Kan timonechkowaj iga Tikweyichi̱waj Jehová tikto̱ka̱wiáj Kajli kan Monechkowaj yej Tajto̱lmoya̱waj de Jehová, iga yej timomachtiáj ompa wi̱ts pan Biblia wan timomachtiáj de Irreinoj Dios. Wan Jesús de iní̱n tamachtij kua̱ onoya pan Ta̱jli (Lucas 8:1).

Ompa tikweyichi̱waj Dios pan toa̱ltepe̱ʼ. Pan inó̱n kajli te̱ijliáj kén matitajto̱lmoya̱wakan de ye̱kti tajto̱lmej (Mateo 24:14). Kajli kan timonechkowaj mo̱nsaj chijtokej, sekin wejweyi wan sekin ayá̱, pero ayá̱ kipiá komati tejté̱ yej patiʼyo (o patkayo). Pan sekin de iní̱n kajli monechkowaj o̱me o ma̱j tanechko̱lismej. Pan xiwimej yej panoj tikchijkej komati (ken cinco cada día) iga nemi komatiáj tanechko̱lismej, ijkó̱n tokni̱wan wel kipiáj kan mamonechkokan. ¿Kén tikchi̱waj iní̱n? (Mateo 19:26.)

Mochi̱wa iga tomin yej komatimej kiyokamakaj. Iní̱n tomin motitani (o moojmaga) Betel iga wel magitanejtigan (o makiprestarokan) tanechko̱lismej yej kichi̱wasnekij se̱ yankuiʼ kajli kan mamonechkokan o iga makiye̱ʼtali̱kan yej kipiajya.

Kichi̱waj miak tokni̱wan yej ayá̱ kitaniáj tomin. Pan miak pai̱smej onoʼ Grupos yej Kichi̱waj Kajlimej kan Timonechkowaj. Iní̱n tokni̱wan yej tapale̱wiáj, ka̱wij pan se̱ tanechko̱lis wan de ompa yawij pan seuʼ aunke wejka maka̱wi, iga makipale̱wi̱kan tokni̱wan de inó̱n tanechko̱lismej iga makichi̱wakan se̱ yankuiʼ Kajli kan Timonechkowaj. Pan seuʼmej pai̱smej moijliá sekin tokni̱wan iga makiyaka̱nakan tekipano̱lis iga mamochi̱wa o mamoye̱ʼtali se̱ Kajli kan timonechkowaj pan se̱ a̱ltepe̱ʼ. Iní̱n tokni̱wan kimatij kén mamochi̱wa se̱ kajli, pero yej kichi̱waj iní̱n kajli yawij miakej tokni̱wan yej ompa monechko̱tij. Iní̱n welij mochi̱wa iga iyespíritu Jehová wan iga ipale̱wilis de ia̱ltepe̱ʼ (Salmo 127:1; Colosenses 3:23).

• ¿Kén tikto̱ka̱wiáj Kajli kan Timonechkowaj wan té iga?

• ¿Kén tikchi̱waj pan nochi ta̱jli Kajlimej kan Timonechkowaj?