Yejua okijto: “On reyes nouijsokiskej iuan oksekimej reyes, niman on países nomijmiktiskej iuan oksekimej países. Temojtij tlalolinis miyekan, niman onyas apistli niman miyek kualolistli miyekan” (Lucas 21:10, 11). Ijkon ken ijkuak melak uajtlakomontiuj niman uajtlapetlantiuj tikmatstokej ika ikiyauis, noijki ijkon tikmatstoskiaj ika sa achijtsin poliuiskia ika iyejkos iTekiuajyo toTajtsin ipampa nochi tlen nochiujtoskia. ¿Yejon tlen tikitaj? ¿Yonochiuj yejuin ipan nochi tlaltikpaktli? ¿Tlenon kiteititia tlen nochiujtika?

1. GUERRAS

Ipan 1914, onochiuj se guerra tlen xkeman noitaya. Ixtlamatkej kijtouaj ika ipan yejon xiuitl nochi onopatlak, pampa ijkuakon opeuj kachtopa guerra tlen nochiuiyan otlaijtlako. Ompa onotekitiltijkej carros tlen kinkuij ipan guerras, bombas, ametralladoras, gas tlen temiktia niman okseki tlen ika temiktiaj. Ijkuak opanok ika okpa Guerra ipan nochi tlaltikpaktli, opeujkej kinkuij bombas atómicas. Desde 1914, yonoitak ika nochiuaj miyekej guerras niman ika melak miyekej yomijkej ipampa guerras.

2. TLALOLINALISTIN

Enciclopedia Britannica Academic kijtoua ika nochi xiujtin nochiuaj kanaj 100 tlalolinalistin tlen melak tlaijtlakouaj. Noijki Servicio Geológico tlen onka Estados Unidos okijto ika desde 1900, nochi xiujtin kichiaj mapanokan 16 uejueyimej tlalolinalistin. Sekimej ueliskej kinemiliskej ika onka miyek tlalolinalistin pampa aman ixtlamatkej uelij kuajli kitaj kemanon nochiuas. Maski ijkon, kuajli tikitaj ika melak tlajyouilo niman miyekej mikij ipampa uejueyimej tlalolinalistin.

 3. APISTLI

Ipan nochi tlaltikpaktli onka apistli ipampa guerras, pampa xtlaj tomintsin, miyekej tekajkayauaj noso pampa xtlatlaki. Programa Mundial de Alimentos kijtoua: “Ipan nochi tlaltikpaktli nemij 821 millones akin xkipiyaj tlen kikuaskej, niman, intech yejuin, 124 millones uelis mikiskej ipampa apistli” (2018 Year in Review). Noijki pampa kokonej xkipiyaj tlen kikuaskej, nochi xiujtin mikij kanaj 3.1 millones. Ipan xiuitl 2011, melak miyekej kokonej omijkej pampa xkipiayaj tlen kikuaskej.

4. KOKOLISTIN

Organización Mundial de la Salud okijto: “Ipan 2001 ika tlayekapan melak miyek kokolistin youajnonextijkej. Seki kokolistin tlen yeuejkaui onkatkaj oksejpa youajneskej, ken cólera, peste niman fiebre amarilla niman okseki yenkuikej kokolistin youajneskej ken síndrome respiratorio agudo grave, gripe pandémica, síndrome respiratorio de Oriente Medio, ébola niman zika”. Ueyi kokolistli COVID-19 kemach onesiko. Maski ixtlamatkej niman tepajtikej kuajli yokimixmatkej miyek kokolistin, xuelij kitaj kenon uelis tepajtiskej.

5. TENOJNOTSAJ IPAN NOCHI TLALTIKPAKTLI

Jesús noijki okiteneuj okseki tlen panoskia ijkuak okijto: “Niman yejuin kuajli tlajtoltin itech Tekiuajyotl notenojnotsas ipan nochi tlaltikpaktli niman ijkon nochimej kalpamej makimatikan, niman kuakon tlapopoliuis ipan yejuin tlaltikpaktli” (Mateo 24:14, TNM). Maski onka miyek tlauejli, nemij ipantsin 8 millones akin kiteijliaj tlen kualtsin kichiuas iTekiuajyo toTajtsin niman kiteijlitokej ipan 240 países, ika ipantsin mil tlajtoltin. Xkeman ijkon nochiuaya.

Nochi tlen okijto Jesús ika panoskia inochiujtika. ¿Tleka noneki matikasikamatikan yejuin? Matikilnamikikan tlen Jesús okijto: “Ijkuak nenkitaskej ye nochijtikaj on tlamauisoltin temojti yejuan yonemechijlij, xmatikan ika ye nisiu para Dios tlamandaros” (Lucas 21:31).

Tlen Jesús okijto niman noijki tlen Biblia okijto ika nochiuas kiteititiaj ika toTajtsin okitlali iTekiuajyo ne iluikak ipan 1914. a Ipan yejon xiuitl okitlali iKoneuj ken tekiuaj, Jesucristo (Salmo 2:2, 4, 6-9). Xok uejkaujtipan iTekiuajyo toTajtsin kiyekanas tlaltikpaktli, kintekipatlas nochimej tekiuajkej niman tlaltikpaktli yes se xochitlalpan kampa nochipa tinemiskej.

Sa achijtsin poliui ika nochiuas tlen Jesús otechmachti ipan teoyotl, yejuin teoyotl itoka padrenuestro niman ijkin kijtoua: “Mauajla moTekiuajyo. Manochiua nikan ipan tlaltikpaktli tlen tejua tikneki, ijkon ken nochiua ne iluikak” (Mateo 6:10, TNM). Kuakon, ¿tlenon kichiujtika yejuin Tekiuajyotl desde 1914? ¿Niman tlenon kichiuas ijkuak techyekanas?