Tokniuj Nicolas niman Céline yejuamej onopatlakej ipan se yenkuik tlanechikojli pampa sucursal de francia okintlajtlanili manopatlakan. Yejuamej ijkin onomachilijkej: “Ijkuak kemach otechijlijkej ika topatlaskiaj ipan se yenkuik tlanechikojli melak otiyolpajkej, san ika, sakin opeuj tajmanaj pampa tikintejtemouayaj toamigos. Niman noijki xmás kuajli touikayaj imiuan tokniuan pampa kemach tikimixmatstoyaj”. a San ika ¿tlenon uelis mitspaleuis xyolpaki ipan yenkuik motlanechikol? ¿Kenon uelis tikinpaleuis tokniuan? ¿Kenon uelis mitsyolchikauaskej tokniuan? ¿Niman kenon uelis titlapaleuis ipan yenkuik motlanechikol?

NAUI TLEMACH TLEN MITSPALEUISKEJ IJKUAK TIMOPATLAS IPAN SE YENKUIK TLANECHIKOJLI

1. Xtlaneltoka itech Jehová (Sal. 37:5). Kazumi, akin chanti Japón, yejua ikuikaya 20 xiuitl ika tlapaleuijtoya ipan se tlanechikojli, san ika, sakin ononek oksekan onchantiskej pampa iueuentsin okontitlankej oksekan matekititi. ¿Kenon okiteititi ika okitlali inemilis “ipan imauan” Jehová? Kazumi kijtoua: “Onikijli Jehová ika melak san noselti ninomachilia, melak ninomojtia niman najmankamiki. San ika, Jehová nochipa onechpaleui niman onechkojtili”.

¿Tlenon mitspaleuis más xtlaneltoka itech Jehová? Matitlanemilikan itech yejuin: Se planta noneki katekiskej niman kitlaliliskej okseki tlemach para manoskalti niman machikaui. Noijki ijkon, tla tiknekij totlaneltok más machikaui noneki okseki tikchiuaskej tlen matechpaleui. Tokniuj Nicolas, akin yotikteneujkaj yejua melak okipaleui pampa otlanemili itech Abrahán, Jesús niman Pablo pampa yejuamej okichiujkej okseki tlemach para kichiuaskej  tlen toTajtsin kineki. Yejon okipaleui makineltoka ika Jehová noijki kipaleuiskia. Tla tejua tikxeloua tiempo para san moselti timomachtis, xsan mitspaleuis ijkuak itlaj tiktlapejpenis tikchiuas, noijki mitspaleuis okseki xchiua para ijkon uelis titlapaleuis ipan yenkuik motlanechikol.

2. Maka san xkitsto ika yenkuik motlanechikol xijkon ken kampa achto tinemiya (Ecl. 7:10). Tokniuj tlakatl, Jules, akin chantiya Benín niman sakin ochantito Estados Unidos, okitak ika tlen ompa nochiuaya xsan noijki katka ken kampa nemiya, yejua kijtoua: “Nikmachiliaya ika nochimej akin nikimixmatiya nonekiya nikimijlis nochi tlen nopan yopanoka”. Kampa yejua achto chantiya xijkon katka, kuakon, opeuj xkuajli nomachilia. Sakin, ika yolik opeuj kintlalkauijtiuj tokniuan. San ika, ijkuak opeuj más kimixmatstiuj tokniuan xok ijkon onomachili. Jules kijtoua: “Yonikitak ika tinochimej xmelak titlatlamantikej, san tlamantik ken itlaj tikijtouaj. Kuakon, san noneki toseliskej”. Noijki, maka sa xnemilijto ika yenkuik motlanechikol xijkon ken kampa achto tinemiya. Se precursora akin itoka Anne-Lise kijtoua: “Nejua xoninopatlak ipan se yenkuik tlanechikojli para san noijki ninemis. Nejua oninopatlak pampa nikneki okseki nikixmatis”.

Tlayekankej xnoneki san kitstoskej ika kampa yenkuik intlanechikol xsan noijki kichiuaj ken kampa nemiyaj. Kanaj ompa ipan yenkuik intlanechikol tlamantik nochiua itlaj, san ika, xkijtosneki tla xkuajli ika ijkon kichiujtokej. Más kuajli yeskia tla kachtopa nenkitaj tlen ompa kichiuaj tokniuan akin ompa chantij achto itlaj nenkijtoskej (Ecl. 3:​1, 7b). Más kuajli yeskia tla nenkichiuaj tlen nenkinekij ika tokniuan mauelikan achto nenkimijliskej tlen noneki nochiuas (2 Cor. 1:24).

3. Xkita tlenon uelis tikchiuas ipan yenkuik motlanechikol (Filip. 1:27). Ijkuak timochanpatlas, melak tisiauis niman melak noneki tiempo, san ika, melak noneki nimantsin xmosentlali ipan yenkuik motlanechikol, tla tiueli xuiya ipan Kajli kampa tosentlaliaj. Pampa tla kanaj xmás mitsitaj, tokniuan xkimatiskej tlenon ika mitspaleuiskej. Lucinda niman omemej ichpochuan kijtouaj tlenon okichiujkej ijkuak ochantitoj Sudáfrica, yejua kijtoua: “Oninokojtili melak nitlapaleuis ipan tlanechikojli, nontenojnotsaya imiuan tlatlamantikej tokniuan niman nitlanankiliaya ipan tlanechikojli. Noijki, otikteijlikej ika tochan ueliskia ompa nosentlaliskej ijkuak tontenojnotsaskej”.

Tla tejua timokojtilia okseki tikchiuas ipan tlanechikojli, san sekan imiuan timopaleuijtos tokniuan “itech on kuajli tlajtojli”. Tokniuan tlayekankej okijlikej tokniuj Anne-Lise, akin yotikteneujkaj, ika nochimej imiuan matenojnotsa. Yejua kijtoua: “Nimantsin onikitak ika tla ijkon nikchiuaskia, yejon melak nechpaleuiskia”. Noijki, tla titlapaleuiya titlachipauas ipan Kajli kampa tosentlaliaj, tokniuan nimantsin kitaskej ika tejua yemelak tikita ika noijki ompa motlanechikol. Tla más tikinnisiuiya tokniuan, más nimantsin kuajli timomachilis imiuan akin ompa nemij.

 4. Xkintejtemo okseki moamigos (2 Cor. 6:​11-13). Tla tikneki imiuan timouikas tokniuan, xkimititi ika tikneki tikimixmatis. Kuakon, xkita kemanon imiuan timonojnotsas tokniuan para ijkon kuajli tikimixmatis achto ika peuas tlanechikojli niman sakin ijkuak yotlan. Xmokojtili xkilnamiki intoka. Tla tejua kuajli tikiminotsa, niman xtikimilkaua intoka, yejuamej melak kuajli mouan nomachiliskej niman kinekiskej mouan nouikaskej.

Maka xchiua tlen kuajli san pampa tikneki ika oksekimej kuajli mouan manouikakan. Xchiua ijkon ken Lucinda, yejua kijtoua: “Tejuamej tikiminotsaj tokniuan touan matlakuakij, niman yejon yotechpaleui kuajli imiuan matouikakan”.

“XMOSELIKAN CADA SE IUAN OKSEKIMEJ”

Sekimej tokniuan kintekiyomaka kalakiskej ipan se Kajli kampa tosentlaliaj niman más tla xakaj kixmatij. Kuakon ¿kenon uelis tikinpaleuiskej yejuin tokniuan akin kemach ajsij ipan totlanechikol? Apóstol Pablo okijto: “Xmoselikan cada se iuan oksekimej ken Cristo otechselij” (Rom. 15:7). Tlayekankej uelis kichiuaskej ijkon ken Cristo tla akin kemach ajsij ipan tlanechikojli, kuajli kinseliaj (xkita recuadro “ Kenon uelis timopatlas ipan okse yenkuik tlanechikojli”). Noijki, nochimej tokniuan niman hasta kokonej uelis kuajli kinseliskej akin kemach yoajsikej ipan tlanechikojli para ijkon kuajli manomachilikan.

Tla tiknekij kuajli tikinseliskej akin kemach yoajsikej ipan totlanechikol, uelis tikimijliskej touan matlakuatij noso matikitakan kenon uelis tikinpaleuiskej. Se tokniuj siuatl okipaleui okse tokniuj matlaixmati kampa yejua aman chantiskia niman okijli katlejua carro kasiskia. Tokniuj akin kemach ompa yoajsika kijtoua ika melak okitlasojkamat tlen okichiujkej ipampa niman okipaleui matlaixmati kampa aman chantiskia.

UELIS MÁS TIKCHIKAUAS MOTLANELTOK

Tla tejua timopatlatika ipan se yenkuik tlanechikojli, kanaj melak timomojtia niman miyek tlemach tlen mitsajmana. San xnemili yejuin, se paloma akin kemach nomajmachtijtika patlanis  kanaj kachtopa xmás uelis uejka ajsis, san ika, tla xkikajkaua ika patlani, sakin uelis más uejka ajsis. Noijki ijkon, tla tiknekij machikaui totlaneltok, xnoneki melak tajmanaskej ipampa okseki tlemach niman ijkon uelis más chikauak tiktekichiuiliskej Jehová. Nicolas niman Céline kijtouaj: “Melak miyek tiuelis ijkuak timopatlas ipan se yenkuik tlanechikojli. Pampa otikimixmatkej oksekimej, melak otechpaleui matikinpiyakan más kualneskayomej tlen achto xtikinpiayaj”. Jean-Charles, tokniuj akin yotikteneujkaj noijki melak kualtsin tlen ipan onochiuj, yejua kijtoua: “Tokoneuan melak okinpaleui machikaui intlaneltok ijkuak otopatlakej ipan se yenkuik tlanechikojli. San ipan seki metstin, toichpokatsin nimantsin opeuj kipanoltia se tlamachtijli tlen panoua itlajkotian semana niman totelpochtsin noijki opeuj tenojnotsa”.

¿Xueli timopatla ipan okse tlanechikojli kampa noneki tenojnotskej pampa itlaj tikixnamiktok? Tla ijkon, uelis mitspaleuis tlen kijtoua yejuin tlamachtijli niman xtlapaleui ipan motlanechikol kentla kemach ompa tajsiskia. Noijki, xtlaneltoka itech Jehová, xtlapaleui ipan tlanechikojli, imiuan xtenojnotsa tokniuan niman xkintejtemo okseki amigos noso más xkimixmati akin imiuan timouika. Uelis yakaj tikpaleuis akin tikita ika noneki makipaleuikan. Tla tikinpaleuiya oksekimej uelis más tiknisiuis Jehová, niman tla titetlasojtla kitaskej ika yemelak tikchiua ken Cristo (Juan 13:35). Niman kuajli xmatsto ika “on yejua uentli yejuan kipaktia Dios” (Heb. 13:16).

Maski tokniuan miyek tlemach okixnamijkej ijkuak onopatlakej ipan se yenkuik tlanechikojli, yejuamej melak oyolpajkej. ¡Niman, tejua noijki uelis ijkon tikchiuas! Anne-Lise kijtoua: “Pampa yoninopatlak ipan se yenkuik tlanechikojli, más yonechpaleui manikimixmati tokniuan”. Niman Kazumi kijtoua: “Ijkuak tonchantis oksekan, kuajli tikitas ika Jehová mitspaleuis ken nion xkeman tiknemiliaya”. Niman Jules kijtoua: “Melak miyek nikinpiya noamigos niman yejon yonechpaleui manikmachili ika nikan nochan. Melak nipaki ipan yenkuik notlanechikol niman melak nechtekiyomakaskia tla kemantika oksekan niaskia”.