TINMASTLAKAPALUAN papalomej xsajnoye chijchikaujkej, ika yejon, tla inpan xiniskia tlalpoktli noso tla ipan tlajuachxiniskia, on mastlakapaltin ueliskiaj ijtlakauiskej niman on papalomej hasta xok más ueliskiaj patlaniskiaj. ¿Tleka ijkon panoua?

Xkonnemili yejuin: Sekimej ixtlamatkej itech Universidad estatal de Ohio yokitakej itlaj tlen temojkatlachialti itech papalotl morfo azul (Morpho didius). Yokitakej ika maski imastlakapaluan yejuin papalotl nesij petstikej, on mastlakapaltin kipiyaj pitentsitsintin ikakapaxuan tlen nenepanijtokej ken itejas se tejaskajli. Niman, sesentetl yejon ikakapaxyo kinpiya miyek kuentsitsintin noso apantsitsintin tlen kichiuaj ika on tlalpoktli niman atl mapeyauikan niman maka ompa manosentlalikan. Ixtlamatkej yopeujkej kixkopinaj ken tlachijchiujtin imastlakapaluan yejuin papalotl.

Yejuin tlen ixtlamatkej yokitakej itech imastlakapaluan papalotl morfo azul kuajli techititia kenijki miyekej kiyejyekojtokej kixkopinaskej ken tlachijchiujtin yolkatsitsintin niman tlen onka ipan yejuin tlaltikpaktli. Ixtlamatki Bharat Bhushan kijtoua: “Nochi tlen onka ipan tlaltikpaktli melak kualtsin ken tlachijchiujtli. Ika yejon, desde yeuejkaui, miyekej ixtlamatkej kinekij kixkopinaskej tlen onka: hasta tlen más pitentsin niman hasta tlen más ueyi”.

¿Tejua tlenon tiknemilia? ¿Tiknemilia ika imastlakapaluan papalotl morfo azul san ijkon onochijchiujkej noso yakaj okinchijchiuj?