Ato hoko atu e motu ko Isaraela ke he Motu he Maveheaga he 35 e teau tau kua mole, ne pehē e Atua to puipui e ia a lautolu mai he “tau gagao kelea” a Aikupito. (Teutaronome 7:15) Ko e taha puhala ne taute e Ia ko e age ki a lautolu e tau vala tala ke puipui e tau gagao mo e mahani meā. Ma e fakatai:

•   Ko e tau fakatufono oti he motu ke koukou mo e unu e tau mena tui.​—Levitika 15:4-27.

•   Hagaao ke he tau fakavao, talahau he Atua: “Kia ha ha ia koe ha mena ki tua he heaga api, ke fina atu a koe ki ai. Kia ha ia koe foki ha koho mo e hau a tau kanavaakau; ka fano foki a koe ke he vao ti keli ai e luo ti liu ai foki a koe mo e tanu hau a otaota.”​—Teutaronome 23:12, 13.

•   Ko lautolu ne moua e tau gagao pikitia ne kua nonofo tokotaha​—ke he magaaho kū. Ko lautolu ne kua maulu e tau gagao ne unu e tau mena tui mo e koukou ato “meā” a lautolu mo e liliu mai.​—Levitika 14:8, 9.

•   Ko e ha tagata ne aamo e tino mate kua nofo tokotaha.​—Levitika 5:2, 3; Numera 19:16.

 Ko e tau fakatufono ha Isaraela ke he tau tuluiaga fakaekekafo mo e onoaga ke he fakameā ne kua leva tigahau he taute.

 He falu matakavi, fakaaoga agaia he tau puhala fakameā tuai. He fakatai:

•   Ko e tau otaota ne tafola he puhalatū. Ko e tau vai kiva, tau mena kai kiva mo e falu otaota foki ne kua holofa e nakai meā. Ko e tau mena nei kua holo ki mua e tau gagao mo e mamate e tau fanau ikiiki.

•   Ko e tau ekekafo he vahā fakamua ne tote e maamaaga po ke ai iloa ha mena ke he gagao mo e moua mai fēfē e tau gagao. Ko e tau Aikupito ne taute e tau “fakamaulu” tuga he fakaaoga e toto he moko taliga, fakavao he pelican, kumā mate, mimi mo e falaoa tūputi. Tau fakavao he tagata mo e tau manu ne fakaaoga foki e lautolu he tau puhala ekekafo.

•   Ko e tau Aikupito he vahā fakamua ne kua gagao ha ko e tau moko pikitia ikiiki ne moua he Vailele ko Naila mo e tau vai ne fakaaoga ma e fonua. He pihia, loga e fanau ikiiki i Aikupito ne mamate he hihii mo e falu gagao pihia ne moua he kiva e tau mena kai.

 Ka ko e tau Isaraela ne omaoma mo e mumui ke he fakatufuno he Atua ne kua malolō a lautolu.