¿Akinomej yaskej iluikak?
Tlen Biblia kijtoua
ToTajtsin yokintlapejpeni sekimej itekipanojkauan para ijkon ijkuak yoliuiskej, nemiskej ne iluikak (1 Pedro 1:3, 4). Maski toTajtsin yokintlapejpeni, yejuamej ok noneki kichikauaskej intlaneltok niman kichiuaskej tlen toTajtsin kuelita, tla xijkon kichiuaj, xyaskej iluikak (Efesios 5:5; Filipenses 3:12-14).
¿Tlenon kichiuaskej ne iluikak?
Yejuamej tekiuajtiskej niman teopixkej yeskej iuan Jesús ipan mil xiuitl (Apocalipsis 5:9, 10; 20:6). Yejuamej tlanauatiskej ipan iTekiuajyo toTajtsin (Biblia kitokayotia “yenkuik cielo”) niman kinnauatiskej nochimej tlaltikpakchanejkej (noso “on yenkuik tlaltikpaktli”). Yejuin tekiuajkej tlapaleuiskej para ijkon nochimej makichiuakan tlen kuajli, ijkon ken toTajtsin kinekiya (Isaías 65:17; 2 Pedro 3:13).
¿Kechmej yaskej ne iluikak?
Biblia kijtoua ika 144,000 tlaltikpakchanejkej yoliuiskej para chantiskej ne iluikak (Apocalipsis 7:4). Apóstol Juan okitak “on Borreguito [Jesucristo ijkuak yoyoliujka] ijkatikatka ipan on tepetl itoka Sión. Iuan yejua nemiyaj 144 mil” (Apocalipsis 14:1-3; Juan 1:29; 1 Pedro 1:19). Tepetl Sión kijtosneki tekitl tlen toTajtsin yokinmakak Jesús niman 144,000 akin iuan tekiuajtiskej ne iluikak (Salmo 2:6; Hebreos 12:22).
On akin okinnotskej niman okintlapejpenijkej para matekiuajtikan iuan Cristo ipan iTekiuajyo toTajtsin noijki noixmatij ken “on akin xmiyekej” (Apocalipsis 17:14; Lucas 12:32). Yejuin kijtosneki ika maski miyekej kichiuaj ken Cristo, xmiyekej yaskej iluikak (Juan 10:16).
Tlen xmelauak noijtoua itech akin yauej iluikak
Tlen sekimej kijtouaj: Nochimej akin kichiuaj tlen kuajli yaskej iluikak.
Tlen melauak: ToTajtsin yokijto ika casi nochimej akin yolmelajkej chantiskej ipan tlaltikpaktli (Salmo 37:11, 29, 34).
Jesús okijto: “Xe yakaj tlejkoua iluikak” (Juan 3:13). Ika yejuin tlen okijto, oteasikamachilti ika akin oyolmelajkanenkej niman omijkej achto ika yejua mikiskia, ken Abrahán, Moisés, Job niman David, xoyajkej iluikak (Hechos 2:29, 34). Yejuamej yoliuiskej nikan ipan tlaltikpaktli (Job 14:13-15).
On tlapejpeniltin akin yoliuiskej ne iluikak noijki kintokayotiaj “on yejuan achtoj yoliskej” (Apocalipsis 20:6). Yejuin techajsikamachiltia ika onias okse yoliuilistli, niman yejuin nochiuas nikan ipan tlaltikpaktli.
Biblia temachtia ika ipan iTekiuajyo toTajtsin “xok onyas mikilistli” (Apocalipsis 21:3, 4). Yejuin tlajtoltin nochiuaskej nikan ipan tlaltikpaktli pampa ne iluikak xkeman yakaj miki.
Tlen sekimej kijtouaj: Cada se uelis kitlapejpenis tla chantis ne iluikak noso nikan ipan tlaltikpaktli.
Tlen melauak: ToTajtsin yejua akin kitlapejpenia akinon itekipanojkauj akin yolmelajkanemi yas iluikak (Filipenses 3:14). Akin kichiuaj ken Cristo xyejuamej kitlapejpeniaj tla chantiskej ne iluikak noso nikan ipan tlaltikpaktli (Mateo 20:20-23).
Tlen sekimej kijtouaj: Chantiskej ipan yejuin tlaltikpaktli akin xkinnamiki yaskej iluikak.
Tlen melauak: Akin nemiskej nochipa nikan ipan tlaltikpaktli toTajtsin kintokayotia nokalpan, “notlapejpeniluan” niman “teuejkakoneuan intech on yejuan toTEKO yokintiochiu” (Isaías 65:21-23). Yejuamej xok tlajtlakolejkej yeskej niman nochipa nemiskej ipan se kualtsin xochitlalpan, ijkon ken toTajtsin kinekiya (Génesis 1:28; Salmo 115:16; Isaías 45:18).
Tlen sekimej kijtouaj: Apocalipsis kiteneua 144,000, san ika, yejon san itlaj kineskayotia.
Tlen melauak: Maski Apocalipsis kinteneua seki números tlen san itlaj kineskayotiaj, noijki kinteneua seki tlen xsan neskayotl. Ijkon ken “on majtlaktli uan ome iapóstoles on Borreguito” (Apocalipsis 21:14). Matikitakan seki tlen techititia ika número 144,000 xsan itlaj kineskayotia.
Apocalipsis 7:4 kijtoua ika “144 mil tlakatl yejuan okintlalilijkej sello” kijtosneki tlapejpeniltin akin yaskej iluikak, niman sakin kijtoua “sanoyej miyek tlakatl yejuan xakaj ueliya kipouaya”. Yejuin “sanoyej miyek tlakatl” noijki makisa (Apocalipsis 7:9, 10). Tla xsan 144,000 tlaltikpakchanejkej yaskej iluikak, xnoijtoskia ika “sanoyej miyek tlakatl” noijki makisas niman xnonekiskia noijtos ika onokej ome grupos. a
Biblia noijki kijtoua ika on 144,000 “okinkojkej intsajlan on tlaltikpaktlakamej. Niman yejuamej nochiuaj achtoj ofrenda” (Apocalipsis 14:4). Tlajtojli “achtoj ofrenda” kijtosneki tlapejpeniltin. Ika yejon, kinamiki ijkon makintokayotikan on tlapejpeniltin akin techuajyekantoskej iuan Jesús desde ne iluikak (Apocalipsis 5:10).
a Ixtlamatki Robert Thomas okijto ika on número 144,000 tlen noteneua ipan Apocalipsis 7:4 kuajli techijlia kechmej, san ika, ipan Apocalipsis 7:9 xkijtoua kechmej. Tla on número 144,000 san itlaj kineskayotiskia, on okseki números tlen noteneuaj ipan Apocalipsis noijki san itlaj kineskayotiskiaj (Revelation 1-7: An Exegetical Commentary [Comentario exegético de Revelación 1-7], página 474).
Puede que también le interese
ENSEÑANZAS IMPORTANTES DE LA BIBLIA
¿Tlenon kijtosneki iTekiuajyo toTajtsin?
Jesús más otemachti itech iTekiuajyo toTajtsin, xijkon ken itech okseki. Melak yeuejkaui ika akin kichiuaj ken Cristo kitlajtlantokej mauajla iTekiuajyo toTajtsin.
TLAMACHTILTIN ITECH BIBLIA
Xkita kenon titemachtiaj
Xkita kenon tiktlajtlanis mamitsmachtikan Biblia kampa xtlaj tiktlaxtlauas.