Akin kixikoua tlen ouijtika xkikauilia ika tlen xkuajli noso tlen teajman makiyolkoko. Se yolik ueltiuj kenon kixikos tlen ouijtika. Ijkon ken se konetsintli san ueli nejnemi pampa kixikoua ijkuak uetsi, ijkuak ueyiyas noijki uelis kuajli onkisas san tla nomachtia kixnamikis tlen ouijtika.

Seki kokonej noyolkokouaj ijkuak itlaj xkuajli kichiuaj, kixnamikij tlen ouijtika noso yakaj kinmelajkatlalia, niman okseki kokonej nion xok kiyejyekouaj kichiuaskej. San ika, melak noneki makasikamatikan yejuin:

• Xnochipa uelis nochi kuajli tikchiuaskej (Santiago 3:2).

• Tinochimej tikixnamikij tlen ouijtika (Eclesiastés 9:11).

• Tinochimej noneki yakaj matechmelajkatlali. Yejon tlen kichiuas matiuelikan (Proverbios 9:9).

Mokoneuj uelis kimixnamikis tlaueltin tlen kinpiyas, tla ueli kixikoua tlen ouijtika.

Ijkuak mokoneuj nopopoloua

TLEN BIBLIA TECHMACHTIA: Akin yolmelauak “maski chikomepa uetsis, oksejpa nokuiteuas” (Proverbios 24:16).

Xpaleui mokoneuj matlanemili ken kinamiki. San xkonnemili, ¿tlenon kichiuaskia mokoneuj tla xkipanoltiskia se examen? ¿Nosiaujkauaskia niman kijtoskia: “¡Nochipa xtlaj kuajli nikchiua!”?

Tla tikneki tikmachtis mokoneuj makixiko tlen ouijtika, xpaleui makita ipan tlenon kipoloua noyektlalis. Ijkon uelis kiyektlalis tlen kajmana niman xsan yejua noknelis.

Noijki, maka tejua xyektlalili tlen kixnamiki. Xpaleui san no yejua makiyektlali. Tejua uelis tiktlajtoltis: “¿Tlenon mitspaleuis kuajli xkasikamati tlen mitsmachtiaj ipan moescuela?”.

Ijkuak panoua itlaj tlen teajman

TLEN BIBLIA TECHMACHTIA: “Nemejuamej xnenkimatij tlinon nochiuas mostla” (Santiago 4:14).

Tejuamej xtikmatij tlenon topan nochiuas. San totoka uelis peuas tikualoskej noso tikpoloskej totomin. Ijkon ken kijtoua Biblia: “Ipan sen tlaksalistli xnochipa tetlani on yejuan más tlaksa, nion  ipan sen nouijsokilistli xnochipa tetlani on yejuan más tlauelej; [...] yej nochimej impan yejko ijkuak kiseliaj tlen kuajli noso xkuajli” (Eclesiastés 9:11).

Melak kuajli ika tajtin najmanaj ipampa inkoneuan niman kinpaleuiyaj itech tlen xkuajli. San ika, xueliskej nochipa kinpaleuiskej itech nochi tlen kixnamikiskej.

Maski mokoneuj xiueyi niman xuelis kipolos se tekitl noso tomin, kema uelis kixnamikis okseki, kanaj yakaj xok kinekis iuan nouikas noso uelis mikis se ichanejkauj. *

Ijkuak mokoneuj kimelajkaijliaj kanon noneki noyektlalis

TLEN BIBLIA TECHMACHTIA: “Xmokauili ma mitstlakanonotsankan [...] para ijkon timochiuas tlamatki” (Proverbios 19:20).

Ijkuak mokoneuj kimelajkaijliaj kanon noneki noyektlalis, xkijtosneki tla kitlauelitaj. Kijtosneki ika kinekij kipaleuiskej makiyektlali tlen xkuajli kichiujtika.

Tla tikmachtia mokoneuj makikaki tlen kimelajkaijliaj, kipaleuis yejua niman tejua noijki. Se tajtli akin itoka John kijtoua: “Tla nochipa tikinyektlalilia itlaueluan mokoneuan, xkeman ueliskej sa no yejuamej kinyektlaliskej. Intlaueluan miyekixtiaskej, niman tejua nonekis nochipa tikinyektlalilijtias. Yejon san kichiuas xtlauelmikikan”.

¿Kenon uelis tikpaleuis mokoneuj makichiua tlen kijliaj ika noneki kiyektlalis? Ijkuak ipan escuela noso oksekan kimelajkanotsakej mokoneuj, xmokojtili maka tikijlis ika xmelauak tlen okijlikej. Tejua uelis tikpaleuis tla tiktlajtoltia:

• “¿Yotiknemili tleka omitsmelajkaijlikej kanon timoyektlalis?”.

• “¿Kenon uelis timoyektlalis?”.

• “¿Tlenon tikchiuas ijkuak oksejpa ijkon mopan nochiuas?”.

Xkilnamiki, ika tla tikmelajkaijlia mokoneuj kanon noneki noyektlalis xsan aman kipaleuis, noijki kipaleuis ijkuak ueyiyas.