Grupo akin Tlayekana ipan nochi tlanechikoltin san achijtsitsintin tlakamej akin kichiuaj ken Cristo niman chikauak intlaneltokil akin kinyekanaj iteixpantijkauan Jehová ipan nochi tlaltikpaktli. Yejuin intekiyo:

•   Kitaj manochijchiua tlamachtijli tlen nokixtia itech Biblia ipan toamatlajkuiloluan niman tlen nopanoltia ipan totlanechikoluan niman kaltlamachtiltin tlen kinpiyaj iteixpantijkauan Jehová (Lucas 12:42).

•   Kiyekanaj tekitl tlen kichiuaj iteixpantijkauan Jehová ipan nochi tlaltikpaktli. Kijtosneki kiyekanaj tenojnotsalistli, tlemach tlen kitemakaj tlaltikpakchanejkej ika inyojlo niman kintlalia akinomej uelis kuajli tlayekanaskej.

 Grupo akin Tlayekana ipan nochi tlanechikoltin kichiua ijkon ken okichiujkej “apóstoles niman [...] tlayekankej” ipan Jerusalén akin onenkej ipan kachtopa siglo. Yejuamej okitakej tlenon nochiuaskia ipan nochi tlanechikoltin kampa nosentlaliayaj inomachtijkauan Cristo (Hechos 15:2). Akin nemij ipan Grupo akin Tlayekana ipan nochi tlanechikoltin xtotlayekankauan akin uejueyixtokej, ijkon ken xonochiujkej uejueyixtokej tlakamej akin yeuejkaui oyolmelaujkanenkej itech toTajtsin. Yejuamej nochipa kitejtemouaj makinyekana tlen kijtoua Biblia niman kimatstokej ika Jehová yokitlali Jesucristo ken tlayekanketl ipan tlanechikojli (1 Corintios 11:3; Efesios 5:23).

 Ipan Grupo akin Tlayekana ipan nochi tlanechikoltin nemij tokniuan Kenneth Cook, Jr., Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane niman Jeffrey Winder. Yejuamej tekipanouaj ipan oficina kampa noyekanaj nochi sucursales ipan Brooklyn (Nueva York).

 Grupo akin Tlayekana ipan nochi tlanechikoltin yokintlali chikuasen grupos akin kiyekanaj miyek tlemach tlen nochiua ipan totekiyo. Nochimej itech yejuin Grupo tlapaleuiyaj ipan se noso ipan okseki grupos.

•   Grupo akin kiyekana tekitl. Kita itech tlemach tlen kitlajtlanij tekiuajkej niman kita kenon kinpaleuiskej akin inpan panoua tlemach tlen melak xkuajli, ijkuak iteixpantijkauan Jehová kixnamikij itlaj xkuajli tlen xkichiayaj niman tlen kineki kinteltis maka sa matenojnotsakan.

•   Grupo akin kiyekana akin tekitij Betel. Kita nochi itech akin tekipanouaj ipan Betel, kijtosneki, akin tekitij ipan insucursales iteixpantijkauan Jehová.

•   Grupo akin kiyekana tlen nochijchiua. Kita manochijchiuakan niman manotitlanikan amatlajkuiloltin tlen kisaj itech Biblia, noijki manochijchiuakan kaltin kampa tosentlaliaj, kaltin kampa notlajtolkuepaj amatlajkuiloltin niman sucursales.

•   Grupo akin kiyekana tenojnotsalistli. Kiyekana totenojnotsalis itech “kuajli tlajtojli” itech Tekiuajyotl (Mateo 24:14).

•   Grupo akin kiyekana tlamachtijli. Kitemaka tlamachtiltin tlen nopanoltia ipan tlanechikoltin, kaltlamachtiltin niman tlen notlalia itech tlen nokaki niman tlen noita ika video.

•   Grupo akin kiyekana tlen noijkuiloua. Kijkuiloua tlen notlalis ipan amatlajkuiloltin tlen nokixtiaj itech Biblia niman itech página tlen tikpiyaj ipan Internet, niman kiyekana tlen notlajtolkuepa.

 Xsan yejuin tekitl kichiuaj yejuin grupos, akin nemij ipan Grupo akin Tlayekana ipan nochi tlanechikoltin nosentlaliaj nochi semanas niman ijkon kitaj tlenon noneki itech nochi tlen kiyekantokej. Ipan yejuin tlanechikoltin, kitaj tlen kijtoua Biblia niman kikauiliaj makinyekana iespíritu santo toTajtsin. Nochipa nochikauaj tlapaleuiskej itech tlen yokitlapejpenijkej kichiuaskej (Hechos 15:25).

 Ipan nochi grupos tlen yokintlali Grupo akin Tlayekana ipan nochi tlanechikoltin nemij tlakamej yolmelaujkej akin tlapaleuiyaj, yejuin tlakamej kuajli kimatstokej niman kuajli yokixmatkej tekitl tlen kiyekana grupo kampa yokintlalijkej matlapaleuikan (1 Corintios 4:2). Yejuin tlapaleuijkej yauej nochi semanas ijkuak nosentlaliaj igrupo. Maski yejuamej xkijtouaj tlenon nochiuas, kema tlapaleuiyaj ika tlen kimatstokej niman kiteijliaj itech tlen noita ipan yejon tlanechikojli, kichiuaj ijkon ken yokijto igrupo niman kitaj kenon nochiujtika itech tlen yononemili. Grupo akin Tlayekana ipan nochi tlanechikoltin noijki kintlajtlanilia makintlajpalotij iteixpantijkauan Jehová akin nemij ipan okseki países noso matlapaleuikan itech tlen kualtsin nopanoltia ken ipan se ueyi tlanechikojli tlen nopanoltia nochi xiujtin noso ijkuak tlami iTlamachtil Galaad.