AYATA e ti wali taa ndo du kaya zwá ti Sangir mɛ ka kɔdɔrɔ ti Indonésie. Ali ndɛ abulu gba ala ndo li kwa ndoni kɔi. Azi gba ahĩnga ala na lo ti kwa tɛ la ti fangɔ tɛnɛ nga na se mɛ ala ndo za azi mɛndɛ̃ ya, ala gbɔ̃ nda tɛnɛ ti ya Ngbangɔ. Kanda ka nyɔ tɛ ko, ala ndo li kwa mɛ aɔngbi na oko.

Ti uzu, ala ndo zundó ka nyɔ tɛ, wa ala lɔ atɛ̃nɛ ti kotani asi na ni ka gigi. Ambanga atɛ̃nɛ mɛndɛ̃ ndo dundó kotani aɔ kɔnɔngɔ ti ndɛmbo. Ala ndo dundó na ndo mbala [bere zunu], na gesi ala ndo sɔ̃nɔndó atɛnɛ niko na marto tee ati yakere nga nzɔ̃ni nga ma tɛ para kɔndɔ. Na gesi ala ndo kpãndó atɛ̃nɛ niko mɛ ala lɛkɛ ni ati yakere na ya paka wa ala ndo mandó na ni na ndo escalier tee ka ndo mɛ ala ndo du na ni. Na gesi ala ndo kpãndó ni na ya sake ti kotani ti nɛngɔ ya, ama na ya kamiɔ, wa agwe na ni ali na kwa ti lɛkɛngɔ talége.

Kɔi ka popo tɛ ayata niko, ili lo la Hulda. Kpale ti ya dungɔ lɛ ngɛ̃́ tɛ lo ndo hɛ̃ndó lo lége ti lingɔ kwa niko gba ɔngɔ tɛ ayata wali mɛndɛ̃ sɛ. Falanga mɛndó lo ndo lua na lo ti kwa tɛ lo ko, ni ndo zandó lo ya, lo kã na azi ti ndasewa tɛ lo, kanda lo na mɔkanɔ mɛndɛ̃, lo ndo lindó kwa kpengbani ti nɛngɔ ya, lo vɔ̃ tablɛtɛ mɛ na zangɔ lo ya lo ndo salela JW Library. Hulda hĩnga ya, avideo nga na aye mɛ kaya JW library na zangɔ lo ya, lo ti wa hangɔ tɛnɛ nzɔ̃ni, wa lo hĩnga nga mbilimbili ti ya Ngbangɔ na seni nvɛ̃ni.

Na ya anzɛ sɛ, nyita wali Hulda lindó kwa kpengbani bi zu na ndãtu nvɛ̃ni so holongɔ tɛnɛ tee ya asi kamiɔ̃. Ngbĩi lo bombindó falanga mɛ alengbi ti zangɔ lo ya, lo vɔ̃ na tablɛtɛ kɔi.

Nyita wali Hulda pa ya, “Dudu ndo mundó tɛrɛ mbi zu na pɛ onzingɔ kwa ti holongɔ atɛ̃nɛ. Kanda dudu niko awɛndó na pɛ luangɔ tablɛtɛ ti fãnani mɛ ndo za mbi na ya kwa tɛ mbi ti fangɔ tɛnɛ, wa mbi lɛkɛ nga abombi zangangɔ pɛnɔ.” Lo tɛnɛ nga ya tablɛtɛ niko aza lo gba na ngoi ti siɔ ngã ti Covid-19, na lo mɛ ya akpale zu ti bombi ndo lindó tɛrɛ lo na lége ti video. E na dengɔ bɛ gba na lo tɛ mɔ nyita Hulda na ndenge mɛ mɔ li kpengbani mɔ kokisa mɔkanɔ tɛ mɔ.