Ne fanau au he maaga ko Saxony, kua iloa ai mogoia ko e German Democratic Republic (GDR). Ne mafanatia mo e aga fakaalofa e kaina, ti fakaako he tau matua haaku au ke he tau mahani mitaki. Ko e GDR ko e motu Kominisi, ti tokologa e tagata i Saxony ne nakai onoono fakahokulo ke he lotu. Ma haaku, ai fai Atua. Ua e taofiaga ne fakaohooho lahi e tau tau 18 fakamua he moui haaku: ko e nakai talitonu ke he Atua mo e Kominisi.

Ko e ha ne fiafia au ke he Kominisi? Ha kua loto au ke he manatu na tatai e tau tagata oti. Lafi ki ai, talitonu au kua lata e tau koloa oti ke tufatufa fakatatai ha ko e puhala anei ke fakaotioti e monuina lahi mahaki mo e mativa kelea lahi. Ti gahua fakamakamaka au ma e fakatokatokaaga he matakau fuata Kominisi. He 14 e tau haaku he moui, ne lahi e magaaho haaku ne taute he matagahua ke liu fakaaoga e tau laupepa ne uta ke tiaki. Ne loto fakaaue lahi e taone ko Aue ke he tau gahua haaku ti foaki mai he tau takitaki e palepale. Pete he fuata mui, ne maeke au ke iloa falu tagata politika ne tutū tokoluga he GDR. Manatu au kua hako e tau foliaga haaku ti mitaki foki e onoonoaga haaku ke he vahā i mua.

Ka kua hiki lahi mahaki e moui haaku. He 1989 ne malolo hifo e Berlin Wall ti mavehevehe foki e matakau Kominisi i Europa Uta. Ne matutaki ni e tau lekua. Nakai leva ti mailoga e au e nakai fakafili tonu ne aga mau he GDR. Ma e fakatai, ko e tau tagata ne nakai lalago e Kominisi ne kua taute fakakelea a lautolu. Maeke fēfē ke pihia? Nakai kia talitonu a mautolu ko e tau Kominisi na tatai e tau tagata oti? Ko e fakavaia noa ni kia e Kominisi? Ti tupetupe lahi au.

Ne hiki mogoia e au e tau mena ne mua ki a au ti hagaaki ke he musika mo e tā fakatino. Ha kua maeke au ke fakaako he aoga musika​—ti amanaki foki ke matutaki atu ke he univesitī​—ne mohe miti au ke he feua ko e tagata taute musika. Lafi ki ai, ne tiaki e au e tau mahani mitaki ne fakaako e au he vahā tote. Ko e tau mena aoga mogonei ke fiafia e moui, putoia e fakatū kapitiga ke he loga e fifine he taha e magaaho. Ka e nakai fakatotoka e tupetupe haaku ha ko e musika, tā fakatino, mo e atāina e puhala moui. Ko e tau fakatino foki ne vali e au kua fakakite e matakutaku. Ko e heigoa e amaamanakiaga he vahā i mua? Ti ko e heigoa e aoga he moui?

 Magaaho ne moua e au e tau tali haaku ne kumi, ne ofo lahi au. He taha afiafi, ne nofo au mo e falu tagata fakaako he aoga ti tutala a mautolu ke he vahā i mua. Ko Mandy * ko e tagata fakaako mo e taha foki he Tau Fakamoli a Iehova. He afiafi ia ne fakakite mai e ia e puhala hako ki a au. Pehē a ia, “Andreas, ka manako a koe ke moua e tau tali ke he tau hūhū haau hagaao ke he moui mo e vahā i mua, kumikumi fakamitaki ke he Tohi Tapu.”

Ne fakauaua mo e tuahā au, ka e talia ai ke kumikumi. Fakakite mai e Mandy e Tanielu veveheaga 2, ti ofo lahi au ke he tau mena ne totou e au. Kua fakamaama he perofetaaga nei e tau pule he lalolagi, ko e tau fakatufono ne malolō lahi ti hoko mai ke he magahala ha tautolu. Fakakite mai e Mandy e falu perofetaaga he Tohi Tapu hagaao ke he vahā i mua ha tautolu. Kua moua tuai e au e tau tali ke he tau hūhū haaku! Ka ko hai ne tohi e tau perofetaaga ia, mo e ko hai ka hakotika ke iloa tuai e vahā i mua? Ti liga kia kua fai Atua?

Ne fakatoka e Mandy au ke matutaki mo Horst mo Angelika, ko e hoa Fakamoli ne lagomatai au ke maama mitaki e Kupu he Atua. Mailoga agataha e au ko e Tau Fakamoli a Iehova ni e lotu ne fakaaoga tumau mo e fakakite ko e higoa he Atua ko Iehova. (Salamo 83:18; Mataio 6:9) Ne fakaako e au kua foaki e Iehova ko e Atua ke he tau tagata e amaamanakiaga ke momoui tukulagi he lalolagi parataiso. Pehē e Salamo 37:9: “Ko lautolu kua talifaki kia Iehova, to eke ma lautolu e motu.” Ne fiafia au ha kua hafagi e amaamanakiaga nei ke he tau tagata oti ne manako ke momoui ke he tau tuaga he mahani he Atua tuga ne fakamaama he Tohi Tapu.

Pete ia, ne taufetului au ke hiki e tau puhala haaku ke maeke ke moui fakatatau ke he Tohi Tapu. Ne taute he kautūaga he musika au ke fakatokoluga, ti lata au ke fakaako fakamua ke fakatokolalo. Lafi ki ai, ne nakai mukamuka ki a au ke tiaki e puhala moui fakahanoa haaku. Ka kua fakaaue ki a Iehova he fakakite mai e fakauka, fakaalofa noa, mo e maama hagaao ki a lautolu ne eketaha ke fakagahua e tau fakaakoaga he Tohi Tapu!

Ne omoomoi he Kominisi mo e nakai talitonu ke he Atua e tau tau 18 fakamua he moui haaku; ka kua hiki he Tohi Tapu e moui haaku tali mai he mogoia. Ko e tau mena ne fakaako e au kua fakatotoka hifo e tupetupe haaku ke he vahā i mua mo e moua e au e kakano he moui. He 1993, ne papatiso au ko e taha he Tau Fakamoli a Iehova, ti he tau 2000 ne mau au mo Tabitha ko e matakainaga fakamakutu. Ne eketaha a maua ke lagomatai e falu ke iloa e Tohi Tapu. Tokologa ne feleveia mo maua ne tatai e feakiaga mo au, ne omoomoi he Kominisi mo e nakai talitonu ke he Atua. Ne fiafia lahi au he fakakite ki a lautolu e puhala ke iloa a Iehova.

He kamata fakamua au ke matutaki mo e Tau Fakamoli a Iehova, ne ofomate e tau matua haaku. Ka e tali mai he mogoia, ne kitia e laua e lauiaaga mitaki ke he moui haaku he lafi mo e Tau Fakamoli. Ti fiafia lahi au ha kua totou e laua mogonei e Tohi Tapu mo e fakalataha ke he tau feleveiaaga Kerisiano he Tau Fakamoli a Iehova.

Kua mitaki e fakamauaga ha maua mo Tabitha ha kua eketaha a maua ke muitua fakatata ke he tomatomaaga he Tohi Tapu ma e tau hoa mau. Tuga anei, ko e omaoma ke he fakatonuaga he mahani fakamooli i loto he fakamauaga kua fakatumau ke fakamalolō e fakamauaga ha maua.​—Heperu 13:4.

Kua nakai liu au ke matakutaku ke he moui mo e tupetupe ke he vahā i mua. Logona hifo e au ko au he magafaoa he tau matakainaga talitonu he lalolagi katoa, ko e magafaoa ne moua e mafola mo e kaufakalataha mooli. He magafaoa nei kua tatai a mautolu oti. Ko e mena ia ne talitonu au ki ai mo e manako ke moua he moui katoa haaku.