Onitlakat ipan ueyikalpan Paddington, tlen nokaua Londres (Inglaterra). Nichantiya iuan nonan niman yeyimej nokniuan akin más iuejueyimej katkaj. Notaj xmás touan nemiya pampa melak tlauaniya.

Ijkuak nipitentsin katka, nonan onechititi ika nonekiya mojmostla niknotsas toTajtsin. Nikpiaya se pitentsin Biblia tlen san kuajkuiya salmos, niman san nejua niknejnemiliaya kenon ninokuikatis. Se tonajli onikpouj se libro, niman ipan se parte ijkin kijtouaya: “Ajsis se tonajli ijkuak xok titlanextiliskej”. Yejuin melak onechtlanemililti, hasta xueliya nikochiya pampa niknemilijtoya tlenon panoskia ika tlayekapan. Niman ninotlajtoltiaya: “¿San oninemiko para nimikis? ¿Tleka oninemiko?”. ¡Nejua xniknekiya nimikis!

Kuakon, opeuj nikneki nikmatis itech naualyotl. Ika yejon, nejua niman akin imiuan ninouikaya ipan escuela, tiayaj kampa toktokej mijkatsitsintin, niman nejua nikyejyekouaya nitlajtos imiuan akin yomijkej. Noijki san sekan tikimitayaj películas tlen kipiayaj naualyotl. Maski techmojtiaya tikinuelitayaj tikimitaskej.

Ijkuak nikpiaya majtlaktli xiuitl opeuj nikchiua tlen melak xkuajli, nikpokiya tabaco niman xok ueliya nikajkauaya. Niman sakin noijki opeuj nikpoki marihuana. Ijkuak inikpiaya 11 xiuitl, opeuj nikoni alcohol niman maski xnikueliliaya, kualtsin ninomachiliaya ijkuak nitlauaniya. Pampa melak nikuelitaya nikinkakis tlakuikaltin niman ninijtotis, san nochipa niaya ipan iluimej niman kampa nijtotilo niman tlauanilo. Ika tlayoua san ninochtekteuaya para ijkon xnechitaskej niman ika kualkan san ichtakatsin nonkalakiya nochan. Yejuin melak nechsiauitiaya, ika yejon, uajmostla xniaya escuela. Niman ijkuak niaya noescuela ompa nikoniya alcohol.

Ijkuak inikisaskia escuela nocalificaciones melak xkuajli katkaj. Niman pampa melak xkuajli tlen nikchijtinemiya, nonan melak okualan, otitajuakej niman oniaj de nochan. Onichantito iuan nonovio Tony, yejua katka rastafari niman tlachtektinemiya, kinemakaya drogas niman nochimej kimakasiyaj pampa nimantsin kualaniya. Sakin onikoneuajtik, san nikpiaya 16 xiuitl ijkuak onikpix kachtopa nokoneuj.

Onichantito ipan se albergue kampa nemiyaj nantin akin san inselti kimiskaltiayaj inkoneuan niman ompa onikimixmat iteixpantijkauan Jehová. Omemej iteixpantijkauan Jehová komintlajpalouayaj nantin akin noijki ompa nemiyaj. Se tonajli, noijki ninemiya kampa nonojnotstoyaj pampa niknekiya nikteititiskia ika tlen kijtouaya xmelauak. San ika, yejuamej onechnankilijkej ika Biblia nochi tlen onikintlajtolti. Yejuamej melak kualtsin onechnotskej niman nesiya ika melak tetlasojtlaj, ika yejon, oniknek imiuan ninomachtis Biblia.

Maski xiuejkauiya ika ninomachtiaya Biblia, oniuel itlaj tlen melak onechpaleui. Desde nipitentsin melak nikmakasi nimikis, san ika, ijkuak onikmat tlen okijto Jesús itech yoliuilistli melak onechyolseui (Juan 5:​28, 29). Noijki, oniuel ika toTajtsin melak nechtlasojtla (1 Pedro 5:7). Melak onikuelitak tlen kijtoua Jeremías 29:11, ompa kijtoua: “Nejua nikpiya planes para nemechchiuilis tlen kuajli, xpara nemechchiuilis tlen xkuajli, niman ijkon más sankin nochi kuajli kisas niman nenkipiyaskej on sanoyej kuajli tlamachalistli. Nejua nemoTEKO ijki nikijtoua”. Opeuj nikneltoka ika uelis ninemis para nochipa ipan se xochitlalpan (Salmo 37:29).

Iteixpantijkauan Jehová onechititijkej ika melak nechtlasojtlaj. Ijkuak kachtopa oniajka kampa nosentlaliaj, melak onikuelitak pampa melak kuajli nonotsaj niman nesiya ika melak notlasojtlaj (Juan 13:34, 35). ¡Xijkon ninomachiliaya ipan teopan kampa niaya! Iteixpantijkauan Jehová melak kuajli onechselijkej. Yejuamej onechititijkej ika nechtlasojtlayaj niman melak onechpaleuijkej. Niman nikimitaya ken nofamilia.

Pampa opeuj ninomachtia Biblia, onikasikamat ika para ninemis ijkon ken Jehová kitlajtlani nonekiya nikajkauas tlen xkuajli nikchiuaya. Xueliya nikajkauaya ika nikpoki tabaco, melak ouijtika para onijkajkauj. Noijki xok nikinkakiya seki tlakuikaltin tlen achto nikinkakiya pampa onikitak ika yejon kichiuaya manikneki nikpokis marihuana. Niman xok niaya iluimej niman discotecas pampa nikmatstoya ika tla niaya niknekiskia nikonis alcohol. Niman opeuj ninouika iuan akin nikmatstoya ika nechpaleuiskiaj (Proverbios 13:20).

Tony noijki opeuj nomachtia Biblia imiuan iteixpantijkauan Jehová. Niman pampa kinankiliayaj ika Biblia nochi tlen kinekiya kimatis, okasikamat ika tlen nomachtijtoya yejon tlen melauak. Tony melak onopatlak: yejua xok nouikaya imiuan akin tlauisokiyaj, xok tlachtekiya niman xok kikuiya marihuana. San ika, otikitakej ika tla tiknekiyaj tiktekichiuiliskej Jehová ken yejua kineki, nonekiya tonamiktiskiaj niman ijkon kuajli tikiskaltiskiaj tokoneuj. Ika yejon, otonamiktijkej ipan 1982.

Nikilnamiki ika niktejtemouaya ipan revista Amatl Tekakistilijketl niman ¡Xtlachiakan! a kenijki sekimej ouel onopatlakej. Tlen ompa nikpouaya melak nechyolchikauaya niman noijki nechpaleuiaya maka maninosiaujkaua. Nochipa niktlajtlaniliaya Jehová maka manechkaua. Nejua niman Tony otoapolaktijkej ipan julio de 1982.

Melak yonechpaleui ninouikas iuan Jehová. Nejua iuan Tony yotikitakej ika Jehová techpaleuiya ijkuak tikixnamikij tlen xkuajli. Ika yejon, tikneltokaj ika yejua techpaleuis niman kuajli tikmatstokej ika nochipa kitlajpiyas tofamilia (Salmo 55:22).

Melak techyolpaktia ika otikinpaleuijkej tokoneuan manouikakan iuan Jehová. Noijki melak niyolpaki nikitas ika noxuiuan más kixmatstiuej Jehová.

Aman xok nechajmana tlen panos ika tlayekapan noso tlenon panoua ijkuak timikij. Tony niman nejua tikintlajpalojtinemij tokniuan ipan intlanechikol cada semana niman ijkon tikinyolchikauaskej. Tejuamej tikinmachtiaj oksekimej ika tla tlaneltokaj itech Jesús, uelis nemiskej para nochipa.