Ka. Biblia kuajli kijtoua ika san toTajtsin noneki tiknotsaskej niman ika noneki tikchiuaskej itechkopa itoka Jesús. Jesús okimijli inomachtijkauan: “Yejua ika tej, ijkin xchiuakan oración: ‘ToTajtsin, akin tinemi ne iluikak, ma mitsyekteneua nochi tlakatl’” (Mateo 6:9). Yejua xkeman okimijli makinnotsakan santos, ángeles, noso yakaj okse akin xtoTajtsin.

 Jesús noijki okimijli inomachtijkauan: “Nejua niojtli, nitlin melauak, niman ninemilistli. Tej, san nejua notechkopa uelis ajsiskej itech noTajtsin” (Juan 14:6). San Jesucristo uelis techpaleuis matiknisiuikan toTajtsin (Hebreos 7:25).

¿Kuajli tla tiknotsaj toTajtsin niman noijki on santos?

 Ipan Majtlaktli Tlanauatiltin, toTajtsin okijto: “San nejua nimoTEKO Dios, niman xnikxikoua nikitas tikinmauistilis oksekimej dioses” (Éxodo 20:5). ¿Tlenon kijtosneki yejuin? Ika toTajtsin san yejua kineki matikueyichiuakan. Niman kineki ika san yejua matiknotsakan pampa ijkuak tiknotsaj kentla tikueyichiujtoskiaj (Isaías 48:11).

 Tla tejuamej tikinnotsaj ángeles, santos noso yakaj okse, melak tikyolkokoskiaj toTajtsin. Apocalipsis kijtoua tlenon opanok ijkuak apóstol Juan kinekiya kiueyichiuas se ángel, yejua okijli: “Maka ijkon xchiua. Nejua tej, san niitekichiuilijkau Dios, sano ijki ken tejua niman mokniuan yejuan melajkanemij ipan on tlen melauak yejuan Jesús otemachtij. Tejua san Dios xmauistili” (Apocalipsis 19:10).