Nicolas naCeline oya li ya taalela eshongo li ili. Oya taamba ko oshinakugwanithwa shawo oshipe okuza kOshitayimbelewa shaFulaanisa, ya tembukile kegongalo lilwe. Oya ti: “Petameko otwa li twa nyanyukwa noonkondo, ihe otwa tameke okukala twa yuulukwa ookuume ketu. Ka twa li natango tu na ekwatathano lya kola naamwatate megongalo moka twa tembukila.” a Kokutala komashongo ngoka haga vulu okuholoka po ngele omuntu ta tembuka, ongiini to vulu okutembukila nomupondo kegongalo lilwe? Oshike yalwe taya vulu okuninga ya kwathele? Omalaleko nuuyamba geni to vulu okumona, nongiini to vulu okukala elaleko nuuyamba megongalo moka wa tembukila?

OMAKOTAMPANGO GANE NGOKA TAGE KU KWATHELE WU SINDE OMASHONGO

1. Ikolelela muJehova. (Eps. 37:5) Omumwameme Kamuzi, gwokoJapani, okwa li a tembuka mo megongalo moka a kala uule omimvo 20, sho omusamane gwe a tuminwa a ka longele kehala lilwe. Ongiini Kamuzi a “igandja kOmuwa”? Okwa ti: “Onda li nda galikana lwiikando kuJehova kombinga yuumbanda wandje, yuuwike nosho wo kombinga yokukala ndi uvite ndi na oshimpwiyu sha pitilila. Oshikando kehe nda galikana, okwa pe ndje oonkondo ndhoka nda pumbwa.”

Ongiini to vulu okukala wa inekela muJehova shi vulithe nale? Ngaashi owala oshimeno hashi kala sha pumbwa iitungithi opo shi koke, natse otwa pumbwa okwiipalutha pambepo, opo eitaalo lyetu li kale lya kola. Nicolas, ngoka a popiwa metetekelo, okwa mono kutya okutedhatedha koshiholelwa shaAbraham, shaJesus noshaPaulus, aalumentu mboka ya li ya ningi omaiyambo ogendji ya  longe ehalo lyaKalunga, oshe mu kwathela a kale e na einekelo muJehova lya kola kutya ote ke mu kwathela. Okukala wu na ondjigilile yokuninga ekonakono lyoye lyopaumwene itaku ke ku kwathela owala wu ungaunge neshongo kehe monkalamwenyo yoye, ihe otaku ke ku kwathela wo wu ilonge iinima oyindji mbyoka to vulu oku ka longitha wu tse yalwe omukumo kegongalo hoka to yi.

2. Yanda okuyelekanitha. (Omuuv. 7:10) Jules okwa li e na okwiigilila omuthigululwakalo omupe sho a tembukile koAmerika okuza ko Benin. Okwa ti: “Onda li handi kala ndi uvite kutya onda pumbwa okuyelithila kehe omuntu tandi tsakaneke kombinga yeputuko lyandje.” Molwaashoka shono hasho a li a igilila, okwa tameke okwiiteta ko kegongalo. Ihe konima sho a tseya nawa aamwatate naamwameme, okwa lundulula etaloko lye. Okwa ti: “Onda itaala kutya muuyuni awuhe, aantu oya faathana. Ohaya popi owala nokwiihumbata momukalo gwa yooloka ko kungoka twa igilila. Osha simana okutaamba ko aantu ngaashi ye li.” Onkee ano yanda okuyelekanitha egongalo hoka wa zi naandyoka wu li. Omumwameme gumwe omukokolindjila gwedhina Anne-Lise okwa popi a ti: “Inandi tembukila kegongalo ndika ndi adhe iinima yi li ngaashi ya li kegongalo hoka nda zi. Onda tembuka, opo ndi ilonge iinima iipe.”

Aakuluntugongalo nayo oya pumbwa okuyanda okuyelekanitha egongalo moka ye ya naandyoka ya tembuka. Okuninga iinima momikalo dha yooloka ko kwaandhoka twa igilila ina ku puka. Oshi li aluhe pandunge wu tseye nawa oonkalo dhomoshitopolwa manga inoo ninga etokolo. (Omuuv. 3:1, 7b) Oshi li nawa aluhe tu tulile po yalwe oshiholelwa pehala lyokukala twa hala aantu megongalo ya ninge, nenge ya dhiladhile ngaashi tse. — 2 Kor. 1:24.

3. Kala wa ipyakidhila megongalo. (Fil. 1:27) Okutembuka ohaku pula ethimbo noonkondo odhindji, ihe okuza petameko osha simana okuya mpoka hapu gongalelwa, ngele otashi vulika. Ngele iho ya kokugongala nenge ho pumbu ko, ongiini aamwatate naamwameme megongalo moka wa tembukila taya vulu oku ku kwathela? Omumwameme Lucinda, ngoka a tembuka pamwe noyanakadhona yaali koshilando shimwe shomoSouth Afrika, okwa ti: “Onda pewa omayele ndi kale aluhe he longo oshindji megongalo, okulonga pamwe nayalwe muukalele, nokukutha ombinga pomakugongala. Otwa iyamba wo opo aamwatate ya kale haya ningile elongekidho lyiilonga yomomapya pegumbo lyetu.”

“Okulonga epepe nepepe naamwatate naamwameme megongalo moka wa tembukila otaku ke ku kwathela wu koleke eitaalo lyoye nosho wo lyayalwe.” Anne-Lise, ngoka a popiwa metetekelo, okwa li a ladhipikwa kaakuluntugongalo a longe pamwe nakehe gumwe. Oshizemo osha li shini? Okwa ti: “Onde shi mono mo nziya kutya okuninga ngawo okwa kwathela ndje lela ndi igilile mo megongalo.” Shimwe ishewe, okwiiyamba wu kwathele miilonga ngaashi okwoopaleka nokukaleka Oshinyanga shUukwaniilwa monkalo ombwanawa otaku ka ulika kutya owa tala ko egongalo ndyoka li egongalo lyoye. Ngele owa kala wa ipyakidhila megongalo, oto igilile mo nokutaambiwa ko nziya kaamwaho aape.

4. Panga uukuume naantu aape. (2 Kor. 6:11-13) Okuulika ohokwe muyalwe oku li omukalo  omwaanawa gwokupanga uukuume nayalwe, onkee ano itulila po ethimbo komeho nokonima yokugongala wu kundathane nayalwe nowu ya tseye nawa. Ninga oonkambadhala wa mana mo wu tseye omadhina gawo. Okudhimbulukwa omadhina gaantu nokukala omuntu gwaantu, noho popiwa nangoye nuupu otaku ka ningitha aantu ya kale ya hala okuhedha popi nangoye, shoka tashi ka kwathela wu pange uukuume naantu aape.

Pehala lyokukala to ipula nokutaambiwa ko, pitika aamwatate naamwameme megongalo moka we ya ye ku tseye nawa. Ninga ngaashi Lucinda ngoka a popi a ti: “Ngashingeyi otu na ookuume kopothingo, molwaashoka twa ningi oonkambadhala tu hiye yalwe kaandjetu.”

“TAAMBATHANENI”

Okuya moshinyanga shUukwaniilwa moka mwa udha aantu mboka kuu shi nando onale kaku shi okupu. Onkee ano ongiini to vulu oku shi ningitha oshipu kwaamboka aape? Omuyapostoli Paulus okwe tu ladhipike a ti: “Taambathaneni ano, ngaashi Kristus e mu taamba.” (Rom. 15:7) Aakuluntugongalo otaya vulu okuholela Kristus mokuningitha mboka aape ya kale ye uvite ya taambiwa ko. (Tala oshimpungu “ Shoka tashi vulu oku ku kwathela wu tembuke nomupondo.”) Nonando ongawo, ayehe megongalo, mwa kwatelwa naanona, otaya vulu okukala ye na ombinga mokupanga uukuume naantu aape.

Okutaamba ko yalwe okwa kwatela mo oku ya yakula, ihe otaku vulu wo okukwatela mo oku ya kwathela momikalo tadhi longo. Pashiholelwa, omumwameme gumwe okwa longitha ethimbo lye a ulukile gumwe ngoka opo a tembukile megongalo lyawo mondoolopa, noku mu ulukila nkene e na okulongitha iiyenditho yaayehe. Shoka omumwameme e mu ningile oshe mu guma lela noshe mu kwathela a igilile mo.

OMPITO YOKUKOKA

Uuna ombahu tayi koko, oshipa shawo oshikulu ohashi yagumuka ko lwiikando manga omawawa gasho inaaga kola natango nokutuka. Sha faathana,  uuna to tembukile kegongalo lilwe, owa pumbwa okweekelahi kehe shoka tashi vulu oku ku imba wu longele Jehova wa manguluka. Nicolas naCéline oya ti: “Okutembuka oku li edheulo ewanawa. Okwiigilila aantu aape nehala epe oha ku tu kwathele tu kokeke omaukwatya omape.” Jean-Charles ngoka a popiwa petameko okwa popi nkene yaandjawo ya mono mo uuwanawa a ti: “Elunduluko ndika olya kwathela aanona yetu ye shi endithe nawa megongalo moka twa tembukila. Konima owala yoomwedhi dhontumba, omwanakadhona gwetu okwa tameke okugandja iipopiwa pokugongala kwomokati koshiwike nomwanamati gwetu okwa ningi omuuvithi inaa ninginithwa.”

Ongiini ngele onkalo yoye itayi ku pitike wu tembuke, pashiholelwa kehala hoka ku na ompumbwe onene? Ngele osho shi li ngawo, omolwashike itoo tula miilonga omayele ngoka ga popiwa metetekelo megongalo moka wu li? Nonando owi inekela muJehova, kala wa ipyakidhila megongalo mokuninga omalongekidho wu uvithe pamwe nayalwe nokupanga uukuume nokutsa omukumo mboka aape. Mbela ito vulu okukatuka oonkatu wu kwathele mboka aape nenge mboka ya pumbwa ekwatho miinima yontumba? Molwaashoka ohole ohayi ndhindhilikitha mo Aakriste yashili, okuninga ngawo otaku ke ku kwathela wu koke pambepo. (Joh. 13:35) Oto vulu okukala nuushili kutya “omayambo ga tya ngeyi oga hokiwa kuKalunga.” — Heb. 13:16.

Nonando ohaya kala ya taalela omashongo, Aakriste oyendji oya tembukila nomupondo kegongalo lilwe, shoka nangoye to vulu okuninga. Anne-Lise okwa ti: “Okutembukila kegongalo lilwe okwa kwathela ndje ndi egululile yalwe omutima gwandje.” Kazumi ngashingeyi okwa tompwa kutya uuna omuntu wa tembuka “oho kala wu wete nkene Jehova te ku kwathele momikalo ndhoka inee ku kwathela nando onale.” Ongiini kombinga yaJules? Okwa ti: “Okupanga uukuume nayalwe okwa kwathela ndje ndi kale ndi uvite uugumbo. Ngashingeyi ondi uvite ndi li oshitopolwa shegongalo moka nda tembukila notashi ka kala oshidhigu kungame ndi ze mo.”