KAVI ke he hogofulu e tau kua mole, ko Gregorio mo Marilou, ko e hoa mau ne 30 tumā e tau tau, ne paionia i Manila mo e gahua tupe tumau foki. Nakai mukamuka ka e kautū a laua. Ne holo hake mogoia a Marilou ke takitaki e pege ne gahua ai a ia. “Ha kua mitaki e tau gahua ha maua ne maeke ai a maua ke tokotoko mitaki lahi e tau momoui,” he talahau e ia. Ti kua holo mitaki mooli e tuaga fakatupe ha laua ati fifili ai ke talaga e fale ne manako lahi a laua he matakavi ne mua e mitaki ne kavi 19 e kilomita ke he faahi uta ha Manila. Ne taute e laua e konotuleke mo e kamupanī ti fakatokatoka ke totogi e matagahua he tau mahina takitaha ke he hogofulu e tau.

Pehē a Marilou: “Ne lata au ke lahi e magaaho mo e malolō ma e gahua foou haaku ti tote fakahaga e manako haaku ke he tau gahua fakaagaaga. Logona hifo e au kua fofō e au a Iehova.” Ne fakamaama e Marilou: “Kua nakai maeke ia au ke foaki ki a Iehova e magaaho kua fakatoka e au ma e fekafekauaga haana.” Ha kua nakai fiafia ke he tuaga ia, ne nonofo a Gregorio mo Marilou he taha aho ke tutala hagaao ke he holoaga he tau momoui ha laua. Pehē a Gregorio: “Ne manako a maua ke hiki e tau momoui ka e nakai iloa tonu e mena ke taute. Ne tutala a maua ke he puhala kua maeke ia maua ke fakaaoga  fakalahi e tau momoui he fekafekauaga ha Iehova, mua atu ha kua nakai fai fanau a maua. Ne liogi a maua ki a Iehova ma e takitakiaga.”

He magahala ia, ne logona e laua falu lauga hagaao ke he fekafekau he matakavi ne manako lahi ma e tau tagata fakailoa he Kautu. “Ne logona hifo e maua ko e tau lauga nei ko e tali ha Iehova ke he tau liogi ha maua,” he talahau e Gregorio. Ne liogi a laua ke lahi atu e tua ke moua e malolō ke taute e tau fifiliaga hako. Taha he tau lekua lahi ko e fale ha laua fa e talaga. Kua fitā a laua he totogi e tupe ke he tolu e tau. Ko e heigoa ha laua ka taute? Pehē a Marilou: “Ka fakaoti e maua e konotuleke, to galo oti e tupe kua fitā he totogi e maua​​—ko e tupe lahi a ia. Ka e onoono a maua ki ai ko e fifiliaga ke tuku fakamua e finagalo ha Iehova po ke tau manako ha maua ni.” He tokaloto e tau kupu he aposetolo ko Paulo hagaao ke he tau mena “nakai aoga,” ne toka e laua e matagahua he fale, tiaki e tau gahua tupe, fakafua e laulahi he tau koloa, ti hiki atu ke he maaga mamao he aelani ko Palawan, kavi ke he 480 e kilomita he faahi toga ha Manila.​​—Filipi 3:8.

Ato hiki atu a Gregorio mo Marilou ne lali a laua ke tauteute ke lata ma e moui mukamuka, ka e nakai iloa e laua e tu tokolalo lahi e moui foou ha laua ato hohoko atu ki ai. “Ko e mena ofomate,” he talahau e Marilou. “Ai fai hila, ai fai mena ke fakamukamuka aki e moui. He nakai palaki he ulo tunu alaisi, ne tipi gaafi a maua mo e kaitunu he gutu afi. Ne fia fano au ke he tau fale koloa lalahi, fia fano ke kai he tau fale kai, mo e taute falu mena he moui he taone.” Ka kua fakatumau ni e hoa nei ke fakamanatu ki a laua e kakano ati hiki atu a laua, ti nakai leva kua mahani fakahaga a laua. Pehē a Marilou: “Kua fiafia au mogonei ke kitekite ke he fulufuluola he matakavi, putoia e tau fetu ne kikila ka pō. Mua atu, ko e fiafia ha ia ke kitia e fiafia he tau tagata ka fakamatala a maua ki ai. He fekafekau hinei, kua ako e maua e mena galo ke makona e moui.”​​—Filipi 4:12.

Pehē a Gregorio: “Mogo ne hohoko mai a maua, ne tokofā ni e Fakamoli. Ne fiafia lahi a lautolu he kamata au ke lauga he tau faahi tapu takitaha ke he toloaga mo e uhu e tau lologo he Kautu ke he kitā haaku.” He taha e tau, ne kitia he hoa nei e matakau tote kua eke mo fakapotopotoaga fiafia ne 24 e tagata fakailoa. Pehē a Gregorio: “Kua aamotia lahi a maua he fakaalofa mai he fakapotopotoaga nei ki a maua.” Mogonei he liu onoono ke he ono e tau kua mole he fekafekau ai ke he matakavi mamao ia, pehē a laua: “Nakai fai mena kua tatai mo e fiafia ne logona e maua he kitia e tupu fakaagaaga he fakapotopotoaga. Logona hifo e maua kua mua atu he mogonei e fai kakano mooli e tau momoui ha maua.”

I Filipaina, teitei 3,000 matakainaga ne hiki atu ke he tau matakavi ne lahi e manako ke he tau tagata fakailoa he Kautu. Kavi 500 ia lautolu ko e tau matakainaga fifine nonofo takitokotaha. Onoono la ke he fakafifitakiaga ha Karen.

Ko Karen, ko ia mogonei kua 20 tumā e tau, ne moui hake i Baggao, Cagayan. He fuata mui, ne fa manamanatu a ia ke fakalaulahi e fekafekauaga haana. Talahau e ia: “He iloa kua tote e magaaho ne toe mo e kua lata e tau tagata tokologa ke logona e fekau he Kautu, ne manako au ke fekafekau he matakavi ne lahi e manako ke he tau tagata fakamatala.” Pete kua omoomoi he falu he magafaoa haana a ia ke tutuli e fakaakoaga tokoluga ka e ua hiki atu ke he taha matakavi mamao ke fakamatala, ne liogi a Karen ki a Iehova ma e takitakiaga. Ne tutala foki a ia ke he tau matakainaga ne fekafekau he tau matakavi mamao. He 18 e tau, ne hiki atu a ia ke he matakavi ne kavi 64 e kilomita he mamao mo e taone ne nofo a ia.

Ko e fakapotopotoaga tote ne fina atu a Karen ke lagomatai kua leveki e tau atu mouga he Pacific Coast. Ne manatu e Karen: “Ke o atu i Baggao ke he fakapotopotoaga foou, ne o atu hui a mautolu ke he tolu e aho, he o hake mo e o hifo he tau mouga mo e laga 30 e o atu he vailele.” Lafi e ia: “Ke hoko ke he falu fakaako Tohi Tapu, ne fina atu hui au ke he ono e tulā, mohe he kaina he tagata fakaako, ti liu mogoia fina atu hui ki kaina ke ono foki e tulā.” Aoga nakai e tau laliaga ia? “Falu magaaho ne mamahi e tau hui haaku, ka e,” lafi e Karen mo e mamali lahi, “ne taute e au 18 e fakaako Tohi Tapu. Kua ‘kamata e au mo e kitekite kua mitaki a Iehova’!”​​—Sala. 34:8.

Ko e heigoa ne omoomoi a Sukhi, ko e matakainaga fifine nofo tokotaha ne 40 tumā e tau ne nofo he Tau Faahi Kaufakalataha, ke hiki atu ki Filipaina? He 2011 ne fina atu a ia ke he toloaga takaiaga ne hūhū tala i ai ke he hoa mau. Ne talahau e laua kua fakafua e laua e laulahi he tau koloa ha laua ti hiki atu ki Mesikō ke lagomatai ke he gahua fakamatala i ai. “Ko e hūhū tala ia,” he talahau e Sukhi, “ati manamanatu au ke he tau foliaga haaku ha kua nakai manatu pihia he mogo fakamua.” He mogo ne iloa e Sukhi, ko ia ko e fifine Initia, kua manako lahi ke he lagomatai ke hoko ke he tau tagata Punjabi ne nonofo i Filipaina, ne fifili a ia ke fina atu ke lagomatai. Feleveia nakai a ia mo e tau mena uka?

“He fifili e tau koloa ke toka mo e tau koloa ke fakafua, ne uka lahi ke he mena ne amanaki au ki ai,” he ui e Sukhi. “Ha kua molea foki e 13 e tau he nofo tokotaha he kaina haaku ni, ne fina atu au nofo he taha magafaoa mo e nakai moui tuga he mogo fakamua. Nakai mukamuka, ka ko e puhala mitaki a ia ke tauteute au ke lata mo e moui fakatokolalo.” Ko e heigoa e tau paleko ne fehagai mo ia he mole e hiki  atu ki Filipaina? “Ne matakutaku au he tau moko totolo mo e manamanatu tumau ki kaina, ko e tau paleko lalahi haaku. Ne fakaako au ke falanaki fakalahi ki a Iehova!” Kua aoga nakai e mena ia? Mamali a Sukhi ti pehē: “Tala mai a Iehova ki a tautolu, ‘kamatamata mai ai e mutolu au ke he tau mena na, po ke liligi atu e au e monuina ma mutolu.’ Ne mooli e tau kupu nei ki a au fakatagata he mogo ka hūhū e tagata he kaina ki a au, ‘Liu mai a koe a fe? Loga lahi e hūhū haaku.’ Kua fiafia au mo e makona he maeke ke lagomatai e tau tagata ne hoge fakaagaaga!” (Mala. 3:10) Ne lafi e Sukhi: “Mooli, ko e vala ne uka lahi ko e fifili ke hiki atu. He mole e hiki atu au, ne ofoofogia ke kitia e puhala kua fakatokatoka e Iehova e tau tuaga ma haaku.”

Ko Sime, ko e matakainaga taane kua fai hoana ne 30 tumā e tau, ne toka a Filipaina ka e fina atu ke he gahua totogi lahi he motu he Lotouho he Faahi Uta. He nofo i ai, ko e fakamalolōaga ne moua e ia mai he leveki takaiaga mo e lauga he matakainaga he Kau Fakatufono ne omoomoi a Sime ke tuku fakamua a Iehova he moui haana. “Ka ko e manamanatu ke tiaki e gahua tupe haaku kua fakamatakutaku lahi ki a au,” he ui e Sime. Pete ia, ne fakaoti e gahua tupe haana ti liu ki Filipaina. He mogonei, ko Sime mo e hoana haana ko Haidee, hane fekafekau i Davao del Sur, he faahi toga he motu he matakavi ne manako lahi ke he tau tagata fakamatala ke gahua ke he matakavi lahi. “He liu manamanatu ki ai,” he ui e Sime, “ne fiafia lahi he kautū au ke he matakutaku haaku ka fakaoti mai he gahua tupe mo e tuku fakamua e au a Iehova. Nakai fai mena kua mua e fiafia he moui ke he foaki katoatoa e moui haau ma Iehova!”

Magaaho ne logona e Ramilo mo Juliet, ko e hoa paionia ne 30 tumā e tau tau, hagaao ke he taha fakapotopotoaga ne kavi 30 e kilomita he mamao mo e kaina ha laua kua manako lagomatai, ne foaki noa a laua ke lalago ai. He tau faahi tapu takitaha, he tō e uha po ke kikila e laā, ne lagaloga e o atu a Ramilo mo Juliet he pasikala afi ke he tau feleveiaaga mo e gahua fakamatala. Pete kua paleko he o atu he tau puhala pokopoko mo e tau hala laupapa ne tautau i luga he vai, ne fiafia a laua ha kua fakalaulahi e laua e fekafekauaga ha laua. Pehē a Ramilo: “Kua taute e au mo e hoana haaku 11 e fakaako Tohi Tapu! Ko e fekafekau he matakavi kua manako lahi ke he lagomatai, kua lata ni ke toka falu mena ka kua logona e maua e fiafia lahi!”​​—1 Kori. 15:58.

Manako nakai a koe ke iloa atu foki hagaao ke he fekafekau he matakavi ne manako lahi ke he tau tagata fakailoa he Kautu he motu haau po ke he taha motu foki? Ka pihia, tutala ke he leveki takaiaga haau, mo e totou e vala tala “Maeke Nakai a Koe ke ‘Hau ki Maketonia’?” he Ha Tautolu a Fekafekauaga he Kautu ia Aokuso 2011.