SECCIÓN 9
Xkueyichiua Jehová iuan mochanejkauan
“Xmauistilikan [xueyichiuakan] on yejuan okitlalij on cielo, [niman] on tlaltikpaktli.” (Apocalipsis [Revelación] 14:7)
Ken yotikitak ipan yejuin amatlajkuilojli, Biblia kipiya miyek tlajtolyekanalistin tlen mitspaleuis tejua niman noijki mochanejkauan. Jehová kineki xpakikan. Noijki, kijtoua ika tla kachtopa nenkiueyichiuaj, “nochi okseki tlemach noijki nenkiseliskej” (Mateo 6:33, TNM). ToTajtsin kineki mouan nouikas. Ika yejon, xchiua nochi tlen tiuelis niman ijkon kuajli iuan timouikas, pampa san yejuin melak ueyi tlateochiualistli tlen se uelis kipiyas (Mateo 22:37, 38).
1 XCHIKAUA KEN IUAN TIMOUIKA JEHOVÁ
TLEN BIBLIA KIJTOUA: “Nejua Ninochiuas nemoTaj, niman nemejuamej nennokoneuan yeskej”, kijtoua Jehová (2 Corintios 6:18). ToTajtsin kineki kuajli nouikas mouan, niman teoyotl mitspaleuis itech xmonisiui. Kema, Jehová techijlia: “Nochipa xchiuakan oración” (1 Tesalonicenses 5:17). Yejua kuelita matikijlikan tlen techajmana niman tlen yemelak tiknemiliaj (Filipenses 4:6). Tla tikchiua teoyotl iuan mochanejkauan, yejuamej kitaskej ika tejua tikneltoka ika toTajtsin yemelak nemi.
San ika, xsan noneki titlajtos iuan toTajtsin, noijki noneki tijkakis. ¿Kenon uelis tikchiuas? Tla timomachtia iTlajtol niman amatlajkuiloltin tlen tlajtouaj itech Biblia (Salmo 1:1, 2). Xtlanemili itech tlen timomachtia (Salmo 77:11, 12). Tla tikneki tijkakis toTajtsin, noijki kipiya ika tias ipan tlanechikoltin (Salmo 122:1-4).
Noijki chikauis ken iuan timouika toTajtsin ijkuak tikinnojnotsas oksekimej itech yejua. Tla nochipa ijkon tikchiua, tikmachilis ika melak nisiu tinemi itech (Mateo 28:19, 20).
TLEN UELIS TIKCHIUAS:
-
Xchiua teoyotl niman xpoua Biblia mojmostla
-
Xkinpaleui mochanejkauan kachtopa xtlalikan ipan nemonemilis nenkichikauaskej nemotlaneltokil niman maka san nemoyolpaktiskej
2 XPAKI TIKUEYICHIUAS JEHOVÁ IUAN MOCHANEJKAUAN
TLEN BIBLIA KIJTOUA: “Xnisiuikan Dios niman yejua mechnisiuis” (Santiago 4:8). Xtlali se tonajli niman se hora ijkuak tikueyichiuas toTajtsin iuan mochanejkauan (Génesis 18:19). San ika, xsan yejon: xkilnamiki toTajtsin mojmostla ipan monemilis niman xkinpaleui mochanejkauan machikaui ken nouikaj iuan toTajtsin. Biblia kijtoua: “Kipiya ika [...] tikimijlis [itech Jehová] ijkuak timotlalis mochan niman ijkuak tikistinemis ipan ojtli niman ijkuak timotekas niman ijkuak timokuiteuas” (Deuteronomio 6:6, 7). Xnemili tikchiuas ken Josué, akin okijto: “Nejua niman nochanejkauan, tiktekichiuiliskej Jehová” (Josué 24:15).
TLEN UELIS TIKCHIUAS:
-
Xkijkuilo tlen kinpoloua sejsemej mochanejkauan niman xkita kenon uelis imiuan timomachtijtias yejuin
