ToTajtsin akin otexchijchiuj melak tlamachilise xijkon ken tejuamej. Yejua akin techtlasojtla niman techtlajpiya. Xokinek san tejuamej matoyekanakan (Jeremías 10:23). Ijkon ken kokonej noneki makinyekanakan intajuan, tejuamej noijki noneki matechyekana toTajtsin (Isaías 48:17, 18). ToTajtsin techyekana ika itlanauatiluan, yejuin ualeuaj itech yejua ken se tetlayokolijli. Xkita 2 Timoteo 3:16.

Itlanauatiluan Jehová techmachtiaj kenon kuajli tinemiskej ipan yejuin tonajli niman kenon uelis tikseliskej nemilistli tlen xkeman tlamis. Pampa toTajtsin otexchijchiuj, noneki matiktlasojkaitakan ika yejua techyekana niman tinemiskej ika pakilistli tla tikintlakamatij itlanauatiluan. Xkita Salmo 19:7, 11 niman Apocalipsis (Revelación) 4:11.

Seki tlen melauak temachtia Biblia techititia tlenon kineki toTajtsin matikchiuakan ipan tonemilis. Okseki tlanauatiltin techmelajkaijliaj kemanon noneki matikintlakamatikan (Deuteronomio 22:8). Noneki kuajli matikasikamatikan kenon kipiya ika tiktlakamatiskej tlen temachtia Biblia (Proverbios 2:10-12). Xnemili yejuin: ipan Biblia techmachtia ika tonemilis kentla se tetlayokolijli tlen techmaka toTajtsin. Tla ijkon tikitaj tonemilis, techpaleuis kuajli matitlanemilikan kenon totlajpiyaskej niman ijkon maka topan nochiuas tlen xkuajli ipan totekiyo, ipan tochan niman ijkuak kanaj tiauej. Xkita Hechos 17:28.

Jesús otlajto itech ome tlanauatijli tlen melak ueyi kijtosnekij. Kachtopa tlanauatijli techijlia tlenon melak noneki makichiuakan  tlaltikpakchanejkej: makixmatikan toTajtsin, makitlasojtlakan niman nochipa makitekipanokan. Yejuin kachtopa tlanauatijli noneki matijkakikan nochipa ijkuak tiknemiliskej itlaj tikchiuaskej (Proverbios 3:6). Akin kitlakamatij ika inyojlo yejuin tlanauatijli uelij nouikaj iuan toTajtsin, nemij ika pakilistli niman kiseliskej nemilistli tlen xkeman tlamis. Xkita Mateo 22:36-38.

Ika ome tlanauatijli techpaleuiya kuajli matouikakan iuan oksekimej (1 Corintios 13:4-7). Ijkuak tikchiuaskej yejuin tlanauatijli, kijtosneki tikimitaskej tlaltikpakchanejkej ijkon ken toTajtsin kimita. Xkita Mateo 7:12 niman 22:39, 40.

Itlanauatiluan toTajtsin techmachtiaj kenon totlasojtlaskej iuan tochanejkauan (Efesios 4:32; Colosenses 3:12, 14). ToTajtsin iTlajtol noijki temachtia kenon uelis nochipa chantiskej san sekan akin yononamiktijkej. Xkita Génesis 2:24.

Tla tikchiuaj tlen Biblia techmachtia techpaleuis ipan totekiyo niman kichiuas kuajli matomachilikan. Xnemili itech yejuin: miyekej kintlakeuaj akin kichiuaj tlen kijtoua Biblia pampa kimatstokej ika melak kuajli tekitij (Proverbios 10:4, 26; Hebreos 13:18). Noijki, iTlajtol toTajtsin techmachtia matinemikan ika toyojlo san ika tlen tikpiyaj niman matiktlasojkaitakan ika iuan touikaj toTajtsin iuan maka matiktlasojtlakan tlemach tlen patioj tikpiyaj. Xkita Mateo 6:24, 25, 33 niman 1 Timoteo 6:8-10.

Tla tiktlakamatij itlanauatiluan toTajtsin uelis techpaleuis maka matechajsi se kokolistli (Proverbios 14:30; 22:24, 25). Tla tiktlakamatij itlanauatil toTajtsin, ijkuak kijtoua maka matitlauanikan, techpaleuiya maka techajsis se kokolistli tlen temikti noso itlaj xkuajli topan manochiua (Proverbios 23:20). Jehová techkauilia matikonikan, san ika, maka matitlauanikan (Salmo 104:15; 1 Corintios 6:10). Yejuin tlanauatiltin xsan techpaleuiyaj maka matikchiuakan tlen xkuajli, noijki techpaleuiyaj maka matiknemilikan tlen xkuajli (Salmo 119:97-100). Akin yemelak kichiuaj ken Cristo, xsan kitlakamatij toTajtsin pampa ika nopaleuiyaj. Kichiuaj pampa kitlakaitaj Jehová. Xkita Mateo 5:14-16.