Nzapa lindó ase ti dungɔ lɛ ngɛ̃́ ndɛ̃ ndɛ̃ ndɛ̃ na lége ti evolisiɔ̃?
Gbinya ti ya Ngbangɔ
Ipɔ. Ngbangɔ tɛnɛ yangondo ya Nzapa lindó azi, asa nga na akɛkɛ “ndɛ̃ ndɛ̃ ndɛ̃.” a (Ebandeli 1:12, 21, 25, 27; Suma 4:11) Ngbangɔ tɛnɛ ya, ndasewa tɛ azi zu alondó ka tɛ Adamu na Eva, akotara e ti uzu. (Ebandeli 3:20; 4:1) Ta Ngbangɔ tɛnɛ ya Nzapa lindó ase ti dungɔ lɛ ngɛ̃́ ndɛ̃ ndɛ̃ ndɛ̃ na lége ti evolisiɔ̃ ma. Kanda, ta ni kɛ̃ nga tɛnɛ mɛ azi ti siãsi ndo tɛnɛ ya gbinyangbi ndo li tɛrɛ lo kaya tɛrɛ aye ndɛ̃ ndɛ̃ ndɛ̃ mɛ na dungɔ lɛ ngɛ̃́ ma. b
Nzapa lindó aye na lége ti evolisiɔ̃?
“Azi mɛ ndo ye ya Nzapa lindó aye zu mɛ na dungɔ lɛ ngɛ̃́ na lége ti evolisiɔ̃ ko, ala ndo kambisa dangɔ bɛ tɛ la na ndo evolisiɔ̃ na ɔngbi.” Na bangɔ buku mɛ Encyclopædia Britannica, ala ndo du na dangɔ bɛ ya “Nzapa ndo salela bo aye mɛ ge lɛ gigi ti nɛngɔ ya lo li na aye mɛndɛ̃.”
Azi ti evolisiɔ̃ ndo tɛnɛ nga ya:
Aye zu mɛ na dungɔ lɛ ngɛ̃́ alo ka tɛ akotara ti gã nvɛ̃ni.
Se ti dungɔ lɛ ngɛ̃́ kɔi alengbi ti singɔ na aye ti dungɔ lɛ ngɛ̃́ mɛndɛ̃.
Alengbi ti dungɔ ya Nzapa la ndo li ya aye niko ali tɛrɛ lo ngaso.
Tɛnɛ ti evolisiɔ̃ amangbi na tɛnɛ mɛ kaya Ngbangɔ?
Azi ti evolisiɔ̃ ndo tɛnɛ ya tɛnɛ mɛ Ngbangɔ ndo tɛnɛ ya Nzapa la li aye zu ko, ta du bɛta tɛnɛ ma. Kanda Yezo fandó yangondo ya tɛnɛ mɛ kaya mbɛti ti Ebandeli ni du bɛta tɛnɛ nvɛ̃ni. (Ebandeli 1:26, 27; 2:18-24; Matie 19:4-6) Ngbangɔ pa ya uzu ti nɛngɔ ya lo ga ge tise ko, Yezo ndó ka ndozu ndoni kɔi na Nzapa, wa Nzapa lindó “aye zu” na lége tɛ Yezo. (Yoanɛ 1:3) Ni la, tɛnɛ mɛ azi ti evolisiɔ̃ ndo tɛnɛ ya Nzapa lindó aye ti dungɔ lɛ ngɛ̃́ ndɛ̃ ndɛ̃ ndɛ̃ na lége ti evolisiɔ̃ ko, ta ni mangbi na tɛnɛ mɛ Ngbangɔ ndo tɛnɛ ma.
Aye mɛndɛ̃ ndo gbinyangbi kaya tɛrɛ akɛkɛ na asa ti nɛngɔ ya ni du na dungɔ lɛ ngɛ̃́ ka ndo mɛndɛ̃, ni du evolisiɔ̃?
Ta Ngbangɔ kambisa bere fãni kɛ̃ la ye kɔi mɛ na dungɔ lɛ ngɛ̃́ alengbi ti gbinyangbingɔ ya tɛrɛ lo ma. Kanda ta ni kɛ̃ ma ya akɛkɛ na asa ndɛ̃ ndɛ̃ ndɛ̃ mɛ Nzapa li, alengbi ti gbinyangbingɔ na landangɔ ndo mɛ ni da. Abɛse du ya azi mɛndɛ̃ ndo hũ ya gbinyangbingɔ niko adu evolisiɔ̃ ko, ta gbinyangbi ni ndo si na ase ti dungɔ lɛ ngɛ̃́ mɛndɛ̃ ti fãnani ma.
