahau Saina. He tau matahiku vahā tapu takitaha ne fakalataha a ia mo e matakau fakailoa ne fakamatala he matakavi fulufuluola​—he uaafo ha Kaohsiung ne mua atu e lahi i Taiwan. Maeke a Megan ke fakamatala e tala mitaki he taha toga ke he taha toga mo e fakamatala ke he tau tagata futi ika mai i Bangladesh, Initia, Indonesia, Filipaina, Thailand, mo Vanuatu. “Ha kua kū e magaaho ne haia e tau tagata futi ika he uaafo, kamata a mautolu ke fakaako e Tohi Tapu mo lautolu he mogoia ni. Ke hoko ki a lautolu oti, fa fakaako au mo e tokofā po ke tokolima e tagata he magaaho taha.” Ti kua fēfē e vagahau Saina haana mogonei? Pehē a ia, “Fia loto au ke fakaako mafiti,  ka e tokaloto e au e mena ne talahau he matakainaga taane ki a au he taha mogo, ‘Taute tau mena oti kua maeke ia koe, to leveki e Iehova e vala ne toe.’”

Ko Cathy, ne amanaki ke hiki kehe mai i Peritania, ne kumikumi a ia ke he kotofaaga he taha motu kua haohao mitaki ma e matakainaga fifine nofo tokotaha. Ne totoku e ia e tau manako haana he liogi ki a Iehova mo e tohitohi ke he falu la ofisa, he manako ke iloa hagaao ke he tau hagahaga kelea ma e tau matakainaga fifine nonofo takitokotaha. Mole ia, manamanatu fakahokulo a ia ke he tau tali he tau tohi haana ti fakahiku ko Taiwan e fifiliaga mitaki ma haana.

Ke he 2004, he 31 e tau he moui ne hiki a Cathy ki Taiwan, ti kua moui mukamuka lahi a ia. Matutaki e ia: “Hūhū au ke he tau matakainaga ke he tau matakavi mitaki ke fakatau e tau fua akau mo e tau lākau kai tau mukamuka. Ko e fakatonuaga mitaki ha lautolu ne lagomatai au ke leva e fakaaoga e tupe haaku.” Ko e heigoa ne lagomatai a ia ke fakatumau e moui mukamuka? Ui a Cathy: “Fa liogi au ki a Iehova ke lagomatai au ke fiafia ke he tau mena kai ne kai e au mo e tau mena tui nakai tauuka ne tui e au. Logona e au kua tali e Iehova e tau liogi haaku he fakaako au ke he tau mena ne latatonu mo au mo e lagomatai au ke nakai misi e tau manako haaku.” Lafi e ia: “Olioli e au e puhala moui mukamuka haaku ha kua lagomatai ai au ke hagaaki ke he tau manako fakaagaaga.”

Ko e moui ha Cathy kua mukamuka ti fiafia foki. Fakamaama e ia e kakano: “Maeke au ke fakamatala he matakavi ne tokologa e tagata ne talia e tala mitaki. Ko e olioli mooli a ia!” He hoko atu a ia ki Taiwan, ua e fakapotopotoaga Saina he taone ne kamata a ia ke fekafekau ko e paionia, ka e mogonei fitu la e fakapotopotoaga. Ui a Cathy: “Ke kitia mata e tupu ofoofogia mo e fai vala he gahua helehele kua taute e moui haaku ke he tau aho takitaha ke fiafia lahi!”

Ko e heigoa e fakahikuaga ma Choong Keon mo Julie ne totoku he kamataaga? Logona e Choong Keon he kamataaga kua nakai aoga lahi e vagahau Saina tote haana he fakapotopotoaga. Ka e nakai logona pihia e tau matakainaga taane he matakavi. “Mogo ne veveheua e fakapotopotoaga ha mautolu, kua loga foki e matagahua kua foaki ki a au ko e fekafekau lagomatai,” he ui e Choong Keon. “Mogo tonu ia, logona mooli e au kua fekafekau au he matakavi ne manako lahi ke he lagomatai. Ko e mitaki ha ia,” he ui e ia mo e mamali, “kua manako foki a lautolu ki a au!” Mogonei, fekafekau a ia mo motua. Lafi e Julie: “Logona hifo e maua e kautūaga, makona, mo e fiafia ne nakaila logona pihia e maua fakamua. O mai a maua ke lagomatai, ka e logona e maua kua lagomatai a maua ha ko e mena ofoofogia nei ne tupu. Fakaaue a maua ki a Iehova he fakaatā a maua ke fekafekau hinei!”

He tau motu loga, lahi agaia e manako ma e tau tagata gahua helehele fakaagaaga. Teitei oti kia e aoga haau ti manamanatu ko e heigoa haau ka taute he moui? Nofo tokotaha kia a koe mo e manako ke fakaaoga fakalahi he fakatokatokaaga ha Iehova? Manako kia a koe ke foaki ke he magafaoa haau e tufaaga fakaagaaga ne monuina? Kua litaea kia a koe ti loga e mena uho he moui ke tala age ke he falu? Maeke ia koe ke mauokafua ko e tau monuina loga ne tatali ki a koe ka fifili a koe ke fakalaulahi e fekafekauaga haau he gahua he matakavi ne manako lahi ke he tau tagata fakailoa he Kautu.